Read Gangte KISIMNA 9 Bible Online

KISIMNA 9 - Gangte bible

KISIMNA 9

¹Chun, Aigupta gam apat a a hung pawt uh apat kum nihna, tha khatna achun, Sinai thalek achun LALPA’n Mosi a hopih a,

²“Israel chate chun Chiehkân Kut chuh a hunbi zel ah nei u hen.

³A hunbi dungzui in, tu tha ni sawmleli ni, khawmiel zula na mat pat dinguh ahi: zie a hih dinga kiguot guol chengcheng leh dân guol zel chun na neih dinguh ahi,” ti’n.

⁴Tichun, Mosi chun Israel chate chuh Chiehkân Kut nei dingin a hilh a.

⁵Khutichun, tha khatna, ni sawmleli mielzul in Sinai thalek achun Chiehkân Kut chuh a mang pan tau a; LALPA’n Mosi kawma thu a piek guol chun Israel chate chun a hih u a.

⁶Himahleh, kuote ahim, mithi luong khawih zieka thienglo a na um u a, Chiehkân Kut ah a tel thei ta puou hi; zie ni mah chun Mosi leh Aron kawm achun a chieh uh a;

⁷A kawm u ah, “Mithi luong khawih ziekin ka thieng ta puou a; bang ziekin ahim Israel chate lak a a hun zela LALPA kawma thillat ka piek dinguh nei khap?” a ti a.

⁸Chun, Mosi’n a kawm u ah, “A na khawngai tadih un, na chungchâng thuu ahin LALPA’n bangtia thu a hun piek ding va he tadih ing ka,” a ti a.

⁹Chun, LALPA’n Mosi a hopih a,

¹⁰Israel chate kawma zie thu hi gen dingin a hilh a, “Na lak u a mi le, na suonteu laka mi hitaleh mithi luong zieka thienglo ahim, a na zinmang ahim, a na um khâk u chun LALPA dinga Chiehkân Kut chuh a neih tho dinguh ahi;

¹¹Tha nihna, ni sawmlenih ni, mielzul a a neih dinguh ahi, chângthâk chawl sawhloh hampa kha tawh a nek dinguh ahi a;

¹²A zing tienga dingin bangmah a sit dinguh ahi puoh a, a guh khat chale a sukbawt ding uh ahi puoi: Chiehkân Kut a hih dingdan kiguot dungzuia ahih ding uh ahi.

¹³Amahvang chuh thiengtho ngâl, zinmangna nei le hilo a, Chiehkân Kut a tello chuh ka mipite lak apat satthak hi’n au; a hunbi a LALPA kawma thillat a lat loh ziekin amah chun a gitloh mawh puo’n a.

¹⁴“Chun, Gamdang mi, na kawm u a umte’n LALPA dinga Chiehkân Kut na a tel a nawp u chun, Chiehkân Kut a hih ding kiguot leh, a dân bangin a hih dinguh ahi, zie gama mite leh; gamdang mi haw dingin dân kibang na neih dinguh ahi, ti’n gen in,” a ti a.

¹⁵Khutichun, hobuk tundawk ahih ni chun, Thuthun bawm kawihna hobuk chuh meipi’n a hun khuh a, chun, nitâk akipat zingkal tiengin hobuk chung achun meikuong tawbang a kilang in a um a;

¹⁶Khutibang chun a um zinga; meipi chun a khuh zinga, zan leh meikuong tawbang in a kilang a.

¹⁷Kihona puon-In chuh meipi’n a kithiel dawk san cheng leh, Israel chate chuh chieh dingin a kisa sek u a; chun, meipi a dinna mun cheng achun Israel chate chun giehmun a guonggalh sek uh a.

¹⁸LALPA thupiek in Israel chate chuh a chieh zel u a, LALPA thupiek mah in giehmun a guonggalh sek ui. Puon-In chunga meipi a um sung cheng chuh giehmun achun a um zing sek uh ahi.

¹⁹Chun, hobuk chunga meipi chuh sawttak a um tieng, Israel chate chun LALPA thu a zawp uh a, a kichawn puou hi,

²⁰Abang kuom leh meipi chuh hobuk chungah chawmcha chauh a um sek a, tichun, LALPA thupiek bangin a châwl u a, LALPA thupiek bangin a chieh sek ui.

²¹Chun, abang kuom leh meipi chuh nitâk lam apat in a zingkal tieng in a um sek a, zingkala meipi a kilapsan tieng leh a chieh sek uh a, ni khat mai ahim, zan khat mai ahim, meipi chuh a kilapsan chun a chieh zel sek ui.

²²Hobuk chunga meipi chuh ni nih ahim, tha khat ahim, kum khat ahim le a um a, zie taka chuh a um zing chun, Israel chate chun giehmun a guonggalh sek uh a, a chieh chawn puou hi; himahleh a kilapsan le vang chuh a chieh sek ui.

²³Khutichun, LALPA thupiek guolin giehbuk chuh a guonggalh sek u a, LALPA thupiek in a chieh sek u a: chun, Mosi manga LALPA thupiek chuh a zawp sek ui.