Read Gangte MATTHAI 19 Bible Online

MATTHAI 19 - Gangte bible

MATTHAI 19

¹Chun, tihi ahi a, Isu’n zie thu haw chuh a gen zawh phetin, Galili gam apat a pawt a, Jordan luigal a Judia gam achun a va chieh ta a.

²Mipi nasatak in amah chuh a zui u a, tichun amau haw chuh a na sudam ta a.

³Chun, Pharisaite khenkhat a kawmah a hung u a, a mah zedap na’n “Bang ziek hita leh mi’n a zi mâk a thieng dem?” a tiu a.

⁴Isu chun, “Atûng apat a amau haw siempa khan numei leh pasal a siem a,

⁵‘Zieziek tak hin pasal in a nu leh a pa nusieh in a zi pawm intin; tichun, a nih u chun sakhat hung hi ta’n au,’ a tii tih na sim puou hi?

⁶Khutichun, nih ahi ta puou a, sakhat ahi zaw tau hi. Zieziekchun, Pathien in a gawp sa chuh mihiem in khen kiheh,” a ti a, a dâwng a.

⁷Amau chun a kawmah, “Bang zieka Mosi’n kimâkna lehkha a piek a, mâk ding thu a piek a?” a tiu a.

⁸Isu’n a kawm u ah, “Mosi’n na lung khauh ziekuh ahi na ziteu mâk ding ahun tih sak; himahlele a tûngin khutichu a na hi puoi. Ken chuh ka hilh na hiu hi,

⁹‘Kuole zawlsaih ziek hilo a, a zi maa midang kichênpih ta chuh, zawlsai ahii; mâksa kichênpih chule zawlsai ahi tih ka hun hilh na hiu hi,” a ti a.

¹⁰A sinsakte chun a kawmah, “Zi chungchanga pasal thu khutichu a hih chun kichên hi a pha puoi,” a tiu a.

¹¹Amah chun la a kawm u ah, “Zie thu chuh mi tapoh in a pawm thei puou hi, a piekte mai tih loh chun.

¹²Mikiget, a nu sung apat a zi nei theilo dinga pieng him le a um u a, mihiem khuta kiget le a um u a; van gam zieka mikiget a kibawl kawm le a um ui. Kuole, a pawm thei ta’n kipawm u hen,” a ti a.

¹³Zie lai chun, a chung u a a khut nga a, a paucham sak dingin chapang neucha cha ahun pui u a; chun sinsakte chun a na gai u a.

¹⁴Isu chun la, “Chapang neucha cha chuh ka kawmah hun sawl unla, haw kiu in; van gam chuh ziehaw tawbanga ding hi ahii,” a ti a.

¹⁵Chun, a chungu ah a khut a nga a, tak apat chuh a chieh mang ta a.

¹⁶Chun, mi khat a kawmah a hung a, “Sinsakpa, kumsawt hinna ka neih theihna dingin thilpha bang ka hih die?” a ti a.

¹⁷Isu’n a kawmah, “Thilpha thu bang dinga ei dawng? Mi pha chuh khat mai a um; a bang hita leh, hinna a lut na nawp chun thupiek haw chuh zawp ah,” a ti a.

¹⁸Amah chun a kawmah, “A hawipen hi em?” a ti a. Chun Isu’n, “Tuol na thah ding ei puoi; Zawl na saih ding ei puoi; Na gucha ding ei puoi, Zuou thu’n mi na hêk ding ei puoi;

¹⁹Na nu leh na pa limbawl in, tih haw leh, Nangmah na kihehpih guolin na vengte le na hehpih ding ahi, tih hi,” a ti a.

²⁰Tangval chun a kawmah, “Zie thu haw chengcheng chuh ka neu apat ka zawp sek hi; a dang bang ka hih nalai die?” a ti a.

²¹Isu’n a kawmah, “Pha bukima um na nawp leh chieh in la, na neih chuh khawng inla, neilahte kawmah pie’n khutichun, van ah go nei in la; chun, hung inla, ei zui ah,” a ti a.

²²Tangval chun zie thu chuh a het phetin, lungkham takin a chieh mang ta a, sum tamtak nei mi a hih ziekin.

²³Ziephet chun, Isu’n sinsakte kawm achun, “Tihtakzet a ka hilh na hiu hi, mi neizo a dingin van gama lut chuh haksa tak ahi.

²⁴Ka hilh kit na hiu hi, mi neizo Pathien gama a lut sangin, sangawngsau pin bil a a lut pai a baihlam zawi,” a ti a.

²⁵Chun, sinsakte chun zie chuh a zak u chun mak a sa mah mah u a, “kuo a hukdam hi thei ding?” a tiu a.

²⁶Chun, Isu’n amau haw chuh a en a, a kawm u ah, “Zie chuh mihiem dingin hih guol ahi puoi; Pathien dingin chuh bangakai hih theih ahii” a ti a.

²⁷Chun, Peter in a kawmah, “Ngaitie, kei un bangakai nusieh in ka hun zui tau hi; banga ka muh ding u leh?” ti’n a dâwng a.

²⁸Isu’n a kawmah, “Tihtakzet a ka hilh na hiu hi, Siemthakna achun Mihiem Chapa hi a lopina chutphah a chut tieng leh nanguh ei zui haw hi, Israel nam sawm leh nam nih te vaihawm sak in, Lalchutphah sawm le nih ah hung chuh ding na hiu hi.

²⁹Kuole, suohpihte ahim, suohpihnute ahim, nu ahim, chate ahim, gam ahim, ka min zieka taihsan ta chun aleh za muu untin, kumsawt a hinna hung chang un au.

³⁰Himahlele, mi tamtak, a masapen a umte chuh nunung pên in hung um untin; nunung pên a umte chule masapen in hung um un au, a ti a.