Read Gangte MATTHAI 20 Bible Online

MATTHAI 20 - Gangte bible

MATTHAI 20

¹“Van gam chuh mi khat, a grep huon a nasemte guoi dinga zingpi a pawtdawk pa bang chuh ahi.

²Chun, amah chun, nasemhaw chu tawh ni khata makhai lawh dinga a kiho zawh phat u chun, a grep huon achun a sawl ta a.

³Chun, vaihamsang velin a va pawt kit a, mi dang dawl muna ding maimai haw chuh a mu a; a kawm u ah,

⁴‘Nang haw le grep huon ah va chieh tau u, a kilawm dân dân hun pie nang ka,’ a ti a.

⁵Tichun, a chieh tau a. Chun, sun an nek phat vel leh, vaimim huon phat velin a va pawtdawk kit a, khutibang mah chun a hih kit a.

⁶Chun, changkhat nitâk an huon phat velin a va pawt kit a, mi dang le a mu a, a kawm u ah, ‘Bangati a ti a hi ni changtuma ding maimai na hiu hi?’ a ti a.

⁷Amau haw chun a kawmah, ‘Kuoma’n ei gawih loh ziekin ahi,’ a tiu a. Amah chun a kawm u ah, ‘Nang haw le grep huon ah va chieh tau u,’ a ti a.

⁸“Tichun, nitâk a hung hih phetin, grep huon neipa chun a sum vawp pa kawmah, ‘Nasemte kha sam inla, amasapen a pat in a nunung pên gei in a lawh uh pie’n,’ a ti a.

⁹Khutichun, changkhat nitâk an huon phat vela a gawih te a hung phet u chun makhai a mu chiet u a.

¹⁰Chun, a masapente chuh a hung phet u chun, muh tam deuh a kigingchau a; himahlele, amau haw chun le makhai mah a mu chiet u a.

¹¹Tichun, a kilak phet un, a in neipa chunga chun a phunchiek tau a,

¹²‘Zie a nunga te hin dâkkâl khat mai a sem u a, nangin keihaw, nisa satlai cheng thuok a semte hi tawh nei kibat sak mai hih,’ a tiu a.

¹³Amah chun la, a laku a mi khat kawmah, ‘Guolpa, na chungah bangmah ka hihkhiel dang e! makhai lawh dinga kiho I hi puo?

¹⁴Nangmah a kha la’n la, chieh mai ah, nang ka hun piek zat chuh a nunung pên te kawma hin le ka pie nuom hi.

¹⁵Keia chuh ka nawp nawp ka lawh theih hilo ahim, a hih loh leh, kei ka phat ziekin nangin na mitthîp ahim?’ a ti a, a dâwng a.

¹⁶Khutibang chun, anunung pên te le amasapen hung hi’nau, amasapente chu le anunung pên hung hi’nau,” a ti a.

¹⁷Chun, Isu Jerusalem a a va chieh toh lai in, sinsak sawmlenihte chu a puichuom a, lampi achun a kawm u ah,

¹⁸“Ngaitiem u, Jerusalem a chieh to ding I hiu ui, Mihiem Chapa hi Thiempuliente leh Danthuzikte khuta matsak a um ding ahi; tichun, amau chun a chungah thi dingin thu hihpuk untin,

¹⁹nuihsan a mat ding leh, zêp ding leh kross a khetdên ding in Jentel te kawmah pie’n au; chun, ni thum ni, leh kaihthawh in um ina,” a ti a.

²⁰Zie lai chun Zebedai zi chuh a chapate hun pui in Isu kawmah a hung u a, a masang ah a khupdin a, thil banga him a ngên a.

²¹Isu chun a kawmah, “Bang ahim na deih?” a ti a. Amah chun a kawmah, “Zie ka chapate nih hi na gam ah, na changlama khat, na veilam a khat a chut theihna dingun thu pie’n,” a ti a.

²²Isu chun la, “Na nget u chuh na he puou hi, ka khawn dâwn ding hi na dâwn thei ding um?” ti’n a dâwng a. Amau chun, “Thei e” a tiu a.

²³Amah chun a kawm u ah, “Ka khawn dâwn ding chuh dâwn thei un lau, himahleh, ka changlam leh ka veilam a chut ding thu chuh kei piek ding ahi puoh a, ka pa guot sakte ding hi zaw’n a,” a ti a.

²⁴Khutichun, sawm dangte chun zie chuh a na het phet un, unau nih te chung achun a lungkim ta puou a.

²⁵Isu chun amau haw chuh a sama, “Jentel te chunga vaihawmte chuh a chungu ah a lal mah mah sek u a, a milien teu chun a chungu ah thu a nei mah mah ui tih na heu hi.

²⁶Himahlele, nang haw laka vang khutichu hi puo’n a, kuole, na laku a milien hih nuom ta chuh, nanguh hun zen a pang zaw ding ahi:

²⁷kuole na lak u a masapen hih nuom te chuh na sawntawlawi u a a um ding ahi.

²⁸Mihiem Chapa hi zen a um dinga hung ahi puoh a, mi zen ding leh, mi tamtak tatna dinga a hinna pie dinga hung a hih guol hin,” a ti a.

²⁹Chun, Isu leh a sinsakte Jerikoh khuo a pata a pawt lai un, mipi nasatak in a zui u a.

³⁰Chun, mitdûk nih lam panga chu chun Isu a hung hi tih a het phet un, “LALPA, David chapa, kei uh ei lungsiet ah,” ti’n a kiko u a.

³¹Chun, mipite chun, Thip un, ti’n a gai u a; himahlele, amau chun, “LALPA, David chapa, kei uh ei lungsiet ah,” ti’n a kiko ngeih zaw deuh u a.

³²Chun, Isu a dinga amau chuh a sama, “Na chungu ah bangtia ka hih a na deih uh?” a ti a.

³³Amau chun a kawmah, “LALPA, mit vak ka deih ui,” a tiu a.

³⁴Ziephet chun, Isu’n a lungsiet mah mah a, a mit uh a khawih a, tichun, a hun mu thei tau a, amah chuh a zui tau a.