Read Gangte KISIMNA 6 Bible Online

KISIMNA 6 - Gangte bible

KISIMNA 6

¹Chun, LALPA’n Mosi a hopih a,

²Israel chate kawma zie thu hilhna te hih pie dingin a hilh a, Mi kuole pasal ahim, numei ahim, Nazarit mi hi dinga thutiem bîk a neih a, LALPA kawma a kipiek thientho lai chun,

³uain leh zu a dâwn loh ding ahi, uain thuk leh zu thuk le, grep apat a kisiem himhim le a dâwn loh ding ahi a, grep gah leh a kiphogaw le a nek loh ding ahi.

⁴A kisukthientho sung cheng chun, grep gui apat in a sung le a hawk le a nek loh ding ahi.

⁵Kikawihchuomna thu a tiem sung chun, a sam a met loh ding ahi a, a tan loh ding ahi. LALPA kawma a kipiekna thutiem chun a kân ahi a, a sam a hawih sau ding ahi.

⁶LALPA dinga a kikawihchuom sung cheng chun mithi luong a naih ding ahi puoi.

⁷A pate, a nute, a suohpihte, a suohpihnute ahim thih thu ah, a kisukbuok ding ahi puoi, Pathien a dinga a kikawihchuomna chun a kân ziekin.

⁸A kikawihchuom sung cheng chuh LALPA dinga kikawihchuom ahi.

⁹A kawmah mi hung thi phut in, a kikawihchuomna sam hawih chuh hun hihbuok tawbang leh, a kithiensak ni ani sagih nin, a sam met intin thiengtho in a.

¹⁰Ni giet ni’n LALPA umna puon-In kawtkhaka thiempu kawmah vakhu tuokkhat ahim, vapalno tuokkhat ahim a hun chawih ding ahi.

¹¹Thiempu chun khat chuh gitloh thawihna dingin lân intin, khat chuh hâlmang thil lat in, mithi a sukkhakna achun sukthienna siem sak ina; zie ni mah chun a luchang chuh a hih thientho ding ahi.

¹²Nazarit mi hidinga a hun chuh LALPA kawma a piek kit ding ahi. A sam sukbuok a a um tâk ziekin, a hun masa haw khah sim sak hi ta puo’n a. Thupha chawihna thil lat dinga belamno kum khata upa a hun chawih ding ahi.

¹³Chun, Nazarit mi hihna dinga thutiem chuh a beihtak leh kihona puon-In kawtkhaka puih ding ahi a,

¹⁴Chun, LALPA dinga thillat in belamno achal, kum khata upa, demna bei hâlmang thillat dingin khat, belamnu, kum khat a upa demna bei gitloh thawihna thillat dingin; LALPA kawma a piek ding ahi.

¹⁵Chawl sawhloh chângthâk leh changbuong nêl tak, sathau tawh kihel, chângthâk kan puok leh sathau tawh kihel, chângthâk pan bawm khat chuh, a an thillat ding u leh dâwn ding thillat bana a hih dinguh ahi.

¹⁶Thiempu’n ziehaw chuh LALPA masang ah lân intin, gitloh thawihna leh, hâlmang kithawihna chuh lân ina.

¹⁷Chun, belamchal chuh bawma chângthâk chawl sawhloh haw chuh tawh chamna kithawihna ding in LALPA kawmah lân intin; thiempu chun changbuong thillat leh dâwn ding thillat haw chuh lân khawm ina.

¹⁸Nazarit mi chun kihona puon-In kawtkhak achun a kikawihchuomna sam chuh met intin, kichamna thillat kihalna mei chung achun la’n in tin chamna kithawihna thillat nuoia mei achun a hâl ding ahi.

¹⁹Chun, thiempu chun belamchal dâk kihuon minsa leh, bawma chawl sawhloh chângthâk khat leh chawl sawhloh chângthâk pêk pan khat la’n tin, Nazarit mi chun a kikawihchuomna sam a met zawh tieng leh chawih sak ina:

²⁰Chun, thiempu chun pei thillat in LALPA ma ah a pei ding ahi; ziehi thiempu chanvo hi’n a. a kipei âwm leh a mal tawh; zie zawh chun Nazarit chun uain dâwn thei ta’n a.

²¹Ziehaw hi Nazarit thutiem dân leh LALPA ma a a thillat dân u chuh ahi, himahleh Nazarit mi chun a kitiemna khela, thillat a piek nawp chun, a thu tiemsa chuh a sukbutit phawt ding ahi.

²²Chun, LALPA’n Mosi a hopih a,

²³Aron leh a chapate kawmah, Hiti ahi Israel chate na vangsak ding ahi, a kawm u ah,

²⁴LALPA’n hun vangsak in hun veng zing hen,

²⁵LALPA’n A mel na chung ah vak sak henla, hun lungsiet zing hen,

²⁶LALPA’n deihchuom takin hun en henla, Thamuonna hun pie hen, ti’n gen ina.

²⁷Khutichun, “Israel mipite chun ka min chuh puu intin, vangsak ing ka,” a ti a.