Read Gangte MIKA 4 Bible Online

MIKA 4 - Gangte bible

MIKA 4

¹Himahlele, ni nunung haw achun hiti hi hi’n tin; LALPA In umna tâng chuh tâng lien chung haw achun sukdet in um intin, tâng neute chung haw achun le chawihsân in um ina: zie taka chun namtin chengte chuh chieh lut hut hut un au.

²Tichun, nam tamtak chuh hung un tin, “Hung un la, LALPA tângah, Jakob Pathien In achun chieh to hitiu; tichun, ama’n a lampi chanchinte chuh ei sinsak in tin, a lampi haw achun chieh hitiu,” ti’n au. Zion apat chun dân hung pawt in tin, chun, LALPA thu chuh Jerusalem apat hung pawt ding ahi.

³Chun, amah chun namtin te kikal a thubuoi chuh khen intin, gamla taka namte leh nai taka te kal thu le. Chun, a chemzâmteu chuh lei lehna mawngzumte’n sek un tin, a tiengchateu chuh theikung vathahna chem dingin sek un au. Nam dangin nam dang kidopih ta puou un tin, kido dân le zil diek ta puo’n au.

⁴Mitin chuh amau grep nuoi hawu leh a theipi kung nuoi hawu achun thamuong takin cheng untin; kuoma’n sulau puo’n au: Bangkim hihthei LALPA kam chun a gen ta ngâl a.

⁵Namtin te chun amau pathien chiet ho in a thu zawp un tin uh, Himahleh Kei hawn vang, LALPA ka Pathien chuh ho in, a thu zawp ing kau.

⁶Zie ni chuleh, kêngbâite chuh puikhawm ing ka ting, nawhdawk a umte leh ka sukgimtheih te chuh samkhawm ding ka hi, LALPA’n a tii:

⁷Tichun, kêngbâi chuh suohchak sak ing ka ting, gamla taka nawhmang a umte chuh nam lopitak a siem ding ka hi.

⁸Aw nang Zion chanu kulh dettak, gan guolte venna In sang, na kawma hung ding ahi; masang laia vaihawmna masa chuh hungkit ding ahi. Jerusalem chanu lal chuh!

⁹Bang zieka zie bangpi a ngeih a chuh kiko dawk na him? Bang zieka numei nauhanat banga thuokgim na him? Leng na neih loh ziek leh, na lemguotte a thi zo tau a ahim?

¹⁰Aw Zion chanu, numei nauhanat guolin mau un la, kitel viel un! Tuhin khawpi chuh pawtsan a, gamtalai-laka cheng ding na hi ta ngâl u a! Babulon lam ah chieh un na tin uh, himahleh, na melmateu khut apat in LALPA’n hun hukdawk ina.

¹¹Tuhin, nam tamtak a hun do dingin a kisam khawm u a, “Sukbuok in um hen la, I mit un Zion chunga sietna tung chuh mu hen” a tiu a.

¹²Himahleh, zie namte chun LALPA lungthim a he hiel puou a, buh phuol a buh chil dinga lâkkhâwma um guola hung kikhawm ahiu ui tih a he hiel puou ui!

¹³Aw Zion chanu tho in la, chil in, na ki chuh thik bangin siem ing ka ting, na kengbawm haw chuh sumeng guolin siem ding ka hi ngâla: chun, chi tamtak te chuh khen nêl in na tin, pawngbawlna zieka hauhsakna a neih teu cheng chuh khawvel pumpi LALPA a ding in lân thiengtho in la.