Read Gangte ZEKARIA 9 Bible Online

ZEKARIA 9 - Gangte bible

ZEKARIA 9

¹Hadrak gama LALPA thu puokgik leh Damaska chunga gawtna ding chuh. LALPA mit chuh mite chung leh Israel nam chengcheng chungah a chu ngâla.

²A kigamgitpih Hamath chule, zie guol mah chun, Tura leh Sidon chule ching mah mah leule.

³Chun, Tura chun amah a dingin kulh dettakte a kisiem a, chun, khawlai a buonthuok leh leivui bang mai in sana leh dangka chuh a khawlkhawm a!

⁴Himahleh, LALPA’n a thil neih chengcheng chuh lamang vek ding ahi. A hauhsaknate chuh tuipi ah paih intin, a khawpi chuh mei in hâltum ina.

⁵Ashkelon khawpi chun zie chuh mu’n tin; lau ina. Gaza khawpi chun le mu’n tin, nasa takin thuok ina. Khutibang chun Ekron chun le mu’n tin, a kinepna cheng chuh muolphona hi’n tin, Gaza apat in leng chuh mangthai intin, Ashkelon chuh luoh loh a nutsieh in um ina.

⁶Ashdod achun zaucha cheng in tin, LALPA chun, “Philistia mite chapona chu subei ding ka hi.

⁷Chun, a kam u apat in a thisan uh lamang ing ka ting, chun, a ha kal u a thil ten-um haw chuh ladawk ing ka ting; amah chule I Pathien u a dinga ana umsun hung hi’n tin, Ekron mite chuh Jebus mite tawbang hung hi’n au.

⁸Ka gam chuh veng ing ka ting, sepaih te hawhpai ding phal ta puo’ng ka. Mi bawlsiet hatte’n ka mite a sukgimtheih u chuh phal ta puo’ng ka. Ka mite thuokgim dân chu ka mit ngêi in ka mu ta ngâl a,” ti’n.

⁹Aw Zion chanute haw! lawp un, lawp un nang haw, Jerusalem chanute lâwpin kiko dawk un! En un, na leng chuh na kawmah a hung hi! Amah chuh guolzo leh guol chungchuong in! Kingainiem takin sabiltung chungah a chu a, sabiltungno chung ngêi achun.

¹⁰Chun, “Ephraim apat in kidona kangtalai chuh lamang ing ka ting, Jerusalem apat in kidona sakawlte chuh lamang ing ka; Kidonaa thalpi kimangte chuh suksiet in um ina. Amah chun namte lak ah chamna siem intin; Tuipi apat tuipi chanin, gam cheng achun vaihawm ina. Euphrates luipi apat in, lei mawng tâwp tiengin,” ti’n.

¹¹“Nangmah thu a le, na thugawlh thisan ziek chun; kawkhuk tui um lohna apat chun na suongkul tângte chuh hun thahdawk ing ka.

¹²Nanguh, tu a kinepna nei saltângte haw, vaikit un, na kulhpiu lam achun vaikit un! Tuhin, ka hun hilh na hiu ui, a lehnih in hun pie kit ding ka hi tih ka phuong hi.

¹³Juda chuh thalpi bangin mang ka ting; Ephraim chuh thalchang bangin mang ing ka. Aw Zion, na chate chuh Grikte chate chungah chawktho ing ka ting, mihat chemzâm bangin siem ing ka” ti’n.

¹⁴Khutichun, LALPA chuh a mite kawmah hung kilang intin, A thalchang chuh kawlphe bangin leng dawk intin, Bangakai chunga LALPA Pathien chun a pengkun chuh hun mût in tin; simlam apat in chinpei in chieh ina.

¹⁵LALPA Bangkim hihthei chun a mite chuh veng intin, a melmateu thisan chuh suoh untin, vaisuongseh chang chule tawhden un tin; Kithawihna thisan chuh maichâm ning a buok bang mai in luong ina.

¹⁶Zie ni chuh a hungtun tieng leh, Belam chingpa’n a ganguolte lauh-um laka a hukdawk bangin, LALPA Pathien in a mite chuh hukdawk ina; Tichun, suongmantam lallukhuk bangin a gama chun vak ta’n au!

¹⁷Ahi, zie ni chuleh a gam chuh bang tawbang pheta gam pha leh hawih a hi ta dem! Buhlebal in tangvalte chuh suthanuom intin; uain thak te chun nungakte chuh suthanuom ta’n a!