Read Gangte ZEKARIA 8 Bible Online

ZEKARIA 8 - Gangte bible

ZEKARIA 8

¹Chun, LALPA thu chuh ka kawmah a hungtung a:

²Sepaihte LALPA chun hiti hin a tii “Thikthusie hielin Zion chuh ka kihukpih a, chun, a chunga lungna khawp in amah ding chun ka phachuomngai a.

³LALPA chun hiti hin a tii, ka khawpi thiengtho, Zion lam ah hung kihei kit ka ting, Jerusalem lailung achun cheng ing ka, tichun, Jerusalem chuh THUTAK KHAWPI, ti a het hi’n tin, LALPA tâng chuh, Tang thiengtho tih hi ta’n a.

⁴Khutichun, Jerusalem kawtthêl achun, teksepi leh teksepute hung tung un tin, a kum tam ziek u a tiengkhut kikhut kawmin.

⁵Tichun, khawpi kawtthêlte chuh numei naupangte leh pasal naupangte khawlai a kichiem in hung dim kit ta’n a.

⁶“Zie mipi nutsieh a umte ngaih hin, zie chu thil lamdang bang mahleh, keia dingin le thil lamdang hiding ahim? tih hi LALPA kamsuok ahi.

⁷Ngaiun, ka mite chuh suohlam akipat te leh, tumlam akipat haw chun hukdawk ding ka hi, LALPA chun a tii.

⁸Chun, hun puikhawm ing ka ting, Jerusalem ah cheng tan au, Tichun, ka mite hiu in tin, Kei a Pathien uh hi’ng ka.”

⁹Chun, LALPA chun hiti hin a tii: “Temple ngêi chuh sak ahih theih na dinga LALPA In suongphum phum ahih ni a thiemgaute kama thu pawt, nanguh tu a ngaithate hin na khut hawu suhat un.

¹⁰Tu masang khan mipite a dingin kilawhna ding a um puoh a, gancha gawih na ding le a um diek puoi, melmate ziekin a lut leh pawtte dingin muonna a um diek puoh a; mi cheng cheng chu ka kido tuoh sak chiet ngâla.

¹¹Himahleh tuhin vang, a hing dawk sunte dingin tuma kha bang zing ta puo’ng ka, LALPA’n a tii.

¹²Kichamna chi tuh tau intin; grep guite chu gahsuoh ta’n tin, lei in a gah suohdawk intin, van in dâitui kiek sak in a; tichun, zie vangsakna te hi ka nam tel, ka mite a na damsunte luoh dinga pie ding ka hi.

¹³Juda leh Israel mite haw! Tumasang khan, gamdang mite chun, ‘Juda leh Israel te chunga sietna tung kha, na chungah tung he’n’ ti’n hansie a kibuokkhum tuoh sek u a. Himahleh, tuhin hun hukdam ing ka ting, tichun, zie gamdang mite chun, ‘Juda leh Israel mite chunga vangsakna tung bang khan na chungah tung he’n,’ kiti tuoh ta’n au. Zieziekchun, hangsan takin um inla, lau hiel ki’n,” ti’n.

¹⁴Bangkim hihthei LALPA chun hiti hin a tii, “Na chung u a sietna hun tunsak ding ka ngaihtuoh bang hin, na pileputeu in ei suklungnat lai u a, a chung u a thil phalo hih ding ka ngaihtuoh khan, ka kisik puoh a, ka thilhih guot chu ka hih ta a.

¹⁵Chun, tuhin Jerusalem leh Juda insung mite dingin vangsakna tunsak ding ka hi a, lau hiel ki’n.

¹⁶Ziehaw hi na thilhih dingteu chuh ahi: Mitin in amah invengte kawmah thu diktak gen chiet un la. Na vaihawmna In u ah thu diktak, chamna tun thei khawp chuh hih un.

¹⁷Na invengteu a ding a phalo ding chuh kuoma’n na lunggil un ngaihtuoh kiu inla, lepchieh a kipautiem in, hetpih diklo in pang kiu in. Zie thil haw hi ka hawt lam tak ahi,” tih hi bangakai hihthei LALPA kamsuok ahi.

¹⁸Chun, LALPA thu chuh ka kawmah a hungtung a.

¹⁹LALPA Bangkim hihthei chun hiti hin a tii “Tha lina a anngawlh leh, tha ngana a anngawlh leh, tha sagihna a anngawlh leh, tha sawmna a anngawlhte chuh, Juda inkawte dingin lawpna leh kipahna, guolvakna thatnawp um tak hung hi ding ahi a, zieziekchun, thu dik leh chamna chu ngainau un,” a ti a.

²⁰LALPA Bangakai hihthei chun a gen a, “Khawpi tamtak apat a mite, Jerusalem a hung khawm ding ahiu!

²¹Chun, khawpi khata mite chuh khawpi dangah chieh un tin, LALPA deihsakna ngên dingin chieh meng hitiu, LALPA Bangkim hihthei chuh hawl hitiu, keile chieh ding ka hi, ti’n au.

²²Mi tamtak leh, nam thilhih thei takte chule, Jerusalem achun Bangkim hihthei LALPA ho ding leh, a vangsakna ngên dingin hung un au.

²³Zie nihaw achun hiti hi hung hi’n tin, namtin apat mi sawm te chun Juda mi khat chuh a puonmawng in tuzui un tin, a kawmah, ‘Pathien na kawmah a um hi tih, ka het ziekun, kei un le na chiehna achun hun zui ung kau,’ ti’n au,” a ti a.