Read Gangte MATTHAI 14 Bible Online

MATTHAI 14 - Gangte bible

MATTHAI 14

¹Zielai tak chun leng Herod chun Isu chanchin chuh a na za a, a sawntawlawite kawmah,

²“Zie chuh Baptist Johan kha ahi chuh; a thisa hung tho kit ahi ta chu uo; zieziekchun zie thilhih theih na haw chun amah ah a sem ahi chu,” a ti a.

³Herod chun a suohpihpa Philip zi Herodias ziekin Johan chuh a man a, a kan a, suongkul a a na khum ahi ta a.

⁴Johan chun a kawmah, “Amah na kichênpih hi a thieng puoi,” a tih sak ziekin.

⁵Herod in thah a nuom a, himahleh Juda mipite chuh a lau a, Johan chuh thiemgau a a seh ziekun.

⁶Himahlele Herod pienni lawp ni chuh a hung tun phetin Herodias chanu. chuh a lai ah a lam a, Herod chuh a sukipak ta a.

⁷Zieziekchun, a nget taphawt piek dingin kihâksiel in thu a tiem ta a.

⁸Tichun amah chun a nu tîlguk in, “Taka hin kuong in Baptist Johan lu ei pie’n” a ti a.

⁹Chun, leng chuh a lungkham ta a, himahlele a thutiem haw leh a ankuong umpih haw ziek chun piek ding thu a pie ta a.

¹⁰Tichun, mi a sawl a, suongkul a Johan lu chuh a tan sak a.

¹¹Tichun, a luchang chuh kuong in a hun chawi u a, numei chapangnu kawm achun a pieu a, amah chun a nu kawma chun a chieh pih ta a.

¹²Chun, Johan sinsakte chun a luong chuh a va lau a, a vui u a, chun, a chieh u a, Isu a va hilh tau a.

¹³Chun, Isu’n zie chuh a zak phetin, tak apat chun kuong in gamgaw lam ah amah chauh in a chieh ta a. Himahlele, mipite chun a zak phet un, khawpihaw apat chun kenga chieh in a zui tau a.

¹⁴Tichun, amah chuh lui pang a kaih phetin, mipi nasatak a mu a, a lungsiet ta mah mah a, a damloteu a sudam a.

¹⁵Nitâk lam a hung hih phet chun a sinsakte a kawmah a hung u a, “Zie tak hi gamgaw mun ahi a, ni le a tâk ta ngâl in, mipi haw hi, khuo a nek ding a va kichâwk theihna dingun sawldawk in,” a tiu a.

¹⁶Himahlele, Isu’n a kawm u ah, “A chieh dawk uh a ngai puoi, nang un nek ding pieu in,” a ti a.

¹⁷Amau chun a kawmah, “ Zie hin chângthâk pêk nga leh nga nih chauh ka nei ui,” a tiu a.

¹⁸Isu’n a kawm u ah, “Zie hin ka kawmah hun chawi u,” a ti a.

¹⁹Tichun mipi haw chu hampa chunga chu dingin thu a pie a; chun, chângthâk pêk nga leh nga nih chu a la a, van lam en in, a vangsak a. A phelsuoh a, chângthâk haw chu sinsakte kawmah a pie a, chun, sinsakte chun mipi haw kawmah a pieu a.

²⁰Chun, a bawn un a neu a, a vah chiet tau a; a nekval u chule bawm sawm le nih a luok dim uh a.

²¹A ne haw chuh, numei leh chapang simloh in, pating chiet le sangnga val ahiu hi.

²²Chun, mipi haw chuh a kikhen sak viel kâl in gâl khat lama na chieh masa dingin sinsakte chuh kuong in a sawl a.

²³Mipi cheng chuh a kikhen sak nung in, paucham dingin tângah amah mai in ava chieh chuom a. Nitâk lam a hung hih phetin, tak achun amah mai in a um ta a.

²⁴Zielai chun kuong chuh dîl lai lam ah chun gamla tak ah a um ta a, huih in a hilo lama a mût ziekin tui kinawk in a vawk viel viel ta a.

²⁵Chun, thingzangvak ding kuon in dîl chunga kenga chieh in a kawm lam uh a hun zuon a.

²⁶Sinsakte chun amah chuh dîl chunga kenga chieh a vak muh u chun, “Thadam ahi khu,” ti’n thavai a lau in a kiko zak tau a.

²⁷Himahlele, Isu’n amau haw chuh a na hopih zieng a, “Lungmuong takin um un; kei ka hi a puo, lau kiu in,” a ti a.

²⁸Chun, Peter in a dâwng a, “LALPA nang na hih leh tui chunga na kawma hungna ding thu nei pieh,” a ti a.

²⁹Isu’n a dâwng a, “Hung ta leh,” a ti a. Khutichun, Peter chuh kuong apat chun a kum tha a, Isu kawm lam zuonin tui chunga chun keng in a chieh ta a.

³⁰Himahlele huih in tui a mut fawn a muh in a lau a; tum dingin a kisa ta a, “LALPA, ei hukdam ah,” tin a kiko ta a.

³¹Ziephet chun, Isu’n kintakin a bân zieng a, a tu a, a kawmah, “Aw mihiem taksanna tawm, bang dinga ginglah na hi?” a ti a.

³²Kuong a a chut gel phat u chun, huih chuh a hai ta a.

³³Tichun, kuong a umte chun, “Pathien Chapa na hi takzet na hi,” tin amah a chibai u a.

³⁴Chun, dîl gâl langkhat a kaih phet u chun, Genesaret gam a tung tau a.

³⁵Zie muna umte chun Isu a het phet un, zie kiengvêla gam cheng achun mi a sawl viel u a, damlo chengcheng chuh Isu kawmah a hun pui u a.

³⁶A puon mawng bêk tham sak dingin a ngên u a; tichun, a tham taphawt chuh a hung dam zel tau a.