Read Gangte ZEKARIA 6 Bible Online

ZEKARIA 6 - Gangte bible

ZEKARIA 6

¹Chun, ka vak dâk dawk kit leh, kilâkna dang ka mu kit a, ka kihei a, ka mit ka vak hah toh kit leh, ngaitie, tâng nih kikala sakawlkangtalai li hung pawtdawk hi ka mu a; tângte chuh sumeng tang ahiu a.

²Chun, kangtalai khatna chuh sakawl san in a kai a, kangtalai nihna chuh sakawl vawm in a kai hi.

³Chun, kangtalai thumna chuh, sakawl kâng in a kai a, kangtalai lina chuh, sakawl sanbuong in a kai a.

⁴Tichun, vânsâwlchâk, ei hopihpa kawma chun, “Ziehaw hi bang ahiu hi, hepu?” ka ti a.

⁵Chun, vânsâwlchâk chun ka kawmah, “Ziehaw hi van apat a huihpi li hung pawt dawk, leisiet chengcheng LALPA masang apat a hung pawt chuh ahiu hi,” a ti a.

⁶Chun, sakawl vawm umna kangtalai chuh mâllam zuon in a chieh a, sakawl kâng chun a nung a zuia, chun, a buonga pawl chuh simlam ah a chiehdawk ta a.

⁷Chun, a san haw chuh a dingdawk u a, a chiehdawk u a, leisiet umdan etdik kal a ngaklah u a, Tichun, vânsâwlchâk chun, “Zie apat hin pawt dawk inla, lei chungah vakviel viel un” a ti a. Khutichun, lei chung pumpi achun a vakviel tau hi, ti’n ei dâwng a.

⁸Tichun, vânsâwlchâk chun, “Ngai ah, mâllam zuona chiehte khan mâllam achun ka lungthim a suchawldam ui,” ti’n ei hun kiko khum u a.

⁹Chun, LALPA thu chuh ka kawmah a hungtung a,

¹⁰ka kawmah, “Saltâng Heldai te, Tobijah te, Jedaia te apat a thilpiek chuh la’n la, zie ni mah chun hung inla, Babulon apat a a hun zawt uh, Zephania chapa Josia In achun lut ah.

¹¹Ahi, amau apat in, dangkaguo leh sana te la’n la, lallukhuk siem inla, Jehozadak chapa Joshua, thiempu Lienpen lu chung achun khuksak ah.

¹²Chun, a kawma chun, Bangkim hihthei LALPA chun hiti hin a tii: ‘Ngaitie, mi, a min Abak kiti chuh a uma; a mun apat in hung khang dawk intin, LALPA Ho-In chuh hun sa’n a.

¹³Amah chuh Ho-In hun tungdawk kit ding pa chuh ahi a, leng tawh a kal achun kilimbawlna um intin, mipite chungah vai hun hawm ina. Chun, thiempute chuh a lalchutphah kawma chun ding un tin, nuom tak leh kituok takin na sem khawm un au.’

¹⁴Chun, lallukhuk chuh limbawla a um nau hetzingna dingin LALPA Ho-In achun um in tin, Heldai te, Tobijah te, Jedaia te leh, Josia te chun enkawl un au,” ti’n.

¹⁵Chun, gamla taka umte chuh hung un tin, LALPA Ho-In sak kit na achun hung panpih un au. Tichun, Bangkim hihthei LALPA chun ei sawl ngêi ahi tih he ta’n lau. Chun, LALPA na Pathien uh aw chuh guntaka na ngaihthak sek u chun zie thu hi hungtung ngêi ngêi ding ahi, a ti a.