Read Gangte HABAKKUK 1 Bible Online

HABAKKUK 1 - Gangte bible

HABAKKUK 1

¹Thiemgau Habakkuk in puokgik a muh chuh:

²Aw LALPA, bang chan ahim, nei ngaihthak ma leh, thagum suoh te apat a nei hukdawk masanga panpihna ngên a na kawma ka kiko ding?

³Bang zieka zie tawbang nunsietna hi nei muh sak ahi ta’m? Bangti’n a, zie banga thil diklo hihte hi na et zing theih ding? Sietna leh thagum a kibawlna chuh ka kimvel ah a um a, kisuolna leh kinakna chuh mun chengah a um ta a!

⁴Zieziekchun, dân chuh ngaihkhawk ahi ta puoh a, mattakloh a suok tai! Thudik a vaihawmna a um ta puoh a. Mi gilote chun mi diktat te chan changin, thu dik chuh heikawi ahi tai!

⁵Ziephet chun LALPA’n a mipite kawmah, “Namte chuh en un la, nasa takin maksau in! Na damsung u hin thil khat ka bawl hi zie chuh mi’n hun hilh mahleu le taksang hiel puo’n lau.

⁶Nam lauh-um tak leh, um hiet hiet theilo, Babulon te chuh hun chawktho ka ting, tichun, gamdangte la dingin khawvel dâp suok hielin hung kizawt un au!

⁷Amau chuh lauh-um tak leh tizat-um tak ahiu a, chapo takin, amau leh amau chuh thudik leh Dan kiti zieng un au.

⁸“A sakawlteu chuh keite sangin a chanpha zaw a, ngei gilkiel sangin a lauh-um zawi. A sakawl chung chuong miteu chuh chapo takin a kikhawh viel zawt zawt u a, amau chuh gam gamla tak apat a hung ahiu a; sakawl tinte chun tuol a khên a, Mupi sa nek ding zuona leng bang mai in a bawh in a bawhsuk thawh u a.

⁹“A sepaih teu chuh thagum suoh dingin a hung kipan u a, a chiehna lam cheng u a mite chuh a tiza sek u a. A salmatteu chuh pîlnel bang hiela tam ahiu hi.

¹⁰A lengteu chuh a musit u a, miliente chuh a nuihsan u a. Amau chun kulhpi haw chuh bangmah a sa puou a, a lâkna dingin lei a sep pawng u a, tichun, a la zel u a.

¹¹Tichun, huihpi guolin a mût u a, a bei pai u a: zie mite chun, a hâtnau chuh pathien a a neih ziek un, a sukhiel u a mawhchang in um un au!”

¹²Aw LALPA ka Pathien, ka mi Thiengtho, Nang chuh kumsawt kumsawt a ka Pathien hilo na him? Na thi ngei puoh a, Aw LALPA amau chuh nangin vaihawm dingin na guot a. Aw nang ka Suongpi, amau haw hih nangin thunun na dinga na tundawk ahiu hi.

¹³Na mit chuh thil gilo etna dingin a thiengtho taluo a, mi gilote thilhih chuh na en thei puoh ngâl a! Zie migilo thephatte chuh bangti’n a na thuok theih ding? Zieziekchun, amau haw sanga phazawte a sukmangthai lai u a chuh bang zieka thip hiet hiet na him?

¹⁴Mihing hi tuipi ngate leh ganhing, a chung u a vaihawm ding nei diek lo te guola na siem ahi.

¹⁵Ngakuoi in a khaidawk vek u a, amau chuh lên in a mana; a lenvai chun a chûnkhawm a: a matteu chunga chun a kipâk mah mah u a!

¹⁶A lenteu chun thilpha pie a ngaiin, kithawihnate a lân u a, ho le a ho hiel tau ahi!

¹⁷Zieziekchun, a chemzâmteu mang in, lungsietna neilo hielin namte chuh a sumangthai zing ding um?