Read Gangte MALAKI 2 Bible Online

MALAKI 2 - Gangte bible

MALAKI 2

¹Tuhin Aw nanguh thiempute haw, “Zie thupiek hi nanguh a ding ahi:

²Ka min sulopi dinga na ngaihthak loh u a, lunggil a na vawp loh u chun, na chungu ah hansie hun tunsak ing ka. Na vangsakna dawnteu chuh hansie buok ing ka. Ahi, na laku ah, lunggil taktak a ka thupiekte vawp na um loh ziekun hansie ka lawh ta him ahi.

³Ngaitiem u! na suonlepak teu chuh gawt ing ka ting, na kithawihna gancha êkteu chuh na maichang u ah tat ing ka ting, tichun, ka masang apat in hun paihmang ding ka hi.

⁴Tichun, Levi suona ka thugawlh chuh a det zing theihna dingin, zie thupiek hi ka hun piek ahi tih he ta’n lau, LALPA’n a tii.

⁵“Ka thugawlh achun hinna leh lungmuonna ka tiem a, zie chuh ei limbawl theihna dinguh a ka piek ahi. Zie hun lai chun ei limbawl u a, ka min zah kawmin ka masang ah a dinguh a.

⁶Sinsakna dik chuh a kam u ah a um a, a mûk hawu achun thu diklo a pawt puoi: Lungmuong tak leh lamzang takin ka masang ah a leng sek u a, gitlohna apat mi tamtak a puikit sek ui.

⁷Thiempute kam chun hetna a vawp ding ahi ngâla, a kam apat in dân chuh a hawl sek dinguh ahi; amah chuh Sepaih hawnte LALPA sawlchak ahi ngâla.

⁸“Himahleh, lampi dik apat chun na petmang tau a. Na thu sinsakteu chun mi tampi a kisuihpaih sak zaw ta a. Levi te thuthun chuh na bawh sie tau hi, LALPA’n a tii.

⁹Zieziekchun, ka lampite hawh na umloh bang u leh, na sinsak nau a khenchuom na neih bang zel un, mi chengcheng muhsit leh niem taka hun siem ding ka hi,” ti’n.

¹⁰I bawn un pa khat hin hilo I hiu hi? Pathien khatin ei siem le I hi puou a ahim? Bang zieka eihaw ei suonte thugawlh musit a, khat leh khat I kithep tuoh sek uh a?

¹¹Juda mite chun Pathien kawma a thutiem u chuh a bawhsie tau a, a gamsung pumpiu leh Jerusalem a chun thil ten um tak a hih tau a. Tichun LALPA’n a deih mah mah Ho-In chuh a hihbuok tau a, pasal te chun gamdang numei — pathien chanute chuh a kichênpih uh a.

¹²Zie tawbang thilhihte chuh, Jakob puon-In apat LALPA’n paih dawk henla, Sepaih te LALPA kawma thillante chan in.

¹³Chun ziehi le na hih zel uh a, LALPA maichâm chuh mitthi leh kahna leh mauna’n na buokkhum u a, a ziek chuh, a kawma na thillat teu a ngaihsak ta puoh a, deih tak a, a pawm takloh ziek in.

¹⁴Bang zieka pawm talo ahi die aw, na ti nalai u a. A ziek chuh, tanglak na hih laia na kichênpih na zi kawma Pathien in a hun hetpih a na thutiem kha na bawhsie ta a. Pathien masang ngêi ah, amahnu a dinga chuh ginum dingin thutiem na nei ngâla.

¹⁵Pathien in amahnu chule a siem hilo ahim? Taksa leh thagau a pumkhat in ahun siem hilo maw? Pathien in a thil deih chuh bang ahi? Cha, Pathien ngaihsak na hun neih ding u chuh ahi. Zieziekchun, na lak uh a kuoma’n a khangdawng zi kawma a thutiem u chuh bawhsie kiu hen.

¹⁶“Kimak chuh ka haw ngâla,” LALPA, Israel Pathien chun a tii. Na lak uh a mi khatin, a zi chung a zie tawbang thil diklo tak hi a bawl tieng leh ka haw mah mah hi. Na ziteu chunga ginum taka um dinga na thutiem teu chuh bawhsie lo dingin kivengphau un.

¹⁷Na thugenteu in LALPA na suchawl zo tau a. Himahleh, nanghaw’n la, “Bangti’n a hi ka sukchawl uh?” na tiu a. Zie thu na genteu hin na suchawl ui: “LALPA Bangkim hihthei chun, thil gilo hihte chuh a pha’n a ngai a, a deih ahi” na tih u leh, “Pathien diktak chuh khawia um ahi?” na tih nau haw ahin ahi, ti’n.