Read Gangte KISIMNA 4 Bible Online

KISIMNA 4 - Gangte bible

KISIMNA 4

¹Chun, LALPA’n Mosi leh Aron chuh a hopih a,

²Levi chate laka Kohath suonte, a suon a suon in, a inkuon kuon in,

³kum sawmthum apat a chunglam kum sawmnga tiengin kihona puon-In a sem thei ding zah chuh sim suok kêi un.

⁴Kihona puon-In, mun thiengtho pena Kohath chapate nasep ding chuh ziehi ahi;

⁵Giehbuk a chawn ding cheng u leh Aron leh a chapate chuh puon-In sung achun lut untin, Mun thiengtho puonzak chuh la thau untin, zie chun Thuthun bawm chuh a khuh dinguh ahi,

⁶Zie chuh ngalvang vun in khuh untin, zie chuh puon dum in khuh untin, a zawnna mawlh a tuoh dinguh ahi.

⁷Chun, etsakna chângthâk dawhkhâng chungah puon dum phah untin, zie tak achun gimlim kawihna kuonghaw, thikkhe haw, belhbu haw leh khawnhaw a sunthâk na ding a kawih dinguh ahi; zie tak a chângthâk sieh kikawih chuh a um zing ding ahi.

⁸Tichun, zie chuh puon sandup in khuh untin, a khuhna ngalvang vun in khuh untin uh, a zawnna mawlh a tuoh dinguh ahi.

⁹Chun, a salhvak ding thaumei leh a kawihna leh zie a dinga a mat dinguh thaumei haw, chaicheh haw, meivam kawihna haw, leh sathau bel chengcheng chuh puon dum a a khuh dinguh ahi.

¹⁰Ziehaw chu tawh a matchâk chengcheng a khuh na savun hawihtak a khuh in, a zawn na chunga a kawih dinguh ahi.

¹¹Chuleh sana maichâm chuh puon dum in khuh untin uh, a khuhna ngalvang vun khuh kit untin uh, a zawnna mawlh a tuoh dinguh ahi.

¹²Mun thiengtho a a matchâk uh, ûmlebel chengcheng chuh la vek un tin uh, puondum in chun untin, a khuhna ngalvang vun hawihtak chuh khuh untin uh, a zawnna chunga a kawih dinguh ahi.

¹³Chun, maichâm meivam chuh paih dawk untin uh, a chungah puon dum a phah dinguh ahi.

¹⁴A chung achun maichâm a nasepna matchâk chengcheng chuh kawih untin; a khuhna ngalvang vun khuh untin, a zawnna mawlh a tuoh dinguh ahi.

¹⁵Chun, Aron leh a chapate’n mun thiengtho matchâk chengcheng a khuh zawh u a, giehbuk chawn ding tieng leh; Kohath chapate chuh a zawn dingin hung kipan sek untin, himahleh thil thiengtho haw chuh a khawih dinguh ahi puoi, a khawih khâk u chun thi’n au, Zie chuh puon-In chawn ding chenga Kohath chapate mawhpuokna chuh ahi.

¹⁶Chun, thiempu Aron chapa Eleazar nasep ding chuh, det ding sathau haw, gimlimte, tan lo a changbuong thillat haw, sathau nuhchi haw, hobuk leh a sunga thil um chengcheng, mun thiengtho leh a matchâk haw et kimvel chuh ahi, ti’n.

¹⁷Chun, LALPA’n Mosi leh Aron a hopih a,

¹⁸“Kohath suonte inkuon chun thil thiengtho haw khawih mahleu thi lo a a um theihna dinguh hiti bang hin hih un:

¹⁹Aron leh a chapate chuh lut u henla, a sep ding u leh a mawhpuoknau chiet guotsak u hen.

²⁰Himahleh, thil thiengtho en dingin chawmcha kal le lut kiu hen, a lut u chun thi ding ahiu hi,” a ti a.

²¹Chun, LALPA’n Mosi a hopih a,

²²Gershon chapate le, a inkuon u leh a phung dungzui in sim vekin la;

²³kum sawmthum apat achunglam kum sawmnga mi tiengin kihona puon-In a sem thei ding cheng chuh sim suok in.

²⁴Gershon suonte nasep ding chuh puon-In van leh puok thawh lam ahi;

²⁵Hobuk khuhna sungnung leh pawnung haw, a chung khuh na ngalvang vun hawihtak haw, kihona puon-In lutna kawtkhak puonzak te,

²⁶Huongsung puonzak haw, huongsung kawtkhak puonzak haw, puon-In leh maichâm vela haw, a khauzang haw, a matchâk chengcheng uh puou untin, hih ding taphawt ahih ding uh ahi.

²⁷Mosi leh Aron chun, Gershon suonte chuh Aron leh a chapate’n sep ding a piek chengcheng u chuh a sem nau em tih a et dinguh ahi.

²⁸Ziehaw chuh kihona puon-In a Gershon suonte mawhpuokna chuh ahi; a sep ding hawu chuh thiempu Aron chapa Ithamar chun a guot sak ding ahi.

²⁹Chun, LALPA’n Mosi chuh, Merari chapate chuh a suon suon in, a inkuon kuon u a sim dingin a hilh a,

³⁰kum sawmthum apat achunglam, kum sawmnga tieng kihona puon-In nasem ding zah chuh na sim suok ding ahi.

³¹A nasepnau a a mawhpuokna ding u chuh ziehaw hi ahi; hobuk guhpi haw, a bâng guh haw, a khuom haw, a kingakna geikuok haw,

³²A huongsung kimvel khuom haw, a kingakna geikuok haw, a kilhdenna haw, a matchâk chengcheng leh a matchâk dang puok dingte chuh amin na zik sak ding ahi.

³³Ziehaw hi Merari suonte’n puon-In nasepna a a mawhpuoknau chuh ahi a, Thiempu Aron chapa Ithamar chun a guot sak ding ahi.

³⁴Tichun Mosi leh Aron leh kikhawm khawm haw laka lawiupate chun Kohath chapate chuh a suon suon in, a inkuon kuon un,

³⁵Kikhawp khawmna puon-In a nasem ding zah chuh kum sawmthum apat a chunglam kum sawmnga tieng a sim u a.

³⁶Zie a inkuon dungzui a a sim u chuh sangnih leh zasagih leh sawmnga ahiu hi.

³⁷Ziehaw chuh ahiu hi, kihona puon-In a na sem sek Kohath suon a sim uh, Mosi kawma LALPA’n thu a piek banga Mosi leh Aron in a sim hawu chuh.

³⁸Chun, Gershon chapate, kihona puon-In a na sema zenviel ding zah chuh a suon suon in,

³⁹a inkuon kuon in, kum sawmthum apat achunglam kum sawmnga tiengin sim ahiu a;

⁴⁰Zie a suon-asuona, a Inkuon a Inkuon a a sim hawu chuh sangnih leh zagup leh sawmthum ahiu hi.

⁴¹Ziehaw chuh ahiu hi, Gershon chapate suon haw, kihona puon-In a nasem chengcheng, LALPA thupiek banga Mosi leh Aron in a sim hawu chuh.

⁴²Chun, Merari chapate, kihona puon-In a na sem ding leh zenviel ding zah chuh.

⁴³a suon a suon in, a inkuon kuon in, kum sawmthum apat achunglam kum sawmnga tiengin sim a hiua,

⁴⁴Zie a suon suona, a inkuon-kuon a a sim hawu chuh sangthum leh zanih ahiu hi.

⁴⁵Ziehaw chuh ahiu hi, Merari chapate suon haw a sim uh, Mosi kawma LALPA thupiek banga Mosi leh Aron in a sim hawu chuh.

⁴⁶Levi te, nasem ding leh kihona puon-In a puok chi puo ding zah a suon suon in, a inkuon kuon in,

⁴⁷kum sawmthum apat achunglam kum sawmnga tiengin Mosi leh Aron leh Israel lawiupa haw chun a sim ui;

⁴⁸zie a sim hawu chuh sanggiet leh zanga leh sawmgiet ahiu hi.

⁴⁹Mosi kawma LALPA’n thu a piek bangin mitin a sep ding chiet u leh a chanvo dinguh bang zelin sim ahiu a, khutibangmah chun LALPA’n Mosi thu a piek bangin sim ahiu hi.