Read Gangte MATTHAI 11 Bible Online

MATTHAI 11 - Gangte bible

MATTHAI 11

¹Isu’n sinsak sawmlenih te chuh thu a piek zawh phetin, tak apat chun khuo haw ah mi hilh leh thugen dingin a chieh ta a.

²Johan in Krista thilhih haw chuh suongkul apat a a na zak in, a kawmah,

³“A hung ding chuh na him, mi dang ka na ngak nalai ding um?” ti’n sinsakte a palaih sak a.

⁴Chun, Isu’nakawm u ah, “Chieh kit unla, thil na muh u leh na het hawu hi Johan va hilh un:

⁵mitdûkte a mit uh a vak ta a, kêngbâite le keng in a chieh tau in; phâkte a thieng tau, bengngawngten le khuo a za thei tau in; mithi haw le kaihthawh in a um tau a, chagahte kawma le Chanchin pha gen ahi tai.

⁶Chun, kuole, ka chunga lungkim lohna mu lo chuh a hamphau ui,” ti’n a na dâwng a.

⁷Chun, ziete chuh a chieh phet un Isu’n mipite kawm achun Johan thu a gen pan ta a,

⁸“Bang en dinga gamthip a chieh na hiu hi? Luong huih mût lîng maw? Ahihloh leh, bang en ding pena chiehdawk na hiu hi? Puon nem silh maw? Ngaiun, puon nem silh te chuh leng In ah ahi a puo a um uh.

⁹Ahihloh leh bang ziek pena chiehdawk na hiu hi? Thiemgau en dingin maw? Ahi, ka hun tih kha, thiemgau sanga lopi zaw na mu tau hi.

¹⁰‘Entie! ka sawlchak na ma ah ka sawl a, Amah chun na ma ah na lampi bawl ina,’ tih a chanchin a zik pau kha zie pa hi ahi.

¹¹Tihtakzet a ka hun hilh na hiu hi, Numei hin thâk lak achun Baptist Johan sanga lopi zaw a um kha puoi; himahlele van gama mi neupen le amah sang chun a lopi zawi.

¹²Baptist Johan um apat tuni tieng hin van gam chun thagum suoh a dona a na thuok sek a, thagum suoh mangte chun a na lak guo sek ui.

¹³Johan hung um tiengin thiemgaute leh Mosi dân chun van gam chanchin chuh a na genlawk uh ahi.

¹⁴A thugen u chuh na zawp nawp u chun, a hung ding kigenlawk kha Elijah hi ahi.

¹⁵Kuole zakna dinga bil nei chun zau hen!

¹⁶“Himahlele, tulai khangthakte hi bang tawh ka tehkal ta die? Chapang, dawl muna chu tawbang ahi.

¹⁷‘Châm- ngai ka hun mût sak uh a, na lam ngâl puou a. Hah kah a ka kah uh lele na âwm uh na chûm ngâl puou,’ ti te bang hih ahiu hi.

¹⁸Johan chuh a hung a, nelo dâwn lo ahi a, ‘Thitha guol nei ahi hi’ a tiu a.

¹⁹Mihiem Chapa a hung a, a ne’n a dâwn a, ‘En tiem u, an nek hât, uain heh pa; siehdawlte leh mi gilote guolpa khuh!’ a ti ngâl u a. Bang hilele, Chitna chuh a gah in a dik hi tih a sulang nai,” a ti a.

²⁰Chun, a lunghei loh ziekun, a thilmak hih tamna pên khawpite chuh Isu’n a gai ta a:

²¹“Korazin, na chung a gik hi! Bethsaida, na chung a gik hi! nang haw chunga thilmak kihih haw kha Tura leh Sidon khuo a hih hileh, saidippuon silh a, vut laka chu’n a lung uh hêi ta khawp puo’n au.

²²Himahlele, ka hilh na hiu hi, thupi tan ni leh Tura leh Sidon khuo thuok ding chuh a dân um zaw’n a.

²³Chun, nang Kapernaum, van tienga kichawihsan ut na him? Mithi khuo tienga paihthak ding na hi a puo! nang haw chunga thilmak kihih haw kha Sodom khuo a hih hileh chuh, tu tiengin um zing nalai ina.

²⁴Himahlele, ka hilh na hiu hi, thupi tan ni leh nang thuok sang chun Sodom gam thuok ding chuh a dân um zaw’n a,” a ti a.

²⁵Zielai chun Isu’n a gen a, “Aw hepa, lei leh van a Lal, nangin miching leh mi thiemte kawmah zie thu haw hi na îm a, nausente kawma na phuon ziek hin ka hun pakchai.

²⁶A hi, hepa, zie tawbang hih chuh nang ngaih in a phai.

²⁷“Ka pa’n thil chengcheng ei vawp sak tai; Pa tello in kuoma’n Chapa hi a he puoi; Chapa leh, a kawm u a Chapa’n a phuon nawpna te tihloh chun kuoma’n Pa chuh a he puoi.

²⁸“Nang haw, semgim leh puokgik puo chengcheng te haw, ka kawmah hung un la, kei man hun chawlh sak ing ka.

²⁹Ka namkawl puou unla, ka kawmah sin un; lungchuol leh lunggil a kingainiem tak ka hi hi; tichun na thagau u a dingin chawlhna mu’n lau.

³⁰Ka namkawl chuh a nuom a, ka puok le a zâng hi,” a ti a.