Read Gangte HAGGAI 1 Bible Online

HAGGAI 1 - Gangte bible

HAGGAI 1

¹Persia leng Darius lal kum nihna, tha gupna, zie tha ni masapen achun Shealtiel chapa Zerubabel, Juda gam vaihawmpa leh, Jehozadak chapa thiempu lienpen Joshua kawmah thiemgau Haggai mang in LALPA thu a hungtung a.

²Sepaihte LALPA chun hiti hin a tii, “Zie mipite hin tuhi Ho-In sak hun ahi nai puoi,” a tiu hi ti’n.

³Chun, thiemgau Haggai apat in LALPA thu chuh a hungtung a:

⁴“Ka mipite haw, Ka Ho-In sie taka um zing ngâla bang zieka nang haw In hawih tak taka cheng zing na hiu hi?

⁵Tuhin chu vang Sepaihte LALPA chun hiti hin a tii. Na lampi teu chuh guntak in ngaihtuoh un?

⁶Buh tampi na chîng u a, himahleh tawmcha na ât tau a. Na neu a la, na tai diek puou a; na dâwn u a, na khawp diek puou a; na silh u a la, lum na sa diek puou a, sum lawhte chun le dip tawvang a kawih ding mai a a lawh uh ahi.

⁷Sepaihte LALPA chun hiti hin a tii: Na lampi teu chuh guntak in ngaihtuoh un.

⁸Tuhin, tângah chieh to unla, thing va lau inla, Ho-In chuh sau in; tichun na chung u ah kipâk ing ka ting, chun, suklopi a um ding ka hi,LALPA’n a tii.

⁹“Tamtak ât dawk na kinem u a, himahleh, tawmcha a hung hi tai. Na buhteu chuh ina na hun tut tieng u leh ka na mût mang sek ahi. Bang zieka zie chuh hungtung ahim tih hi Sepaihte LALPA thugen ahi. Nang haw, nangmau intum chietah na buoi u a, ka Ho-In chuh sie taka a um zing ziek ahi.

¹⁰Zieziekchun, van in dâitui kie ding a hun khak sak a, lei chun le a gah a hun hen sak na hiu hi.

¹¹Lei chung leh tâng chungte, buh haw chung leh uain chungte, thau chung leh lei in gah ahun suohte chung leh, mihingte chunga leh na khut nasep hawu chungah khuo ka hih khal ahi,” ti’n.

¹²Tichun, Shealtiel chapa Zerubabel leh Jehozadak chapa thiempu lien Joshua leh Babulon apat a saltâng hung vaikit te chun LALPA a Pathien u chuh a lau u a, LALPA sawlchak Haggai in hih dinga thu a hilh bang chun a hih u a, a thugen chuh a zawp tau a.

¹³Tichun, mite kawma LALPA mi sawl Haggai chun LALPA thugen chuh mipite kawmah a gen ta a, “Na kawm u ah ka um hi; LALPA chun a tii,” ti’n.

¹⁴LALPA chun Shealtiel chapa, Juda gam pawpa Jerubabel lunggil leh Jehozadak chapa, thiempu lienpen Joshua leh mi, saltâng hung vaikitte lunggil chuh a chawktho a; tichun a hung u a, Sepaihte LALPA a Pathien uh In a chun na a sem tau a;

¹⁵Zie chuh leng Darius vaihawm kum nihna, a tha gupna, zie tha ni sawmnih leh ni lina chuh ahi.