Read Gangte MATTHAI 13 Bible Online

MATTHAI 13 - Gangte bible

MATTHAI 13

¹Zie ni mah chun Isu chuh In apat chun a chiehdawk a, dîl pang achun a chu a.

²A kawm achun mipi nasatak a hung kikhawm u a, khutichun, kuong ah a lut a; a chu a, mipi chengcheng chuh sehpho ah a ding u a.

³Chun, tehkal thu’n thu tamtak a kawm u ah a gen a: “Ngaitiem u, buhchi thehpa chuh buhchi theh in a kuon a;

⁴chun, a theh lai in a bang lam sik ah a kie a, himahleh vachate a hung u a, a luok zo tau hi.

⁵Khenkhat chuh, suongteu chung lei patna mun ah a kie a, lei a sah loh ziekin a kek dawk pai zieng a;

⁶himahlele ni a hung sân deuh phetin a kâng nang a, zung a neih loh ziekin a gawp ta a.

⁷Chun, abang hamlingnei lak ah a kie a, ham chuh a hung khang a, a dep mang ta a.

⁸Chun, a bang lei phatna ah a kie a, a bang a leh za, a bang a leh sawmgup, a bang leh sawm thum in a hung gah ta a.

⁹Kuole zakna dinga bil nei chun za hen,” a ti a.

¹⁰Chun, sinsakte chuh Isu kawmah a hung u a, a kawmah, “Bang dinga a kawm u a tehkal thu a gen na him?” a tiu a.

¹¹Isu’n kawm u ah, “Van gam thuguk chuh nang haw het vang phal a hi a, himahleh, amau haw het vang chuh phal ahi puoi.

¹²Kuole a nei ta piek beh un tin, tamtak hun nei intin, himahleh kuole a neilo chuh a neihsun le lâksak un au.

¹³Ziezieka chuh tehkal thu a a kawm u a ka gen ahi, en mah leu le a muh sek loh u a, ngaitha mah leu le a zak sek loh ziek u leh, a ngaihna le a het sek loh ziekun.

¹⁴Tichun, thiemgau Isai thugen masak kha a chung u a hung tung ahi hi: ‘Bil in vang zau in na tin uh, a ngaihna chu vang he puo’n lau; Muh vang muu in na tin uh, het vang chuh he hiel puo’n lau;

¹⁵Zie chite lunggil hi a na ngui zo ta a, A bil u le a na ngawng ta a, A mit uh a sing u a, Khutilochun, I mit un mui ting uh; I bil un zai ting un, I lunggil un he kit hi ting uh, Kihei kit hi ting un, Ama’n ei na sudam khan a ie!’ a tiu a, a tih kha.

¹⁶“Himahleh, nang haw mit vang chuh a hampha ahi, a muh sek ziekin, na bil u le a hamphai, a zak sek ziekin,

¹⁷Tihtakzet a ka hilh na hiu hi, thiemgau tamtak leh mi diktat tamtak ten le na thil muh hawu hi muh a ut u a, himahleh a mu ngâl puou a; na thil zak hawu hile zak a ut u a, himahleh, a za ngâl puou a.

¹⁸“Khutichun, ngaithau in la.buhchi thehpa tehkal thu umzie chuh heu in:

¹⁹kuon le, gam thu chuh nakhanga za a, a ngaihna a het loh chun, buhchi lam sika kie tawbang chuh ahi. Migilo chuh a hunga a lunggil a thehsa chuh a chuhthâk sak sek hi.

²⁰Chun, suong teu lei patna muna kitheh chuh, thu a zak zaka kipâk taka pawm zieng;

²¹himahlele amah a chuh zung a um loh ziekin, chawmcha chauh a um a, himahleh, thu ziek a chuh buoina ahim, sukgimtheihna ahim a hung tun tieng leh puk kit pai zieng sek hi ahi.

²²Hamlingnei laka kitheh chuh ziehi ahi: thu chuh he a, himahlele khawvel thil ngaihtuohna leh kithepna chun thu chuh a dep a, gah lo in a um sek hi.

²³Chun, lei pha chunga kitheh chuh ziehi ahi: thu chuh a bil a za a, a umzie hethiem zieng hi ahi; zie chuh a gahsuoh ngêi a, a bang a leh za, abang a leh sawmgup, abang a leh sawm thum in a pung sek hi,” a ti a.

²⁴Isu’n tehkal thu dang a kawm u ah a gen kit a: “Van gam chuh mi khat a lo a buhchi pha theh chuh tawbang ahi.

²⁵Himahleh, zan kâl in melma chuh a hung a, buh laka chun buhlem chuh a theh a, a chieh mang kit ta a,

²⁶Tichun, buh chuh a hung keh a, a vui a hung um phatin, buhlem chule a hung lang ta a.

²⁷Chun, zie pa suokte chuh a hung u a, a kawmah, ‘Hepu, na lo ah chi pha na theh puoh a ahim? buhlem khu khawia pata hung um ahi leh?’ a tiu a.

²⁸Amah chun a kawm u ah, ‘Zie chuh melma’n a na hih ahi ta chu,’ a ti a. A suokte chun a kawmah, ‘Ahihleh, ziehaw chuh va lakhawm mai leng un na ki-awi die?’ a tiu a.

²⁹Amah chun, ‘Ki-awilo e; buhlem chuh bawt dawk leu chin, buh tak chuh bawttha khawm kha’n lau.

³⁰Buh ât hun tiengin kek khawm u heh; buh lak tieng chu leh buh âtte kawmah, Buhlem chuh lakhawm masa zet unla, hâltum dingin kankhawm un; buh tak vang chuh ka buh In ah thak lut un, na ti na’ng ka,’ tin” a ti a.

³¹Chun, Isu’n tehkal thu dang a kawm u ah a gen kit a: “Van gam chuh ankam mu chang khat mi’n a lak a, a lo a theh tawbang chuh ahi.

³²Zie chuh, chi chengcheng laka neupen ahi a; himahlele, a hung khanlet tieng leh, thai kung dang sangin a lien zaw sek hi. Thing a hung hi sek a, khutichun, chung leng vachate a hung u a, a bâk lak haw a chun bu a sie sek uh ahi,” a ti a.

³³Chun, Isu’n tehkal thu dang a kawm u ah a gen kit a: “Van gam chuh numei in chawl a lak a changbuong lawh thum laka a sawh a, a bawna a thawh masang cheng a bilh tawbang chuh ahi,” a ti a.

³⁴Ziehaw chengcheng chuh Isu’n tehkal thu’n mipite kawmah a gen a, tehkal thu lo in a kawm u ah bangmah a gen puoi,

³⁵Ziehaw chuh a hih a, thiemgau in: “Tehkal thu’n ka kam ka’ng ka ting, Lei kisiem tûng apat thil kisêl chuh gen dawk ing ka,” ti a a gen kha a hung guitun theihna dingin.

³⁶Isu’n mipite chuh a nutsieh phetin, In ah a lut a; a sinsakte a kawmah a hung u a, “Lo a buhlem tehkal thu khah a umzie nei hilhchien in,” a tiu a.

³⁷Chun, Isu’n a dâwng a, “Chi pha thehpa chuh Mihiem Chapa hi ahi a;

³⁸lo chuh khawvel hi ahi a, chi pha haw chuh gam chate ahiu a; buh lêm haw chuh migilo chate ahiu a.

³⁹buhlem thehpa kha Diabol ahi; buh ât hun chuh khawvel beihna ding ahi a, buh-âthaw chuh vânsâwlchâkte ahiu ui.

⁴⁰Khutichun, buhlem haw chuh a lakkhawm u a meia a tih guol un; khawvel beih tieng leh zie tawbang chuh hung um ding ahi.

⁴¹Mihiem Chapa hin a vânsâwlchâkte chuh sawl dawk intin, a gam apat mipi gitloh sakte leh, hih gilo chengcheng lakhawm un tin,

⁴²hâltuina mei achun paih lut un au; tak achun kah leh hagiel chuh um ina.

⁴³Zie tieng chuleh mi diktatte chuh a Pau gam achun ni guolin vak ta’n au. Kuole zakna dinga bil nei chun zau hen.

⁴⁴“Van gam chuh lo a go phum gûk tawbang chuh ahi; zie chuh mi khatin a mu a, a selgu a, a kipâk takin a chieh a, a neih chengcheng chuh a va khawng a, zie lo chuh a chaw ta a.

⁴⁵“Chun, van gam chuh sumkawlvei mi khat tuikawk chang phatak hawlpa tawbang chuh ahi kit hi,

⁴⁶amah chun tuikawk chang man tamtak khat a mu a, tichun, a chieh a, a neih chengcheng a va khawng a, zie chuh a chaw ta a.

⁴⁷“Chun, van gam chuh lenkhang tuisuohgiet a seh a, chitin cheng chûn khawmna guol chuh ahi.

⁴⁸Zie chuh adim tieng leh a pang ah a kaidawk u a, a chuu a, a pha cheng chu bawm ah a khum u a, a sie vang chuh a paih dawk sek ui.

⁴⁹Khawvel beih tieng chu leh zie tawbang mah chun um in a: Vânsâwlchâkte chuh hung pawt untin, mi diktatte lak apat in mi gilote chuh la khawm untin,

⁵⁰hâltuina mei achun paih lut un au, zie tak achun kah leh hagiel chuh um ina,” a ti a.

⁵¹Isu mah in a kawm u ah, “Ziehaw chengcheng chuh na heu hi?” a ti a. Amau chun a kawmah, “He e,” a tiu a.

⁵²Chun, amah chun a kawm u ah, “Khuti ahih chun, dân thu zik van gam lampi sinsak a um ta chuh, In nei, a gobawm apat a thil thak leh thil lui suohdawk zing sek bang chuh ahi,” a ti a.

⁵³Chun, hiti hi ahi a, Isu’n zie tehkal thu haw chuh a gen zawh phetin, tak apat chun a chieh ta a.

⁵⁴Chun, a umna khaw lam chu a tung a. A kikhawpna In hawu a chun amau haw a sinsak ta a, khutichun mak a sa ten tau a, “Zie pa hin zie chitna leh zie thilmak hih theihna haw hi hâwi apat a a muh ahi?

⁵⁵Zie pa hi thingkuong siempa chapa khah hilo ahim? a nu chuh Mari a tih u hi hilo ahim? A suohpihte le Jakob, Joseph, Simon leh Juda a tih hawu chuh hilo maw?

⁵⁶Zie pa hin khawi apat ale ziehaw cheng hi a muh ahi viel die?” a tiu a.

⁵⁷Tichun, a chung ah a lungkim ta puou a. Himahlele, Isu’n a kawm u ah, “Thiemgau chuh amah khuo lam leh amah In mai tih loh achun limbawl loh in a um kha puoi,” a ti a.

⁵⁸Chun, a ginchak loh ziekun zie tak achun thilmak a hih tam puoi.