Read Gangte KISIMNA 35 Bible Online

KISIMNA 35 - Gangte bible

KISIMNA 35

¹Chun, Jerikoh zawna Jordan lui kai Moab phai achun LALPA’n Mosi chuh a hopih a,

²“Israel chate chuh thu pie’n la, a gam hawu achun Levi te chênna ding khuo siem sak u hen; chuleh gantatna ding in khuo kimvela gam âwng na piek dinguh ahi.

³Khuo te chuh a chênna dinguh hi’n tin, a kimvel haw chuh a bâwng hawu leh a gancha teu, a ganvulhteu tatna ding hi’n a.

⁴Gancha tatna ding, Levi te na piek ding u chuh khuo kulhbang bul apat a tawng sang khat hi vek ding ahi.

⁵Khawpi paw apat in teh un na tin uh, suohlam pang ah tawng sangnih, simlam pang ah tawng sangnih, tumlam pang ah tawng sangnih, mâllam pang ah tawng sangnih, khuo chuh a lai tak ah um ina. Zie hi amau a hi’n tin, a khawpiu a a gancha tatna mun dinguh hi’n a.

⁶Chuleh, Levi te na piek dinguh khuote chuh tuolthatte kisêlna dingin bitna khawpi gup huoi intin; ziehaw tihloh chun khuo sawmli leh nih na piek dinguh ahi.

⁷Chun, Levi te na piek dinguh khuo chengcheng chuh khuo sawmli leh giet hi’n tin, a ganchateu tatna ding mun tawh kigawm in.

⁸Chun, Israel te luoh ding khuo na piek dân ding u chuh, a nam tam deuh te chuh lien deuh pie’n na tin, a nam tawm deuh te chuh neu deuh pie’n na tin, mitin in a luoh uh gam letdan bang zela Levi te chênna ding khawpi na hawp sak ding ahi.”

⁹Chun, LALPA’n Mosi chuh a hopih a,

¹⁰Israel chate hopih inla, a kawm u ah, “Jordan lui na galkaih u a, Kanaan gam na lut tieng u leh,

¹¹khawpite lak achun bitna khawpi ding teldawk in la, tawngpalh a tuolthat khapalhte chuh zie taka chuh a taihlut theih na dingun,

¹²Zie khuo haw chuh phuba lak guo haw apat a na bitna dinguh hi’n tin, vaihawmte masanga thu tan sak dinga a din ma a tuolthatpa chuh a thih loh na dingin.

¹³Tichun, khawpi na minvawh teu chuh nang u dingin bitna khawpi gup hi’n a.

¹⁴Jordan gal ah khuo thum guot un na tin uh, Kanaan gam ah khawpi thum chuh bitna khawpite hin au.

¹⁵Zie khawpi gupte chuh Israel chate hileh gamdang mi hileh kihumbitna khawpi hi’n a. Kuole mi tawngpalh a mi thatte chuh a lak a khat pên pên ahin a taihlut dinguh ahi.

¹⁶“Amahvang chuh thik matchâk manga mi a khutnuh a, a thih chun tuolthat ahi a; thah thuk tei ding ahi.

¹⁷Chun, kuo’n le suong a mi a suka a thih chun tuolthat ahi a, tuolthat chuh suklup tei ding ahi.

¹⁸Chun, thih theihna matchâk thinga mi a zie pa a thih chun tuolthat a hi a, tuolthat chuh thah tei ding ahi.

¹⁹Thisan phuba lapa chun tuolthatpa chuh that ngâl ina: a muh phat phat leh a suklup ding ahi.

²⁰“Chun, kuo ahim in muhdah zieka mi khat a sawtpaih ahim, ana chânggu a seplum ahim

²¹kituok loh zieka a khuttum ahim a a sit a, a thih chun, a that pa chuh suklup tei tei ding ahi: tuolthat ahi a, thisan phulapa chun a muh phat phat leh a thah ding ahi.

²²“Himahleh, kimelmak ziek le hi sâm lo a sutphut ahim,

²³chânguk hi sam lo a, mi a um hi tih le helo a, a melma le hilo, a sietna ding hih guo le hilo a suong ahim a a seh a, a thih chun;

²⁴Kikhawmkhawmte chun zie vaihawmna dân bang hin mi thatpa leh thisan phubalapa kal thu chuh vaihawm sak un au.

²⁵Chun, kipunkhawmte chun tuolthatpa chuh thisan phubalapa apat chun hukdawk untin, kikhawmkhawmte chun a taihlutna, bitna khawpi achun umsak kit untin, sathau thiengtho kinuh thiempu lien a thih ma cheng chun zie tak a chuh a um ding ahi.

²⁶Himahleh, bangtik lai inle tuolthat chun a taihlutna bit na khawpi gamgi pawlama a chieh a.

²⁷Thisan phubalapa’n bitna khawpi pawlama a muh a phubalapa’n a thah chun a thisan achun mawh chang puo’n a,

²⁸Thiempu lien a thih ma cheng chuh mithatpa chuh bitna khawpi a chuh a um zing ding ahih ziekin; thiempu a thih nung le vang chuh tuolthatpa chuh a umna gama a chieh kit ding ahi.

²⁹Zie thil haw hi na suonteu chana na chênna tâk u ah na vaihawm dân ding u leh na zuih ding uh ahi.

³⁰“Kuo’n le mi a thah chun tuolthatpa chuh hetpihte kama thu pawt chun suklup ding ahi: himahleh, hetpih khat mai thu achu kuomah suklup loh ding ahi.

³¹Ziehaw bân achun, thihna kham a mawhchang tuolthat tatna sum chuh na lak ding ahi puoi, tuolthat chuh suklup teitei ding ahi zawi.

³²Chun, thiempu lien thih masanga bitna khawpi a kipat a a In lama a chieh kit theihna dingin zie bitna khawpi a tailutpa apat chun tatna na lak dinguh ahi puoi.

³³Khutichun na chênnau gam chuh subuok puo’n na tin uh: thisan chun gam chuh a sukbuok leh, thisan pawtna gam buok sawpna ding chun thisan suohpa thisan ngâllo chuh mat theih ahi puoi.

³⁴Na chênnau gam hi na sukbuok dinguh ahi puoi, a sung achun keile ka chêng a; kei LALPA chuh Israel chate lak ahin ka chêng ngâla, ti’n,” a ti a.