Read Gangte MIKA 2 Bible Online

MIKA 2 - Gangte bible

MIKA 2

¹A zâlkhun chunga nunsietna suongtuohte leh, thil phalo ngaihtuoh dawkte chuh a chunguh a gik hi, zingkal khuo a hung vak vak leh zie chuh a bawl pai zieng u a. amau haw khut thilhih theihna a um a hih ziekin.

²Mi lo haw a awtchau a, a lâksak u a: In haw a awtchau a, a la mang zieng u a, mi leh a In teu leh, a go luoh ding teu natieng in a sugimthei uh ahi.

³Zieziekchun, LALPA’n hiti hin a tii: Ngaitie! zie inkuon chunga hin thil phalo ka ngaihtuoh ahi, zie apat chun suokcha puo’n na tin uh, uong takin le chieh diek ta puo’n lau, hun phalo hi ding ahi ngâl a.

⁴Zie tawbang hun chuh a hungtun tieng leh, na chanchin u chuh mite’n sietna tehkalna’n mang un tin uh; na thil tuok chungchâng thuu achun zie la thasiet-um tak hi hun sa’nau: “Sukchimit in I um tau a! LALPA’n I gam uh lamang in, Sala ei mante kawmah a pie tai!” ti’n.

⁵Tichun, LALPA mipite kikhawm haw lak achun phunsan a khau a hun teh sak ding kuomah nei puon la.

⁶“Ka kawm u ah thu gen ki’n, himahleh, thu a gen u a; ziehaw chanchin chu gen himhim ki’n! Pathien in ei sumuolpho lo ding ahi ngâla!

⁷Aw Jakob inkawte haw, zie hih gena um ding ahim? LALPA thagau chuh a thuokhat puoh a ahim? Zie tawbang chun thil a hih taktak em? Thil dik hihte kawma chun nunnem takin thu a gen puoh a ahim?” ti’n.

⁸Himahlele, LALPA chun a dâwng a, “Ka mite chuh melma bangin na do u a, kido nuom lo a, In ah gâlmuong takin um ing ka tite apat in, a silhlechenteu puonâk chuolteu na hâwkthak sak u a.

⁹Ka mi, numeite chuh, a in nuom tak uh apat chun na nawhdawk u a, a chateu, ka vangsaknate chuh na sukmangthai sak uh a.

¹⁰Tho un la, chieh mang un! zie tak ahin bitna a um diek puoi. Na gitlohna ziekun, zie mun hi sietna lauh-um tak tunna mun in na siem tau hi!

¹¹‘Uain leh zu luong ina,’ ti a zuou gen thiemgau vakvielte chuh zie mite thiemgau hi dinga kilawm phet ahiu hi.

¹²“Himahleh, aw Jakob na mite chuh a bawn un hun puikhawm kit ding ka hi. Belam hawn, a huong zuon bangin hun puikhawm ing ka. Ham hing laka belam a dima um bang mai in na gam u chuh mipi tamtak in sudim kit ing ka,” ti’n.

¹³A kawt hawng pa chun amau haw dingin lampi hawn sak intin, zie chun lut hut hut un au. Khawpi kawt chuh hihsieu in tin, nuom takin lut un au! A lengpau chuh a masang u ah a chieh a, LALPA’n a mau pui ding ahi a, amah chuh a kingaknau hiding ahi.