Read Gangte KISIMNA 29 Bible Online

KISIMNA 29 - Gangte bible

KISIMNA 29

¹Chun, tha sagihna, a ni khat ni chun, kikhawpna thiengtho na neih dinguh a hi, bangmah na sep dinguh a hi puoi; zie ni a chuh pengkun na mût dinguh ahi.

²LALPA dinga gimlim hâlmang thillat pieu un na tin uh; bâwngchal tuoi khat, belamchal khat, belamno a chal kum khata upa demna bei sagih;

³An thillat chuh changbuong sathau tawh kihel, bâwngchal khat ah ephah hawp sawma khena hawp thum, belamchal khat ah hawp sawma khena hawp nih,

⁴belamno sagih, khat zel ah hawp sawma khena hawp khat na lat dinguh ahi.

⁵Nang u dinga gitloh thawihna dingin kêlchal khat tawh na lat dinguh ahi.

⁶Ziehaw hi tha thak ni a hâlmang thillat na piek zing sekteu bana changbuong thillat leh ni chenga hâlmang thillat tawh changbuong thillat leh dâwn ding thillat, LALPA a ding a gimlim ahih theihna dinga dân dungzui a mei thillat kibawl zingte bana na bawl sek dinguh ahi.

⁷Chun, tha sagihna, ni sawm ni chun, kikhawpna thiengtho na neih dinguh ahi a, zie sung hin na le nasep loh dinguh ahi.

⁸Hâlmang thillat te, LALPA dinga gimlim chuh lân unla: bâwngchal khat, belamchal leh belamno chal demna bei kum khata upa sagih na lat dinguh ahi.

⁹An thillat chuh changbuong sathau tawh kihel, bâwngchal khat ah ephah hawp sawma khena hawp thum, belamchal khat ah hawp sawma khena hawp nih,

¹⁰belamno chal sagih, belam khat zel ah hawp sawma khena hawp khat tawh na lat dinguh ahi.

¹¹Gitloh thawihna dingin kêlchal khat, ni chenga hâlmang thillat leh gitloh thawihna a tatna, chun, nichenga hâlmang thilpiek leh changbuong thillat tawh dâwn ding thillat na piekteu bana chuh na piek dinguh ahi.

¹²Tha sagihna, ni sawmlenga ni chun kikhawpna thiengtho na neih dinguh ahi a, na nasep loh dinguh ahi. LALPA dinga guolvakna ni sagih na nit dinguh ahi.

¹³LALPA a dinga gimlim hiding in mei a hâlmang kithawihna na siem dinguh ahi: bâwngchal tuoi sawmlethum, belamchal nih, belamno a chal kum khata upa sawmleli; demna bei chiet ahi ding ahi.

¹⁴Chun, an thillat chuh changbuong sathau tawh kihel, bâwngchal sawmlethum chu tawh ephah mun sawma khena mun thum, belamchal nih a ding in changbuong ephah dim khat mun sawma khena mun nih,

¹⁵Khat ah ephah dim khat hawp sawm a khena hawp thum, belamchal nih, belam khat ah hawp sawma khena hawp khat zel, na lat dinguh ahi,

¹⁶Gitloh thawihna dingin kêlchal khat tawh; zie hi hâlmang thillat ni chenga kipie, changbuong thillat te, dâwn ding thil latte chuh simloh in ahi ding ahi.

¹⁷A ni nih ni’n bâwngchal guol sawmlenih, belamchal nih, belamno a chal kum khata upa demna bei sawmleli na piek ding uh ahi;

¹⁸Changbuong thillat leh dâwn ding thillat chuh a dân bangtak in a tam dân u bang zel in bâwngchal te a ding, belamchal te a ding, belamno te a dingin na lat ding uh ahi.

¹⁹Chun, gitloh thawihna dingin kêlchal khat tawh, hâlmang thillat ni chenga kilân te leh, Changbuong thil latte, dâwn ding thil latte chuh simloh in hi ding ahi.

²⁰A ni thum ni chun bâwngchal sawmlekhat, belamchal nih, belamno a chal kum khat, demna bei sawmleli;

²¹Changbuong thillat leh dâwn ding thillat chuh, a dân bangtak in atam dân bang zel un bâwngchal a ding in, belamchal a ding in, belamno a ding in ahi ding ahi.

²²Gitloh thawihna dingin kêlchal khat tawh; hâlmang thillat ni cheng a kilân te leh, zie a changbuong thillat leh dâwn ding thil latte chuh simloh in ahi ding ahi.

²³Ani li ni chun bâwngchal sawm, belamchal nih, belamno a chal kum khat a upa demna bei sawmleli:

²⁴Chun, changbuong thillat leh dâwn ding thillat chuh, a dân bang takin, a tam dân zel un bâwngchal a ding in, belamchal a dingin, belamno a ding in ahi ding ahi.

²⁵Chuleh, gitloh thawihna dingin kêlchal khat tawh: hâlmang thillat ni chenga kilân te, zie a An thillat leh dâwn ding thillat te chuh simloh in a hi ding ahi.

²⁶A ni nga ni chun bâwngchal kuo, belamchal nih, belamno a chal kum khat a upa demna bei sawmleli;

²⁷An thillat leh dâwn ding thillat a chuh, a dân bang takin a tam dân bang zel un bâwngchal a ding in, belamchal a dingin, belamno a dingin ahi ding ahi.

²⁸Gitloh thawihna dingin kêlchal khat tawh, hâlmang thillat ni chenga kilân te, zie a An thillat leh dâwn ding thillat te chuh simloh in ahih ding ahi.

²⁹A ni gup ni chun, bâwngchal giet, belamchal nih, belamno kum khat a upa demna bei sawm leh li.

³⁰An thillat leh dâwn ding thillat chuh, a dân bang takin a tam dân bang zel un bâwngchal a ding in, belamchal a ding in, belamno a ding in, ahih zel ding ahi.

³¹Gitloh thawihna dingin kêlchal khat tawh; hâlmang thillat ni cheng a kilân te, zie a An thillat leh dâwn ding thillat te chuh simloh in ahi ding ahi.

³²A ni sagih ni chun bâwngchal sagih, belamchal nih, belamno a chal kum khat a upa demna bei sawmleli:

³³An thillat leh dâwn ding thillat chuh, a dân bang takin a tam dân bang zel un, bâwngchal a dingin belamchal a ding in, belamno a ding in ahi ding ahi.

³⁴Gitloh thawihna dingin kêlchal khat tawh hâlmang thillat te ni chenga kilân te, zie a An thillat leh dâwn ding thil latte chuh, simloh in ahi ding ahi.

³⁵Chun, a ni giet nin kikhawpna thiengtho na neih dinguh ahi a, na na sep ding uh ahi puoi.

³⁶LALPA dinga gimlim in meia thillat hâlmang thillat vang chuh na lat dinguh ahi; bâwngchal khat, belamchal khat, belamno achal kum khata upa, demna bei sagih:

³⁷Changbuong thillat leh dâwn ding thillat chuh, bâwngchal a dingin, belamchal a dingin, belamno a dingin, a dân bangtak in a tam dân bang zel un, ahi ding ahi.

³⁸Gitloh thawihna dingin kêlchal khat tawh; hâlmang thillat ni chenga kila’n leh, zie a dâwn ding thillat te chuh simloh in ahi ding ahi.

³⁹Ziehaw hi hâlmang thillat te, changbuong thillat te, dâwn ding thillat te, a hunbi nei zela LALPA kawma na lat ding dân teu chuh ahi. Zie chuh na thutiem teu sukbutitna ding leh, nawp thu a na thillat teu banga hih loh ding ahi.

⁴⁰Khutichun, Mosi chun LALPA thupiek bangtak chun thil chengcheng chuh Israel chate chuh a hilh ta a.