Read Gangte MATTHAI 22 Bible Online

MATTHAI 22 - Gangte bible

MATTHAI 22

¹Chun, Isu’n amau haw a hopih a, tehkal thu’n a kawm u ah a gen kit a,

²“Van gam chuh leng kuo ahim a chapa zi neih ni a guolvakna siem chuh tawh tehkal ahi.

³Tichun, guolvakna an a siem chuh ne dingin a mi chielte sam ding chun a suokte a sawl a, himahlele a hung nuom puou a.

⁴Chun, amah chun, ‘Ka mi chielte kawma khan,’ Ngaitiem u, ankuong chuh ka siem tai, ka bâwngchal haw leh ka gan vak thau te ka that a, bangakai zawh ahi tai; guolvakna an ne dingin hung tau in, ti dingin a suok dangte a sawl kit a.

⁵Himahlele, a na bengkhawn puou a, amau kawn chietah a chieh tau a, khat chuh a lo ah a chieh a, khat chuh a sumkawlveina ah,

⁶mi dangte chun a suokte chuh a man u a, zahhuoi takin a bawl u a, a that tau a.

⁷Khutichun, leng chuh a lungna ta a; a sepaih hawn a sawl a, zie tuolthat haw chuh a sumang a, a khuou le a hâl sak ta a.

⁸Chun, a suokte kawm achun, ‘Guolvakna an kuong chuh siem zawh ahi tai, ka chielte vang kha chuh ne hâwi ahi puou hi.

⁹Khutichun, lamkathuom haw a chun chieh unla, mi na muh tâk u chuh guolvakna an ne dingin chiel un,’ a ti a.

¹⁰Tichun, zie suokte chuh a pawt u a, lampi haw achun a va chieh u a, a muh tâk phawt u chuh, migilo hileh, mi pha hileh, a hun puikhawm tau a, tichun, guolvakna indan chuh a mi chielteu chu a hung dim ta a.

¹¹“Himahlele, leng chuh a mi chielteu en dinga a hung lut phet in, kichênna puon silh lo mi khat tak achun a mu a, tichun a kawmah:

¹²‘Zawl, bangati a, kichênna puon silh lo a taka hi hung lut na hi?’ a ti a. Himahleh, amah chuh a thip kêi a.

¹³Tichun, leng chun a suokte kawmah, ‘A khut leh a keng kân unla, pawlam thim lak ah paih dawk un; tak achun kah leh hagiel chuh um ina,’” a ti a.

¹⁴“Tamtak sap ahiu a, himahleh, tel te vang chuh tawmcha ahiu ui,” a ti a.

¹⁵Zie lai chun Pharisaite a pawtdawk u a, a thugena a mat theihna dingun a va kiho u a.

¹⁶Tichun, a sinsakteu, Herod lawi a mite tawh a kawmah a sawl u a, ziete chun, “Sinsakpa, mi diktat na hi a, hilh tak zetin Pathien lampi thu na hilh sek a; kuomah hugin chuom le na nei puoi tih ka heu hi, kuomah maizah chuom le na nei diek puoi.

¹⁷Zieziekchun, bangti’n na ngai a? Kei uh ei hilh tie khai! Kaisar kawma sieh piek hi a dân ahi, hilo?” a tiu a.

¹⁸Himahlele, Isu’n a thiltup gûk uh phatloh dân chuh a na he a, “Nang haw, mi gukhahte haw, bang dinga ei zedap? Sieh dangka chuh ei etsak u,” a ti a. Tichun, a kawmah makhai khat a hun lau a

¹⁹Chun, amah chun a kawm u ah, “Ziehi kuo lim leh kuo min a leh?” a ti a. Amau haw chun a kawmah, “Kaisar,” a tiu a.

²⁰Ziephet chun Isu’n a kawm u ah, “A hih tak nung, Kaisar thil haw chuh Kaisar kawmah pieu inla,

²¹Pathien thil haw chuh Pathien kawmah pie tau inla.” a ti a.

²²Zie thu haw chuh a het phet un, mak a sa ten u a; amah chuh a taihsan u a, a chieh mang kêi tau a.

²³Zie ni mah chun, Saddukai lawi, thawhkitna a um puoi tite chuh a kawmah a hung u a; a kawmah,

²⁴“Mi cha nei lo in thi hen la hileh, a suohpihpa’n a zi chuh luoh in, a suohpihpa ding chun suon a neih sak ding ahii, Mosi’n a ti a.

²⁵Awle, tuhin ka laku ah, pasal sagih a um u a, a upapen in zi a nei a, a thi a, chun suon a neih loh ziekin a zi chuh a suohpihpa luoh dingin a nusieh a;

²⁶Khutibangmah chun a nihna chule a um a, thumna chule a um kit zel a, sagihna tiengin a um chiet u a.

²⁷Chun a bawn u a a thih nung u chun numei chule a thi ta a.

²⁸Khutichun, thawhkitna achun sagihte lak achun kuo pên zi ahi ta die? A bawn un a kichênpih chiet ngâl u a?” ti’n a dawng u a.

²⁹Isu’n a kawm u ah, “Pathien lehkha thu leh Pathien thilhih theihna na hetloh ziekun na ngai khiel sek uh ahi.

³⁰Thawhkitna achun kichênna um ta puo’n tin, van a vânsâwlchâkte guol khuh hi zaw tan au.

³¹Chuleh, mithi thawhkitna thu a Pathien in na kawm u a a gen kha na sim puou maw?

³²‘Kei Abraham Pathien, Isak Pathien, Jakob Pathien chuh ka hi,’ Pathien chuh mithi Pathien ahi puoh a, mihing Pathien ahi zawi” a ti a, a dâwng a.

³³Chun, mipite chun zie chuh a zak un, a thugen chuh mak a sa ten uh a.

³⁴Pharisaite chun, Isu’n Sadukaite chuh a niel dawng kei hi tih a het un, a kikhawm tau a.

³⁵Tichun, amau haw laka mi danhe khatin amah zedapna dingin,

³⁶“Sinsak pa, Dan thu a chun bang thupiek hi a a lien pên?” tin a, dawng a.

³⁷Isu’n a kawmah, “LALPA na Pathien chuh na lunggil chengcheng, na thagau chengcheng leh na lungthim chengcheng in na hehpih ding ahi.

³⁸Zie chuh thupiek lienpen leh khawkpen ahi.

³⁹Chun, a bana a kibatpih chuh ziehi ahi, ‘Nangmah na kihehpih guolin, na vengte le na hehpih ding ahi,’ tih hi.

⁴⁰Zie thupiek nih te ahin dân thu leh thiemgaute thu cheng a kikhaikhawm vek hi,” a ti a.

⁴¹Chun, Pharisaite a kikhawp lai u chun, Isu’n amau haw chuh thu a dawng a,

⁴²“Krista chuh bang tawbang hi dingin na gingchau hi? Kuo cha ahim?” a ti a.

⁴³Amau chun a kawmah, “David chapa,” a tiu a.

⁴⁴Ziephet chun, Isu’n a kawm u ah, “David in: ‘LALPA chun ka LALPA kawmah, Na melmate na kêngpêk nuoia ka kawih masang sieh, Ka chang lam ah chu zingin,’ a ti a.

⁴⁵Khutia David in Krista chuh ‘LALPA’ a tih chun, bangti’n a, a chapa a hih theih ding?” a ti a.

⁴⁶Ziephet chun, kuoma’n kam khat chan le a dâwng thei ta puou a, zie ni a kipat chun kuoma’n thu dang himhim a dawng ngam ta puou hi.