Read Gangte ZEKARIA 13 Bible Online

ZEKARIA 13 - Gangte bible

ZEKARIA 13

¹“Zie ni chuh a hungtun tieng leh, David suonte leh Jerusalem mite gitlohna leh milim honau apat sukthien na dingin tuikhuk hawn in um ina,

²Chun, zie ni chuleh milim pathiente chuh gamsung apat chun lamang ka ting; kuoma’n hezing ta puo’n au! Thiemgau ka hi tite leh thagau buok chu nawhmang ka ting, milim ho utnate chu lamang ding ka hi, LALPA’n a tii.

³Chun, hiti hi hung hi’n tin, kuo’n le thu a gen zawm zel chun, a nulepa amah hingte khan a kawmah, ‘Hing puo’n la, LALPA min a lepchieh na gen ziekin, thah ding na hi,’ tiu intin. Tichun, a genlawk lai tak u chun, a nu leh a pa chun sunlum un au.

⁴Zie ni a hungtun tieng chuleh hiti hi hi’n tin, thiemgau chun kilâkna a muh te ahim, thiemgau guola na a septe chuh zahchâkpih ta’n tin, mi thepna dingin puonâk chuol mul te le âk ta puo’n au!

⁵Himahleh, amau chun, ‘Thiemgau ka hi puoh a, lo tho mi ka hi a, ka tanglak tung apat suok a siem ka hi ngâla,’ ti zaw’n au.

⁶Khutichun, kuo a him in, ‘Na khuta liemmate kha bangti a?’ ti’n dawng un tin, amah chun, ‘Ziehi ka guolte In a ka sukliem ahi,’ ” ti’n dâwng ina.

⁷“Aw chemzâm, kipan inla, ka belampu leh ka na seppih pa chuh do ah! Belampu chuh zêp inla, belam hawn chuh dalh u hen. A note chung achun ka khut tha ding ka hi.

⁸Tichun, hiti hi hi’n tin, gamsung pumpi a mihing mun thuma khena mun nih chuh thi’n tin beimang un au, chun, mun thuma khena mun khat chuh suokcha’n au.

⁹Tichun, amun thumna te chuh mei ah patep ing ka ting; dangkaguo sukthientho bangin amau hih thiengtho ing ka ting. Sana patep a um bangin amau chuh enchien ing ka. Zie tieng chuleh kei kawmah paucham untin, amau haw ngaitha’ng ka. Chun, amau chuh ka mite ahiu, ti’ng ka ting, amau haw chun, LALPA chuh ka Pathien uh ahi, ti’n au,” tih hi LALPA kamsuok ahi.