Read Gangte MATTHAI 24 Bible Online

MATTHAI 24 - Gangte bible

MATTHAI 24

¹Chun, Isu Pathien Ho-In apat a pawt a, a chiehdawk lai in, a sinsakte chuh Pathien Ho-In kisak dante chuh etsak dingin a kawmah a hung u a.

²Amah chun a kawm u ah, “Zie chengcheng hi na muu maw? tihtakzet in ka hilh na hiu hi, zie a suong kitieng haw hi sukchip loh himhim um puo’n a, a bawn hin sukchip vek hi’n a,” ti’n a dâwng a.

³Chun, Isu olive tânga a chut lai chun, sinsakte chuh a mau mai in a gûkin a kawmah a chieh u a. “Ziehaw chuh bangtik leh e, a hung um ding? Na hung kitna ding leh khawvel beihna ding melchikna chuh bang a hi die? ei hilh in,” a tiu a.

⁴Chun Isu’n a dâwng a, a kawm u ah, “Kuoma’n a hun dawha bawl lohna dingin chingthei un,

⁵Mi tamtakin, ‘Krista chuh ka hii,’ tin ka min in hung untin, mi tamtakin hun dawha bawl ding a hi ngâl uh a.

⁶Chun, kido thu leh kido thuthang hun zan lau, na lungzîn lohna dingun chingthei un; ziehaw chuh a hungtung ding him ahi; himahlele, a tawpna chuh hi tadih puo’n a.

⁷Nam chuom leh nam chuom kido un tin, gam chuom leh gam chuom kido un tin; mun chuom chuom ah kiel tung intin, leilîng le um ina.

⁸Ziehaw chengcheng chuh nauhanat kipatna ahi.

⁹“Zie tieng chu leh gawtna thuok dingin hun matsak untin; hun that un tin uh ka min ziekin nam chengcheng muhdah hi’n lau.

¹⁰Zie tieng chu leh mi tamtak puk un tin, kimatsak tuoh un tin; kimudah tuoh un au!

¹¹Chun, thiemgau lêm tamtak hung pawt un tin, mi tamtak hun thêm un au.

¹²Chun, gitlohna a hung pun ding ziekin, mi tamzaw hehpihna chuh hung dai in a.

¹³Himahlele, a tâwp tienga thuok ngâp ta chuh hukdam in um in a.

¹⁴Chun, zie gam chanchin Pha hi nam chengcheng hetsakna dingin khawvel pumpi ah gen in um intin; zie zawh chu leh tawpna chuh hungtung in a.

¹⁵“Khutichun, thil kihdak-um luoksuok-um tak, thiemgau Daniel in a gen khah, mun thiengtho a ding na muh tieng u leh.” (a sim tan a umzie he hen)

¹⁶“Juda gama umte chu tânghaw achun tai mang u hen!

¹⁷In chunga um chu, a In sunga thil chuh la dingin kum ki heh.

¹⁸Chuleh, lo a umte chule a puon la dingin kîkkit diek kiheh!

¹⁹Zie ni chu leh gaite leh chasen neite chung chuh gik in a.

²⁰Na taihmang phat ding u chuh phalbi ahim, chawlhni a hima a hungtun lohna dingin paucham un.

²¹Zie tieng chu leh gimtheihna nasatak um ding a hi ngâl a; khutibanga nasa himhim chu, lei kisiem tûng apat, tu tieng hin a na um kha puoi, bangmah tikin um le hung um diek ta puo’n a.

²²Zie nihaw chuh Pathien in a hih chawm ta a, hih chawm lo hileh, mihiem himhim dam in suokcha puo’n au, himahlele, a mi telte ziekin a hih chawm ta a.

²³“Chun, mi kuo’n le zie tieng chu leh na kawmuh a, ‘Entie, Krista chuh tak ahin a um,’ ahim, ‘taka khun a um’ ahim a hun tih uh chun, amah chuh gingcha kiu.

²⁴Krista lêmte leh thiemgau lêmte hung pawt ding ahi ngâl uh a. Ziete chun melchikna nasatak leh, thilmak lopitak hun etsak un au, a hihtheih diek chun, telte nasan le hun dawha bawl ding ahiu hi.

²⁵Ngaitiem u, ka hun hilh masak diem na hiu hi, khutichun, na kawmuh a,

²⁶“Ngaitiem u, gamthip ah a um hi, a hun tih u chun, chiehdawk kiu; chuleh, ‘Indan sungnung ah a um hi’ a hun tih u chun amau chuh gingcha kiu;

²⁷Kawlphe suohlam a hung kipan a, tumlam a a kimuh guolin, Mihiem Chapa hung kitna ding chule zie tawbang chuh hi ding ahi.

²⁸“Hawi ale saluong umna tâkah mulukawlhte le um khawm un au.

²⁹“Himahlele, zie tawbang ni dahum tak zawh chuleh ni chuh hung thim intin, tha vak ta puo’n tin, van apat in aksite hung kie’n tin, van thilhih theihna haw chuh suklîng a um ding ahi.

³⁰Tichun, Mihiem Chapa melchikna chuh van ah kilang in tin. Zie tieng chuleh leia chitin in a âwm kichup untin, Mihiem Chapa hi thilhih theihna leh lopina nasatak tawh a van mei chunga hung mu’n au.

³¹Pêngkun gi nasatak tawh, chun, a van sawlchakte chuh lei ning li achun sawldawk in tin, tichun, a mi telte chuh kâwlmawng apat kâwlmawng tâwp tiengin lakhawm un au.

³²“Tichun, theipi kung a hin a tehkal thu zil un: A bâk a hung sel a, a nah a hung palh tieng leh nipi hi ding ahi, tih na he sek ui.

³³Khutibangmah chun nanghaw’n le zie chengcheng chuh na muh tiengu leh, amah chuh a hung nai ta a, kawtpi bul ngêi ah a um tai tih heu in.

³⁴Tihtakzet a ka hilh na hiu hi, ziehaw chengcheng chuh a tun kim masang sieh tulai khang thakte hi bei puo’n a.

³⁵Lei leh van bei in tin, ka thu vang chuh bei puo’n a.

³⁶“Himahlele, zie ni leh a phat chuh Pa ngâllo chun, van a vânsâwlchâkte’n le, Chapa’n le a he puou hi.

³⁷Chun, Noah dam lai guol mah kha Mihiem Chapa hung kitna ding chuh hi’n a.

³⁸Tui let ma chun, Noah kuong a a lut ni gei khan a ne’n a chau a, zi leh pasal in a kinei u a;

³⁹himahlele, tui a hung let a, a bawn uh a a tawh mang masieh chun bangmah a he puou. Mihiem Chapa hung kitna ding chule khutibangmah chuh hi’n a.

⁴⁰Zie phat chu leh lo ah mi nih um untin, khat chu lâk in um in tin. khat chu nutsieh in um ina.

⁴¹Numei nih buh gawihnelna achun buh gawi nêl in um untin, khat chu lâk in um in tin, khat chu nutsieh in um ina.

⁴²Khutichun, khawthengai un, na Lalpau chuh bang ni a hung ding ahi tih na he puou hi.

⁴³Himahlele ziehi heu in, gucha a hung phat ding a Inneipa’n he hen la hileh, veng in tin, a In sukvan sak puo’n a.

⁴⁴Zieziekchun, nang haw le kiging zingin um un, na ginchak loh phat tak un Mihiem Chapa chuh hung ding ahi ngâl a.

⁴⁵“Kuo pên ahi ding u leh, suok taksanum leh ching, a pu’n a phat chenga a an chanvo dinguh hawp sak dinga a inkawte chunga lawiupa a a kawih chuh?

⁴⁶A pu a hung phat a suok, khutibang hih a a muh te chuh mi hampha hi’nau.

⁴⁷Tihtakzet a ka hilh na hiu hi, a neih chengcheng chungah lawiupa’n kawih ina.

⁴⁸Amahvang chuh, suok gilo chun, a lungthim in,” Ka pu hung vak ding ei puoi, ti’n

⁴⁹a suok chanpihte na vel ta hen la, zukhamte kawma ne’n cha taleh,

⁵⁰zie suokpa pu chuh a ginchak loh ni’n, a het loh kâl in hung in tin.

⁵¹a pu chun tum nih hung suoh in tin, mi gukhahte chan bang chuh chan sak ina. Taka chun kah leh hagiel chuh um ina.