Read Gangte ZEPHANIA 3 Bible Online

ZEPHANIA 3 - Gangte bible

ZEPHANIA 3

¹Kipawngnekna leh kiphin hat khawpi, mipite diklo taka bawl sek, khawpi chuh a chung a gik hi!

²LALPA thu a ngaitha nuom puoh a, a thamuonna a deih diek puou a. LALPA chuh a taksang puou a, a Pathien lam a naih puou hi.

³A milienteu chuh sakeibaknei kitum bangin a um u a, a vaihawmteu chuh ngei gilkiel tak, duh-âm tak, zingkal tienga le a saguh peh taihsan nuom lo bang ahiu hi.

⁴A thiemgauteu chuh mi ngaihsam leh, mi ginumlo ahiu a, a thiemputeu mun thiengtho chuh a subuok u a; Pathien dân chuh amau haw phatchuomna dingin, aleh-amak in a sang kâwi viel u a.

⁵Himahleh, a sunga LALPA chuh a diktat a, thil diklo hih puo’n tin, Zingkal chengin a vaihawmna a hih lang a, a supel kha ngei puoh a; Khutisa chun le, a sunga migilote chun zahchâkna himhim a he puou hi.

⁶“Namte chuh ka sumang vek a, a khawpiteu ka sumangthai vek a, a kulh bângteu leh, a gâlven insangteu chuh suksietsa’n ka taihsan a. Khawpi chuh nutsieh in a um ta a; khawlai a chun kuomah a um ta puoh a, khat chale a um ta puou hi!

⁷Tichun, ka mite chun ei limbawl tau un tin, ka thununna thute chuh pawm tau un tin; ka thuhilhna thute chuh hengilh ta puo’n au,” ka ti a. Himahleh, a umdan ngêi mah un a hung um kit pai tau hi!

⁸“Khawngai inla, namte mawh ka chansakna ni tieng chuh ngak hâm hâm in. Namte leh lenggamte chuh sam khawm a, ka lungnatna thilhih theihna hetsak dingin ka lungthim ka supuk ta a. Ka lungnatna mei chun khawvel pumpi hi katum vek ding ahi ngâl a.

⁹“Zie ni chuleh mite chuh pau thiengtho pie’ng ka ting, lungthim munkhat pu a, LALPA min a sap uh a, a na a sep vek theih na dingun.

¹⁰Ethiopia gam, gamla taka, ka mi dalh zâk te chun le, Kei kawmah thilpiek hun chawi un au.

¹¹Zie phat chuleh, nang haw chuh, ka chunga na kiphin na ziek u a na zahchâknau chuh um ta puo’n a. Mi chapo leh kiletsak taphawt chuh ladawk ka ting; Ka tâng thiengtho ahin ka chungah kiphin ngei kit ta puo’n lau.

¹²Na sung apat in mi gimtheite leh sukgimtheih thuokte chuh hâwi ing ka ting, LALPA ni achun kihumbitna hawl un au.

¹³Israel mi, a suokcha te chun, kuomah diklo takin bawl puou un tin; lepchieh gen ta puou un tin, mi thep le guo diek ta puo’n au. Kiphathei tak leh bit takin um un tin; kuoma’n sulau ta puo’n au” ti’n.

¹⁴Aw Zion chanu lasa’n, Aw Israel kipâk a lasa’n kiko un! Aw Jerusalem chanu, na lungthim pumpi a kipâk in, lawp in!

¹⁵LALPA’n na chungchâng vaihawmna chuh a lamang ta a; na melmate a paih dawk vek ta ngâl a. LALPA, Israel te Leng chuh na kawmah a um a, lauh ding himhim a um ta puoi!

¹⁶Zie ni chuleh Jerusalem kawmah, “Lau ki’n, Aw Zion! na khut le zawi tha diek kihe’n!

¹⁷LALPA na Pathien chun a hun umpih a; va thilhih theihna chun zawhna a hun piei. LALPA chuh na chungah kipâk intin, a lungsietna chun hinna thak hun pie’n a.

¹⁸Na mite kikhawpna a tel phalote chuh kaikhawm ing ka, nang zieka gensietna thuok te chuh!

¹⁹Ngaiin, zie ni chuleh a hun sugimtheite chuh gawt ka ting; kêngbâite chuh hukdawk ka ting, saltângte chuh puikit ing ka. Chun, lei chung cheng chenga na zahhuoi nau chuh pahchakna leh minthanna suoh sak ing ka!

²⁰Zie tieng chuleh hun puilut ing ka ting, hun puikhawm ing ka; Na muh ngêi u a saltanna apat ka hun puihkhawm kit tieng leh, leichung a mi cheng cheng te lak ah minthanna leh pahchakna hun siem sak ding ka hi ngâla,” LALPA’n a tii.