Read Gangte ZEKARIA 1 Bible Online

ZEKARIA 1 - Gangte bible

ZEKARIA 1

¹Leng Daria vaihawm, kum nihna, tha gietna achun Iddo chapa Berekiah chapa thiemgau Zekaria kawm achun LALPA’n zie thu hi a pie a:

²LALPA, Bangkim hihtheipa chun Zekaria chuh, mipite kawma zie thu gen ding hin a sawl a: “Kei, LALPA hi, nanguh hun suonte chungah ka lungkim lo mah mah a,

³Himahleh, tuhin, na kawm u ah, ‘Ka kawmah hung vaikit un la, tichun, Kei le nanguh kawm lam hung nga’ng ka.

⁴Thiemgau masate’n, na umdan gilo u kha tuhin kiheisan un la, na thil gilo hih hawu kha kilehheisan un, a tii, ti a na pileputeu a hilh sau ale ngaitha lo a, limsak lo bang khan um kiu in, tih hi LALPA kamsuok ahi.

⁵Nanguh hun suonte chuh khawi ah a um tau hi? Thiemgaute chule kumkhuo’n a dam u a ahim?

⁶Himahleh, ka thute leh ka thuguot te ka suok thiemgaute kawma ka piek kha, nanguh hun suonte chun a ngaihsak puou a, a thih lawh tau a. Tichun, a kisik u a, Bangkim hihthei LALPA chun I chungchâng u a hih a guot sek bangin, I umdan bang zel u leh, I thilhih teu bang zelin, I chungu ah a hih a hita hi, a tiu kha,’ ” ti’n.

⁷Leng Daria lal, kum nihna, tha sawm leh tha khatna, zie chuh Shebat tha ahi a, ni sawmnih leh ni lina zan chun, Iddo cha Berekiah chapa thiemgau Zekaria kawm achun LALPA thu a hungtung a.

⁸Zan a ka thilmuh chun, ngaitie, sakawl san chunga mi khat chu ka mu a, guoma mui thing laka hin a ding a; chun, a nunga chun sakawl a san, a buong, leh a vam a um u a.

⁹Tichun, kei chun, “Aw LALPA, zie sakawlte haw hi a umzie banga?” ka ti a. Vânsâwlchâk ei hopih chun ka kawmah, “Ziehaw hi bang ahih ken hun etsak ing ka,” a ti a.

¹⁰Chun, mui thing laka ding mi ka muh khan ei dâwng a, “Zie hi LALPA’n lei chung chengcheng en kimvel dinga a sawlte chuh ahiu hi,” a ti a.

¹¹Chun, amau chun, vânsâwlchâk kawma chun a va gen u a, “Lei chung chengcheng ka tawh suok tau a, ngaitie, khawvel pumpi thip dil del a um in ka muu hi,” a tiu a.

¹²Tichun, LALPA vânsâwlchâk chun a dâwng a, “Aw Sepaihte LALPA, kum sawmsagih sung a chunga na lungnat na Jerusalem leh Juda khawpi chung ahin na zahngaihna hi bang chan tuk tan guo nalai na hi?”

¹³Chun, LALPA chun ei hopih vânsâwlchâk chuh lungmuon um takin a dâwng ta a.

¹⁴Khutichun, vânsâwlchâk ei hopihpa chun Bangkim hih thei LALPA thugen chuh phuong dingin ei hilh ta a: LALPA chun hiti hin a tii: “Jerusalem leh Zion chung ahin ka thikthusie mah mah a.

¹⁵Nam nawp lên mai maite chung achun ka lungna mah mah a; chawmkhat sung ka lungnatna ka zukkit sung chun, zie namte chun, ka mite thuokna chuh a khawk zaw deuh in a bawl u a.

¹⁶Zieziekchun, hiti hin a tii, lungsietna tawh Jerusalem lam ka nga kit pan ta a; zie tak achun ka Ho-In chuh tundin kit hi’n tin, Sepaihte LALPA chun a tii. Chun, Jerusalem chung achun tehna zam in hung um ina,” ti’n.

¹⁷Bangkim hihthei LALPA chun hiti hin a tii: “Ka khawpite chuh hauhsakna’n hung lun kit in tin, LALPA chun Zion chuh lungmuon kit intin, Jerusalem chuh tel kit ina, ti’n va kiko kit ah,” ti’n.

¹⁸Chun, ka vak dâk dawk leh, ngaitie, ki li hi ka mu a.

¹⁹Vânsâwlchâk ei hopihpa kawma chun, “Ziehaw hi bang ahi?” ka ti a. Amah chun ei dâwng a, “Zie a kihaw hi khawvel thuneihna, Judate, Israel te leh Jerusalem mipite thehzak chuh ahiu,” a ti a.

²⁰Chuleh, LALPA’n, thiksek mi li ei etsak a.

²¹Chun, kei chun, “Zie mite hi bang hih dinga hung ahiu em?” ka ti a. Amah chun ei dâwng a, “Ziehaw hi kuomah a dâk dawk ngam um talo khawpa Judate hih zak ding kiti te chuh ahiu hi; himahleh, ziete hi amau haw sulau ding leh Juda gam hih zak ding a amau chunga a kiteu hun mang namte ki chuh paih tha dinga hung ahiu hi” ti’n a gena.