Read Gangte KISIMNA 26 Bible Online

KISIMNA 26 - Gangte bible

KISIMNA 26

¹Chun, gawtna a haih nung chun, LALPA’n Mosi leh Aron chapa Eleazar chuh a hopih a,

²“Israel chate kikhawm khawm haw cheng chuh kum sawmnih apat a chunglam, a pa inkuon bang zel in Israel gama galdo thei tieng cheng chuh sim suok un,” ti’n.

³Tichun, Mosi leh thiempu Eleazar chun Jerikoh zawn, Jordan pang, Moab phai ah amau haw chuh a hopih a,

⁴LALPA’n Mosi kawma thu a piek bangin Israel mipite chuh kum sawmnih apat achunglam na sim ding ahi, Israel chate Aigupta gam apat a hung pawtte chuh ziehaw hi ahiu hi.

⁵Israel chapa upa Reuben, Reuben chapa te; Hanok te inkuon lak ah Hanok; Pallu te inkuon lak ah Pallu;

⁶Hezron te haw lak ah Hezron te inkuon, leh Karmi apat Karmi te inkuon.

⁷Ziehaw hi Reuben te inkuon ahiu hi; sim theih tieng chengcheng chuh singli leh sangthum leh zasagih leh sawmthum ahiu hi.

⁸Pallu suonte lak ah; Eliab,

⁹Eliab suonte; Nemuel, Dathan, Abiram ahiu hi. (Zie Dathan leh Abiram hi ahiu, LALPA chunga a hel lai u a Mosi leh Aron kalh a hel te kipunkhawm haw suonte chuh);

¹⁰lei a hung khi a a mau haw a valh tum a, Kora leh a nungzuite cheng a thiu a, mi zanih leh sawmnga mei in a ka lum a, mipite a dinga vaulawkna a hi tau hi.

¹¹Himahleh, Kora chapate chuh a thi puou hi.

¹²Simeon chate chuh a inkuon uh kizawm dân bang zelin, Nemuel chite chuh Nemuel te inkuon, Jamin apat, Jamin te inkuon; Jakin apat Jakin te inkuon:

¹³Zerah apat Jerah te inkuon: Shaul apat Shaul te inkuon ahiu.

¹⁴Ziehaw hi Simeon phungte chuh ahiu a, singnih leh sangnih leh zanih ahiu hi.

¹⁵Gad chite chuh, a inkuon uh ki zawm dân bang zelin, Zephon apat Zephon te inkuon, Hagi apat Hagi te inkuon:

¹⁶Shuni suonte Shuni te; Ozni suonte Ozni te; Eri suonte Eri te;

¹⁷Arod suonte Arod te inkuon; Areli suonte Areli te inkuon.

¹⁸Ziehaw hi Gad suonte chuh ahiu a, a sim dân bang u a, a ziklut cheng u chuh singli leh zanga ahiu hi.

¹⁹Juda chate chuh; Er leh Onan ahiu a, Er leh Onan chuh Kanaan gam ah a thiu a,

²⁰Juda suonte chuh a inkuon dungzui un, Shelah inkuon apat Shelah,

²¹Perez suonte chuh Hezron inkuon apat Hezron, Hamul suon apat Hamul,

²²Ziehaw hi Juda inkuon a, amin kizîklut cheng chuh ahiu a, singsagih leh sanggup leh zanga ahiu hi.

²³A inkuon uh kizawm dân bang zel a Issakar suonte: Tola apat Tola inkuonte Puvah suonte Puvah te inkuon:

²⁴Jeshup suonte Jeshup te inkuon: Shimron suonte Shimron te inkuon ahiu hi.

²⁵Ziehaw hi a sim dân bang u a, a ziklut uh Issakar suonte ahiu a, singgup leh sangli leh zathum ahiu hi.

²⁶A inkuon uh kizawm dân bang zel a Zebulun suonte: Sered suonte Sered te inkuon: Elon suonte Elon te inkuon: Jahleel suonte Jahleel te inkuon ahiu hi.

²⁷Ziehaw hi a sim dân bang u a Zebulun suonte ahiu hi, singgup leh zanga ahiu hi.

²⁸A inkuon uh kizawm dân bang zela Joseph suonte: Manasseh leh Ephraim ahiu hi.

²⁹Manasseh suonte: Makir suonte apat Makir te inkuon: chun, Makir in Gilead a hing a; Gilead suonte Gilead te ahiu hi.

³⁰Ziehaw hi Gilead suonte ahiu hi; Lezer suonte chuh Lezer te inkuon; Helek suonte Helek te inkuon.

³¹Asriel suonte Asriel te inkuon; Shekem apat Shekem te inkuon:

³²Shemida suonte Shemida te inkuon: Hepher suonte Hepher te ahiu hi.

³³Hepher chapa, Zelophehad chun chapa neilo in chanu te a nei a: Zelophehad chanu te min chuh Mahla te, Noah te, Hogia, Milkah, Tirzah te ahiu hi.

³⁴Ziehaw hi Manasseh suonte ahiu hi. A sim hawu chengcheng chuh singnga leh sangnih leh zasagih ahiu hi.

³⁵Ziehaw hi a inkuon uh kizawm bang zela Ephraim suonte ahiu hi: Shuthela suonte Shuthela te inkuon; Beker apat Beker te inkuon; Tahan apat Tahan te inkuon a, hiu hi.

³⁶Eran suonte chuh Shuthela apat a sut ahiu ui.

³⁷Ziehaw hi a sim dân bang u a Ephraim suonte inkuon ahiu a, singthum leh sangnih leh zanga ahiu hi. Ziehaw hi a inkuon uh kizawm dân bang zela Joseph suonte ahiu hi.

³⁸A inkuon uh kizawm dân bang zela Benjamin suonte: Bela apat Bela inkuonte; Ashbel apat Ashbel te inkuon: Ahiram apat Ahiram te inkuon.

³⁹Shephupham apat Shephupham te inkuon: Hupham apat Hupham te inkuon ahiu hi.

⁴⁰Chun, Bela suonte chuh Arda leh Naaman ahiu hi; Arda apat Arda te inkuon: Naaman suonte Naaman te ahiu hi.

⁴¹Ziehaw hi a inkuon uh kizawm dân bang zela Benjamin suonte ahiu hi: chun, a sim chengcheng u chuh singli leh sangnga leh zagup ahiu hi.

⁴²Ziehaw hi a inkuon uh kizawm dân bang zela Dan suonte ahiu hi: Shuham apat Shuham te inkuon ahiu hi. Ziehaw hi a inkuon uh kizawm dân bang zela Dan suonte ahiu hi.

⁴³Shuham te suonte chengcheng a sim dân bang u chun singgup leh sangli leh zali ahiu hi.

⁴⁴A inkuon uh kizawm dân bang zela Aser suonte: Imnah apat Imnah te inkuon: Ishvi suonte Ishvi te: Beriah apat Beriah te inkuon ahiu hi.

⁴⁵Beriah apat Beriah te inkuon a hiu a, Beriah suonte chuh:

⁴⁶Heber apat chuh Heber te inkuon: Malkiel apat Malkiel te inkuon ahiu hi. Chun, a chanu min Sera ahi.

⁴⁷Ziehaw hi Aser chapate suon haw a sim chengcheng teu chuh ahiu a, singnga leh sangthum leh zali ahiu hi.

⁴⁸A inkuon uh kizawm dân bang zela Naphtali inkawte: Jahzeel suonte Jahzeel te inkuon: Guni suonte Guni te:

⁴⁹Jezer suonte Jezer te inkuon: Shilam suonte Shilam te inkuon ahiu hi.

⁵⁰ziehaw hi a inkuon uh kizawm dân bang zela Naphtali suonte ahiu hi: a simteu chengcheng chuh singli leh sangnga leh zali ahiu hi.

⁵¹Ziehaw hi Israel suon a sim hawu cheng chuh ahiu hi, nuoigup leh sangkhat leh zasagih leh sawmthum ahiu ui.

⁵²Chun, LALPA’n Mosi kawmah a gena,

⁵³“Ziehaw hi a min zah zel un gam hi hawp sak ding ahi.

⁵⁴A tam deuhte chuh gam pie lien in na tin, a tawm deuh te chuh gam pie neu in na tin: sim ahih bang u chun gam piek chiet ding ahi.

⁵⁵Amahvang chuh gam chuh aisân a hawp ding ahi: a puteu nam min kizawm dân bang zelin gam chuh chang un au.

⁵⁶Phunsân bang zelin gam chuh a neu leh atawm kawma piek ding hi’n a.”

⁵⁷Chun, ziehaw hi Levi te a inkuon uh kizawm dân bang zela sim haw chuh ahiu hi: Gershon apat Gershon inkuonte: Kohath apat Kohath inkuonte: Merari apat Merari inkuonte ahiu hi.

⁵⁸Ziehaw hi Levi suonte a simtel ahi; Libni te. Hebron suonte, Mahli suonte, Mushi suonte, Korah suonte ahiu hi. Kohath chuh Amram pa ahi.

⁵⁹Amram zi min chuh Jokebed Levi chanu Aigupta gama Levi hin a hi a, chun, amah chun Amram ah Aron leh Mosi leh a suohpihnu Miriam a hinga.

⁶⁰Aron chapate, Nadab te, Abihu te, Eleazar te, Ithmar te ahiu a.

⁶¹Tichun, Nadab leh Abihu chuh LALPA masanga mat ngeiloh mei a mat lai u khan a thiu a.

⁶²Chun, Levi suona pasal tha khat apat a chunglam chuh singnih leh sangthum ahiu hi. Israel chate chanvo kihawpna lak a tello ahih ziekun, a chuom a zik ahiu ui.

⁶³Ziehaw hi ahi Jerikoh zawn a, Jordan lui panga, Moab phai a Israel chate Mosi leh Eleazar in a sim hawu chuh ahiu hi.

⁶⁴Chun, Sinai thaleka Israel mite Mosi leh thiempu Aron in a sim hawu kha khat chale a um ta puou hi.

⁶⁵LALPA’n “Thalek ah thi ngêi un au,” a na ti ta ngâl a. Jephuneh chapa Kaleb leh Nun chapa Joshua tihloh kuomah a dam a um ta puou hi.