Read Gangte KISIMNA 8 Bible Online

KISIMNA 8 - Gangte bible

KISIMNA 8

¹Chun, LALPA’n Mosi a hopih a,

²“Aron hopih inla a kawmah, Thaumei haw na hâl tak leh thaumei sagih te chun khuoilu thaumei kawihna malam chuh a salh ding ahi, ti’n,” a ti a.

³Chun, Aron chun khutibang chun a hih a, LALPA’n Mosi thu a piek bang chun thaumei kawihna malam a chun thaumei haw chuh a de a.

⁴Zie thaumei kawihna kisiem dân chuh, sana kisêk thawh ahi a; a kung bul apat a a mawng chana kisêk thawh ahi, LALPA’n a lim Mosi a etsak bang tak khan thaumei kawihna chuh a siem a.

⁵Chun, LALPA’n Mosi a hopih a,

⁶“Levi te chuh Israel chate lak a pat in kawihchuom inla, suthiengtho in.

⁷A mau haw suthiengtho dingin hiti bang ahi na hih ding ahi, a chung u ah sawpthienna tui theh inla, a taksa pumpiu chuh samchem in met thieng sak inla, a puon haw sawp sak inla, kisuthiengtho u hen.

⁸Chun, bâwngchal tuoi khat tawh changbuong thillat, sathau tawh kihel, changbuong nêl tak tawh lâksak inla, gitloh thawihna dingin bâwngchal tuoi dang khat le na kaih ding ahi.

⁹Levi te haw chuh kihona puon-In masang achun pui inla, Israel suona mipi chengcheng sapkhawm sak inla;

¹⁰Chun, Levi te chuh LALPA kawmah la’n untin, Israel mipite chun Levi te lu chung ah a khut uh ngau intin,

¹¹Tichun, Aron chun, Levi te chuh, Israel chate’n ka kawma pei thillat in LALPA kawmah la’n intin, tichun, ka na sem thei ta’n au.

¹²Chuleh, Levi te haw chun bâwngchal lu chung haw achun a khut uh ngau un tin uh; khat chuh gitloh thawihna ding in, khat chuh hâlmang thillat in, Levi te sukthienthona kithawihna a hih ding ahi.

¹³“Chun, Levi te chuh Aron leh a chapate ma ah um sak in na tin, LALPA dingin pei thillat a na lat ding ahi.

¹⁴Khutibang chun Levi te haw chuh Israel chate lak apat chun kawihchuom in na tin, tichun Levi te haw chuh keia hi’n au.

¹⁵Zie tawbanga, Levi te chuh na sukthien a, na kawihchuom zawh tieng chuleh, kihona puon-In a nasem dingin lut untin, chun, nangin amau haw chuh hih thiengtho in na tin, pei thillat a na lat ding ahi.

¹⁶Israel suonte lak apat keia ding chuom a guot ahi ngâl u a: sûl hawng taphawt, cha lutîl chengcheng thasang in keia chuom in ka nei ta ngâla, kei a ding chauh a a um dinguh ahi.

¹⁷Israel suonte laka cha lutîl chengcheng chuh kei a ahi him u a; mihing leh ganchate tawh; Aigupta gama cha lutîl chengcheng ka thah lai khan, ka chanvo dinga ka guot ahi tai.

¹⁸Tichun Israel chate laka cha lutîl chengcheng thasang in Levi te haw hi ka neih ahi tai.

¹⁹Tia chuh, Israel chate thasanga kihona puon-In a na sem ding leh, Israel chate’n Mun thiengtho a hun naih uh lele a lak u a hipi alen lohna dingin, a vengbit dingin Israel chate lak apat in Levi te haw hi Aron leh a chapa te ka piek ahi,” ti’n.

²⁰Khutibang chun Mosi leh Aron leh Israel chate kikhawm khawm haw chengcheng chun Levi te haw chungah a hih u a. Levi te chungchâng thu a LALPA’n Mosi thu a piek bang tak chun, a chungu ah Israel chate chun a hih u a.

²¹Tichun Levi te haw chuh gitlohna lak ah a kisuthieng u a, a puonhawu a sawp u a; Aron in LALPA kawmah pei thillat in a lân a. Amau haw sukthientho na dingin Aron in kithawihna a siem sak a.

²²Zie zawh chun, Levi te chuh Aron leh a chapate nuoia nasem ding chun kihona puon-In sung ah a lut u a, LALPA’n Levi te chungchâng thu a Mosi kawma hih dinga thu a piek bang chun a hih tau a.

²³Chun, LALPA’n Mosi a hopih a,

²⁴“Levi te chanvo chuh ziehi ahi: kum sawmnih leh kum nga apat a chunglam chun kihona puon-In ah thiempu na sem untin:

²⁵Kum sawmnga mi haw chun nasepna na chuh chawlhsan untin, nasem ta puo’n au.

²⁶Amahvang chuh, kihona puon-In etkawl thu achun a suohpihteu kithuohpih untin, na chuh vang sem ta puo’n au. Zie tawbang hin Levi te haw chuh a nasep dinguh na guonsak ding ahi,” ti’n.