Read Gangte MATTHAI 18 Bible Online

MATTHAI 18 - Gangte bible

MATTHAI 18

¹Zielai tak chun sinsakte chuh Isu kawmah a hung u a, “Van gam ah kuo a lopipen die le?” a tiu a.

²Chun, Isu’n chapang neucha khat a kawmah a sama, a laku ah a din sak a,

³Tihtakzet a ka hilh na hiu hi, Na kihei u a, chapang neucha bang na hung hih loh u chun, van gam ah lut hiel puo’n lau.

⁴Khutichun, kuole zie chapang neucha guola kingainiem ta chuh zie ngêi chuh van gama chun lopipen ina.

⁵Chun, kuole ka min zieka zie tawbang chapang neucha lawp ta chuh kei ei lawp hi’n a.

⁶“Amahvang chuh kuole, zie ka thu gingcha mi neucha cha haw laka khat le supuk ta chuh, a ngâwng u ah suong sumhei lien tak awh sak in tuisuohgiet thuk tak sung ah kikhe lut leh amah dingin phazaw khawp puo’n a.

⁷Pûkna haw ziekin khawvel chung a gik hi! pûkna haw chuh hung um ding vang a hin; himahlele pûkna umsaktu chung chuh a gik hi!

⁸“Chun, na khut in ahim, na keng in ahim a hun sukpûk chun, tan inla, paihmang kei ah; khut nih nei ahim, keng nih nei ahim a kumkhuo meia paih sang chun, piensuol in ahim, kêngbâi ahim a hinna a lut chuh nang dingin a pha zawi.

⁹Chuleh, na mitin a hun sukpuk chun kheuhdawk inla paihmang kei ah; mit langnih nei a Gehen meia paih sang chun, mit langkhat nei a hinna a lut chuh nang dingin a pha zawi,

¹⁰“Zie mi neucha haw laka khat hile musit lo dingin chingthei un;

¹¹A vânsâwlchâkteu in van ah ka Pa van a um mel chuh a mu zing sek ui tih ka hilh na hiu hi.

¹²“Bangti’n na ngai u? Mi kuon le belam za nei hen la, a lak uh a khat vakmang hen la hi leh, sawmkuo leh kuote chuh nusieh in tângah va chieh in, a mang chuh hawl lo ding ahim?

¹³Tihtakzet a ka hilh na hiu hi. a va muh kit khâk chun, sawmkuo leh kuo vak mang lo haw sang chun a chungah kipâk zaw’n a.

¹⁴Zie tawbang mah chun zie mi neucha cha haw laka khat manthai hile na pau van a um deihlam ahi puoi.

¹⁵“Chun, na suohpih in na chungah thil hihkhiel hen la hileh, chieh inla, amah leh nang mai het ah a gitlohna achun hilh in; na thu a ngaih leh na suohpih chuh na zawh hi’n a.

¹⁶Himahleh, na thu a ngaihnawp loh le vang chuh mi dang khat ahim nih ahim, pui in la, khutia chuh thil cheng chuh hetpih nih ahim. thum ahim kama hih det a hih theih na’n.

¹⁷Chun, amau haw thu le a ngaih loh zel leh, sapchuomte kawmah tun ah; chun sapchuom thu le a ngaih loh chun, amah chuh nang dingin Jentel leh siehdawl bang hi hen.

¹⁸“Lei chungah bang hitaleh na kân tâk u chuh van ah kân hi’n tin, lei chungah bang hitaleh na phel tâk u chuh van a le phel hi’n a.

¹⁹“Tihtakzet a ka hilh na hiu hi, lei chunga hin na laku a mi nih a thil ngetna thuu a a kithuguol u chun. ka Pa van a um in amau dingin hih sak ina.

²⁰Mi nih ahim, thum ahim ka min a a kikhawpna tak u achun a laku ah ka tel sek hi.” a ti a.

²¹Zie chun, Peter a hunga a kawmah, “LALPA, ka suohpih in ka chungah bang zat vei thil hihkhiel leh ka ngaihdam ding ahi die? sagih vei tiengin ahi die?” a ti a.

²²Isu’n kawmah, “Sagih vei tiengin,” ka ti puo’n “Sagih vei mun sawmsagih tiengin, ka hung ti zaw ahi.

²³Zieziekchun, van gam chuh leng kuo ahim, a suokte kawma sum chanchin hih dik guo chu tawh tehkal ahi.

²⁴Tichun. a hun hih dik guot phet chun mi khat talent singkhat ba, a kawmah a hun pui u a.

²⁵Chun, piek ding a neih loh ziekin a pu chun amah tawh, a zi tawh a chate cheng tawh a neih chengcheng tawh khawt a, dit ding thu a pie a.

²⁶Khutichun. suok chun, ‘Hepu, ka chung ah zahngai tadih inla, a bawnin hun din vek ing ka,’ ti’n a masang ah a khupbawk a.

²⁷Tichun, zie suokpa pu chun a lungsiet mah mah ta a, a suokpa chuh a thahdawk a, a bat chuh a ngaidam ta a.

²⁸Himahlele, zie suokpa chuh a chiehdawk a; a suok chanpihte laka khat a makhai zakhat ba a mu a, a kawmah, ‘Na bat kha nei pieh,’ tin a gawl in a man a.

²⁹Khutichun, a suok chanpih pa chuh khupbawk in ‘Ei hungaih tadih inla hun pie nang ka,’ ti’n hah nget in a ngên a.

³⁰Himahlele, a nuom puoh a, tichun, a pui a, a bat a chaih masang sieh chu suongkul ah a khum ta a.

³¹Khutichun, a suok chanpihte chun a thilhih chu a muh un, a lung-awilo mah mah u a, a thilhih cheng chu a puu a va hilh tau a.

³²Ziephet chun a puu chun, amah chuh a sama, a kawmah, ‘Suok gilo, na hah tau ziekin na bat chengcheng kha ka hun ngaihdam na hi a;

³³nang ka hun lungsiet guol a kha nang inle na suok chanpihte na lungsiet ding hilo maw?’ a ti a.

³⁴Khutichun a pu chuh a lungna ta a, a bat chengcheng a chaih masang sieh chuh mi sugimtheite kawmah a pie ta a.

³⁵Mitin in na lunggil tak u a na suohpihteu na ngaihdam loh u chun, ka pa van a um inle khutibang tak chun na chungu ah hih ina,” a ti a.