Read Gangte MALAKI 1 Bible Online

MALAKI 1 - Gangte bible

MALAKI 1

¹Malaki manga Israel te kawma LALPA thugen chuh:

²LALPA chun a mite kawmah, “Ka hun lungsiet zingzing hi,” a ti a. Himahlele, nang u chun, “Bang akhan e kei uh nei lungsiet?” na tiu a. LALPA chun a dâwng a, “Esau chuh Jakob suohpih hilo ahim? tih hi LALPA kamsuok ahi: hilele, Jakob chuh ka hehpih a.

³Himahleh, Esau vang chuh ka haw a. A tânghaw cheng chuh ka suksiet sak a, a gam chuh thalek si-âlte leh gamsate umna dingin ka taihsan ta a.”

⁴Edom te chun, “Ka khawpi teu chuh suksiet in a um ta a, tungding kit ding ka hiu,” a tih u chun, “Sa pha kit thei maithei na hiu a, himahleh, susie kit ding ka hi. Tichun, mite chun, ‘Gitlohna gam’ leh ‘Kumlekhuo a LALPA lungnatna Namte’ ti’n au” tih hi Bangkim hihthei LALPA kamsuok ahi.

⁵Na mit ngei un zie hi muu in na tin, “Israel gamgi khel natieng ale LALPA chuh a limbawl in um hen,” hun ti’n au.

⁶Chapa chun pa a zah sek a, suok chun a pu: “Kei hi Pa ka hih chun nei limbawlnau chuh khawitak a um ahi? Kei hi hotu ka hih chun, nei zahnau chuh khawitak a um ahi? Bangkim hihthei LALPA’n a tii. Aw ka min musit thiempute haw, ‘Banga khan ahim ka hun muhsit uh?’ na tiu a.

⁷Ka maichâm ah chângthâk buok na lân u a ‘Banga khan ahim ka hun limbawl loh uh?’ na tiu a. Ka dawhkhâng a na muhsitnau na suklat zing uh ahin a puo!

⁸Kithawihna dinga gancha mitdûk ahim, a damlo ahim, a kêngbâi ahim na hun lat u hi a diklo hilo maw? Na gam vaipawpau le pie tiem u a hun kipahpih in nanguh a hun na deihchuom na dem?” Bangkim hihthei LALPA chun a tii.

⁹Tuhin, nang haw, thiempute, Pathien chuh I chung u a pha dingin ngên un la, bawl tiem u! Na pauchamna teu dâwng puo’n tin. Zie chuh nangmau haw dikloh hi ding ahi, LALPA chun a tii.

¹⁰“A thâwn mai a ka maichâm a chuh mei a kidet lohna dingin, na lak u a khat hin, Ho-In kawtkhak hi khâk zaw mai leh ka ut hi. Na chung u ah kipahna himhim ka nei puoh a, na khut u apat in thillat chule pawm diek puo’ng ka, LALPA Bangkim hihthei chun a tii. Na chungu ah ka kipâk puoh a, ka kawma na thillat teu le pawm lo ding ka hi, LALPA’n a tii.

¹¹Ni suohna apat ni tumna tiengin Jentel te lak achun ka min chuh a lopi ngâla. Mun tin a a umnau chengah gimlimte ka kawma hâl in, kithawihna pawmtâkte a lân u a!

¹²Himahleh, nang haw’n vang, ‘A maichâmte hi a buok ahi,’ a chunga na thil buokteu na lat ziek u hin na subuok ui.

¹³‘Ziehaw cheng hi a chimchâk um na e,’ ti’n na nak uh na suknil khum u a Ka kawma na thillat dingun, pawngbawl a na thillakteu, a kêngbâite, a damlo te na hun chawi u a. Ziehaw chuh na khut uh apat in pawm dingin nei ngaihtuoh um? LALPA’n a tii.

¹⁴Ganguol laka a chal um zen a, thu le tiem a, zie nunga chuh ka kawma mel dem um pie a, ei thempa chuh hansiedawl in um hen! Kei hi lal lopi tak ka hi ngâl a, chun, ka min le Jentel te lak achun a lauh-um ahi,” Bangkim hihthei LALPA chun a tii.