Read Gangte MATTHAI 17 Bible Online

MATTHAI 17 - Gangte bible

MATTHAI 17

¹Chun, ni gup zawh chun Isu’n Peter te, Jakob te leh a suohpih Johan te chuh a pui a, a chuom in tâng sang tak ah a chieh toh pih ta a.

²A et zing lai u chun, a mel put zie chuh a hung lamdang ta a; a mai chuh ni guolin a hung vak a, a silhlechente chuh êng guolin a hung vam ta a.

³Chun, ngaitie, Mosi leh Elijah chuh amah tawh kiho in a kawm u ah a kilâk u a.

⁴Ziephet chun, Peter in Isu kawmah, “LALPA, ei u dingin taka um hi a phai; na ut leh bâwkcha thum khawh ka ting; nang dingin khat, Mosi dingin khat, Elijah dingin khat,” a ti a.

⁵A gen lai takin, ngaitie, meitang vam takin amau haw chuh a hun lieh ta a, chun, ngaitie, meitang apat chun aw gi khatin, “Ziehi ka chapa deih tak, ka lungkimna mah mah chuh ahi; amah thu ngai un,” a ti a.

⁶Chun, sinsakte chun zie chuh a het un, maia tuol si’n a khupbawk u a, a lau mah mah tau a.

⁷Chun, Isu’n amau chuh a hun tham a, “Tho unla, lau kiu,” a ti a.

⁸Tichun, a dâk dawk uh a, Isu tihloh chuh kuomah a mu ta puou a.

⁹Chun, tâng apat chuh a hung suk lai un, Isu’n a kawm u ah, “Mihiem chapa hi mithi lak apat a thawhkit masang sieh na thil muh u kha kuomah hilh kiu,” tin thu a pie a.

¹⁰Ziephet chun, a sinsakte chun a kawmah, “Danthuzikte’n, Elijah a hung masa ding ahi, a tih u hi bangti dana a tih uh ahi die aw?” ti’n a dawng uh a.

¹¹Chun. amah chun, “Elijah chuh a hung ding him ahii, bangakai le siem pha’n a.

¹²Himahlele, ka hilh na hiu hi, Elijah chuh a hungsa him ahi tai, a hin, amah chuh a na he puou a, a nawp nawp un a na bawl tau hi. Khutibang mah chun Mihiem Chapa hin le a laku ah hun thuok ding ahi,” ti’n a dâwng a.

¹³Ziephet chun, sinsakte chun, Baptist Johan thu a kawm u ah a gen ahi tih a hun he tau a.

¹⁴Chun, mipite kawm a hung tun kit phet in, mi khat a kawmah a hung a, a ângah khupdin in,

¹⁵“LALPA, ka chapa khu lungsiet in, Phungzawlvei ahi a, a gim mah mah a, tamtak vei mei ah a puk lut sek a, tui ale tamtak vei a puk lut tai.

¹⁶Na sinsakte kawmah ka hun pui a, a hihdam thei ngâl puou a,” a ti a.

¹⁷Chun, Isu’n, “Aw, khangthak, taksan nei lo a genhakte haw, bang chana na kawm u a ka um a, bang chana ka hun hungaih ding? Naupang chuh taka hin ka kawmah hun pui un,” a ti a.

¹⁸Tichun, Isu’n thitha chuh a gai a, a sung apat chuh a pawt ta a; zie dâkkâl akipat chun naupang chuh a na dam ta a.

¹⁹Zie nung chun sinsakte chuh Isu kawmah a chuom in a hung u a, “Bangati a kei un delh dawk thei lo ka hiu hi?” a tiu a.

²⁰Isu’n a dâwng a, “Zie tawbang hi pauchamna leh anngawlhna ngâllo in a hih thei puoi.”

²¹“Tihtakzet a ka hilh na hiu hi, ankam mu chang khat tieh taksanna na neih u chun, zie tâng kawma hin, ‘Zie tak apat hih zie khun va kichawn ah,’ tiu in na tin uh, kichawn zieng ina; tichun, nang u dingin hihtheihloh bangmah um puo’n a,” a ti a.

²²Chun, sinsakte chuh Galili gama a hung kikhawp lai un, Isu’n a kawm u ah, “Mihiem Chapa hi mihiemte khuta matsak a hung um ding ahi; tichun

²³that untin, a ni thum ni chu leh kaihthawh in um ina,” a ti a. Ziephet chun, sinsakte chuh a lungkham mah mah tau a.

²⁴Chun, Isu leh a sinsakte chuh Kapernaum a hung tun un. Pathien Ho-In a dangka dawlte chuh Peter kawmah a hung u a, “Na sinsakpau inle Ho-In dangka chu a pie sek puo maw?” a tiu a.

²⁵Peter chun, “Pie sek e,” a ti a. Peter chuh In sunga a va lut phetin Isu’n a kawmah, “Simon, bangti’n na ngai a? Lei a lengte’n sieh ahim, sum neih man ahim chu kuo kawmah a la sek u? a chateu kawm ahi, mi dang kawmah?” ti’n a na dâwng masa a.

²⁶Peter chun a dâwng a, “Mi dang apat in,” a tih phetin Isu’n a kawmah, “Khuti a hih chun chate chuh a awl hi ding ahiu chu.

²⁷Himahleh, zie mipi haw hi suklungkim loh I nuom puou hi. Tichun, nang dîl ah va chieh inla, ngakuoi khâi in la, nga hung pawt masapen chuh man in, chun, a kha na keu tieng leh dangka nih mu zieng in la; zie chuh la’n la, kei leh nanga dingin a kawm u ah pie’n,” a ti a.