Read Gangte ZEKARIA 10 Bible Online

ZEKARIA 10 - Gangte bible

ZEKARIA 10

¹Guoh nunung huna hin LALPA kawm achun guoh ngên un. Mitin a dinga meipi siempa leh lo a thaichi tin cheng a ding guoh tui piepa chuh LALPA ahi ngâl a.

²Milim pathien chun bangmah lo mai a gen a, phunsân thiemte thil muh chu lepchieh ahi ngâl a. Mang diklote a gen u a, mi a lungmuon thâwn u a; zieziekchun, mipite chuh belam guolin a vakvai u a, belampu a neih loh ziekun gimtheih a thuok tau hi.

³Belampute chung achun ka lungna mah mah a, amau haw chuh gawt ding ka hi, Sepaihte LALPA chun a gan guol Juda insung chuh a hung entha a. Kidona sakawl hattak tak guolin siem ding ahi ngâl a.

⁴Amau apat in aning a suong hung pawt intin, In kilhnate leh kidona thalphel te; vaihawmtu leh lawiupate hung pawt khawm ding ahiu hi.

⁵Tichun, mi hattak bang hung hiu un tin, kidona kawtthêl buonthuok lak achun a melmateu tawhden un au. LALPA chuh a kawm u a a um ziekin do un au: sakawl chung chuongte chuh zo ngêi ding ahiu hi.

⁶Chun, Juda insung chuh suhat ing ka ting; Joseph insung chuh hukdawk ing ka, puikit ing ka ting, amau haw ka lainat ngâl a. Ka paih thak loh bang mai in, Kei, LALPA a Pathien u chuh ka hi ngâl a, a pauchamnateu chuh dâwng ing ka.

⁷Tichun, Ephraim chuh sepaih hangsan banga hât hiu un tin; uain in a sukkipak bangin a lunggil kipâk ina. Ahi, a chateu chun muu un tin, kipâk in au. LALPA achun a lunggil uh kipâk ina.

⁸“Saisilit ing ka ting, amau haw chuh sam khawm ing ka. Amau haw chuh hukdawk ka ting, a na pun tâk bangun hung pung zel un au.

⁹Namte lak ah a na thehzak ta mahleng, gam gamla taka le ei hezing un au; Tichun, a chateu tawh hingdawk un tin, hung vaikit un au.

¹⁰Aigupta gam apat in le hun puikit ka ting, Asuria gam apat in puikhawm ing ka; Gilead gam leh Lebanon hun puilut ka ting, a gam chuh a luoh dim masang sieh un.

¹¹Sukgimtheihna tuipi a pal tieng u leh, Tuipi kinawk chuh zêp ing ka ting; Nile luipi thuk tak chuh kang ina. Asuria chapona chuh sukniem hi’n tin, Aigupta gam leng thilhih theihna chuh mang kêi ina.

¹²Chun, amau haw chuh suhat ing ka ting, amah min in asuk ato in chieh un au,” LALPA’n a tii.