Read Gangte ZEKARIA 14 Bible Online

ZEKARIA 14 - Gangte bible

ZEKARIA 14

¹Ngaiun, LALPA ni chuh hungtung ding ahi tai! Zie ni chuleh, Jerusalem chu gâllâk a chawmgam in um intin, gâllâkte chuh, na mitmuh ngêi u a hawp zak in um ina!

²LALPA’n Jerusalem do dingin nam chengcheng sam khawm ding ahi ngâl a. Khawpi chuh lâk in um intin; Inhaw chule suksiet hi’n tin, numeite chuh pawngsuol in um un au. Khawpi a mi kimkhat chuh sala puih in um un tin, mipi nutsieh a umsunte chuh khawpi apat in sukmang hi puo’n au.

³Zie tieng chuleh, LALPA chuh pawt in tin, kido ni a a hih sek bangin, zie namte chuh do ina.

⁴Chun, zie ni chuleh, suohlam a Jerusalem hun dawh olive tâng a chun ding intin, Chun, olive tâng chuh phel nih kisuoh in, suohlam apat a tumlam zuonin a lai tak ah kiphelsuoh intin, guom nasatak um ina. Tichun, tâng kimkhat chuh mâllam ah kichawn intin, a kimkhat chuh simlam ah kichawn ina.

⁵Chun, tâng kikala phaicham achun taimang in na tin uh, tâng kikala phaicham chun Azel vak sun ahi ngâla; ahi, Juda leng Uzziah lal laia inling a na taih bang u khan taimang un lau. Chun, LALPA ka Pathien chuh hung in tin, a mi thiengthote cheng tawh hung kitawn ding ahiu hi.

⁶Chun, zie ni chuleh hiti hi hi’n tin, vak taluo puo’n tin, thim taluo diek puo’n a.

⁷Himahleh, zie ni chuh LALPA chauh in a hêi, Sun le hilo, zan le hilo, nitâk lam leh vang chuh vak hung um ina. Sun lai hi zing zing in tin, zan le vak zing ta’n a. Zie hung tun ding chuh LALPA chauh in a hêi.

⁸Zie ni chuh a hungtun tieng leh hiti hi hi’n tin, Jerusalem apat in tui hing hung luong dawk intin, a kimkhat chuh suohlam Tuipi ah lut intin, a kim khat chuh tumlam Tuipi ah luong lut ina. Nipi leh phalbi lai in le kum tungin luong zing ina.

⁹Khutichun, LALPA chuh lei chung pumpi a Lal hung hi ta’n tin; zie ni chuleh mitin in Pathien khat ho un tin, tichun, Min khat chauh a het in um ta’n a.

¹⁰Gam chengcheng chuh Geba apat a Jerusalem simlam Rimmon tiengin siem guol hung hi’n a. Tichun, Jerusalem chuh a vela gamte chung achun chawihsân hung hi’n tin; Benjamin kawtkhak apat a tumasang a a na umna sa, a ning kawtkhak tieng chun. Chuleh, Hananel insang apat a leng uain thawkna khuk tiengin a mun chuh luoh ina.

¹¹Chun, zie tak achun mite chuh cheng un tin, Hansie himhim um ta puon tin; Jerusalem chuh bit taka luoh in um zaw ta’n a.

¹²Chun, Jerusalem dote chunga LALPA’n hipi a lênsak ding chuh zie hi ahi: A keng uh a ding zing lai chuh a taksau chuh hung muot intin, a mitkuok sung uh a a mitchangteu muot in tin, a kam sung uh a a leiteu le muot mang ina.

¹³Chun, zie ni chuleh gimtheihna huoisie tak LALPA kawma pat a chungu ah kie’n tin, mitin in a invengte khut tuu un tin; invengte leh inveng chuh kido un au.

¹⁴Chun, Juda nasan chun le Jerusalem do in tin, tichun, a kimvel a nam dangte hauhsakna, dangkaguote, sana te, leh silhlechente chuh tamtak lakhawm un au.

¹⁵Chun, khutibang mah chun, sakawl hite, sabiltung hite, sangawngsau hite, sabiltung neu hite, leh melmate giehbuk a gancha chengcheng te chung achun hipi lauh-um tak tak chuh hung leng ina.

¹⁶Chun, hiti hi hung hi’n tin, Jerusalem hun do nam chengcheng laka nutsieh a umte chuh, kum cheng a Bawkcha Kut mang ding leh, Bangkim hihthei LALPA chuh ho dingin chiehto sek un au.

¹⁷Chun, hiti hi hung hi’n tin, lei chunga inkuon chengcheng, Bangkim hihthei LALPA ho dinga Jerusalem a chieh lo taphawtte chung achun guoh zu puo’n a.

¹⁸Chuleh, Aigupta gama inkuon va chieh to lo taphawtte chung achun le guoh zu diek puo’n tin; chun, Bawkcha Kut mang dinga chieh to lo namte chunga LALPA’n a gawtna hipi chuh a chung u ah tung ina.

¹⁹Ziehi Aigupta gam gawtna leh, Bawkcha Kut mang dinga chieh to lo namte gawtna ding chuh hi’n a.

²⁰Zie ni chuleh, sakawl lawng-awh chunghaw achun, “LALPA ADING A THIENGTHO,” tih thu chuong ina. LALPA ina ûmlebel vantângte chuh, maichâm maa kuong tawbanga thiengtho hung hi’n a.

²¹Chun, Jerusalem leh Juda ûmlebel chengcheng chuh, Bangkim hihthei LALPA hona dinga kawih thiengtho hung hi ta’n au. Tichun, kithawi chengcheng chun hung lau un tin, sa huonna’n mang un au. Zie ni chuleh, Sepaihte LALPA Ho-In achun Kanaan mi himhim um ta puo’n au.