Read Gangte MATTHAI 27 Bible Online

MATTHAI 27 - Gangte bible

MATTHAI 27

¹Chun, zingkal a hung hih phetin, thiempu liente leh vantâng upa chengcheng chuh Isu thahna ding chungchâng thu ah a kiho u a.

²Khutichun, Amah chuh a kân u a, a puidawk uh a, gamsung vaihawmpa Pilate kawmah a pie tau a.

³Chun, a matsakpa Juda khan, Isu chuh mawh a chan sak ui tih a het phetin a kisik a, dangka sawmthum kha thiempu liente leh upate kawm achun a hun chawi kit a,

⁴“Mi diktat thisan ka matsak kha thil ka hihkhiel ahi,” a ti a. Amau chun la, “Zie chuh kei uh dingin banga khawk? Nangin na lawh lawh kilawh ah,” a tih san u a.

⁵Tichun, Juda chun dangka chuh mun thiengtho achun a seplut a, a taihsana, tichun, a chieh mang a; a va kikhailum ta a.

⁶Khutichun, thiempu liente chun dangka chuh a lau a, “Ziehi tuoklawm bawma kawih a thieng puoi, thisan man ahi ngâl a,” a tiu a.

⁷Tichun, a kiho u a, malzinte vuihna dingin Beldengte mun chuh chawkna’n a mang tau a.

⁸Zieziekchun ahi, zie mun chuh tu tienga, “Thisan Mun,” a tih tâk u hih.

⁹Zie chuh, thiemgau Jeremia’n: “Chun, dangka sawmthum Israel suon kuote ahim in aman ana sak uh chuh

¹⁰A lau a, LALPA’n a tiem guolin, Beldengte mun man dingin a pieu a,” ti a a gen kha a hung tung tai.

¹¹Chun, Isu chuh Rome gam vaipawpa ma achun a ding a, amah chun a kawmah, “Judate leng na him?” a ti a. Isu’n a kawmah, “Hi e,” a ti a.

¹²Himahleh, thiempu liente leh upate’n a heknau thu achun bangma’n a dâwng puoi.

¹³Khutichun, Pilate in a kawmah, “A hun hêkna zozai u hi he lo na him?” a ti a.

¹⁴Himahleh, kam khatcha’n le a dâwng puoh a, gam vaipawpa chun mak a sa ten ta a.

¹⁵Rome gam vaipawpa chun, Chiehkân Kut guolvak ni a hih tieng leh, suongkul tângte laka, mipite’n a nget pên uh khat chuh a thahdawk sek ahi a.

¹⁶Zie lai chun. suongkultâng minthang tak khat, Barabbas, a tih uh chuh a nei u a.

¹⁷Khutichun, a hung kikhawp u chun, Pilate in a kawm u ah, “Kuo pên hun thahdawk sak leng na nuom u? Barabbas ahi die, Isu Krista a tih u hih?” a ti a.

¹⁸Mitthîpna ziekin amah chuh a matsak ui tih amah chun a he ngâl a.

¹⁹Zie ban achun, Pilate chuh vaihawmna chutphah a a chut lai in, a zi’n, “Zie mawhna nei lo hiel chunga khan chuh bangmah hih kih; tuzan khan amah ziekin mang lam in thil tamtak ka thuok hi,” ti’n a vaithak behlap a.

²⁰Thiempu liente leh upate chun, Barabbas thahdawk a, Isu chuh thah ding ti’n mipite chuh a thêm u a.

²¹Himahleh, Pilate chun mipite kawm achun, “A mau nih hi a kuo zaw hi hun thahdawk sak leng na nuom u?” a ti kit a.

²²Chun, amau haw chun, “Barabbas” a tiu a. Pilate in a kawm u ah, “Isu Krista a tih u hi bang ka lawh ta die leh?” a ti a. Amau haw chun. “Amah chuh kross ah khêndên ah.” a tiu a.

²³Chun, Pilate chun a kawm u ah, “Bang dingin em? bang ahih khiel hi?” a ti a. Himahlele, amau haw chun, “Kross ah khên den ah,” ti’n a kihah ko zaw diek u a.

²⁴Ziephet chun, Pilate in bangmah ahih thei ta puoh a, hung buoi zaw deuh deuh ding ahi tih a het in, tui a la a. mipite ma achun a khut a sawp a, “Zie mi diktat thisan ahin ka thieng hi, nangun na lawh lawh uh kilawh un,” a ti a.

²⁵Tichun, mipi chengcheng chun, “A thisan mawh chuh keihaw leh ka chateu chungah um hen,” ti’n a dâwng uh a.

²⁶Zie zawh chun Barabbas chuh a thahdawk a; Isu chuh a zêp a, kross a khetdên dingin a piedawk ta a.

²⁷Zie zawh chun Pilate sepaihte chun Isu chuh gam vaipawpa In, praitoriam ah a puilut u a, a lawi lak uh a mi chengcheng chuh a kawmah a sam khawm uh a.

²⁸Tichun, a puonhaw chuh a suohthak sak u a, puon sandup a silh sak uh a.

²⁹Chun, linglukhuk a phêk u a, a khuk sak tau a; a khut changlama luong mawlh a chawih sak u a; a masangah a bawkkhup uh a, “Chibai, Judate leng!” tin chiemnuih bawlna’n a mang tau a.

³⁰Chil a sietkhum u a, a mawlh chuh a lâksak uh a, a luchang a khet sak u a.

³¹Chun, chiemnuih bawlna a a mat zawh un, puon chuh a suoh sak uh a, amah puon mah kha a silh sak uh a, kross a khetdên dingin a pui tau a.

³²Chun, a hung pawtdawk lai u chun mi khat, Kurini khuo a um Simon kiti chuh a muu a, zepa chuh Isu Kross pu ding chun a man tau a.

³³Tichun, Golgotha a tih uh mun chuh a hung tun un, (zie chuh Luguh mun tihna ahi),

³⁴Isu chuh uain thuk, thil kha tawh kihel a dâwn dingin a pieu a; himahlele, a tep phetin, a dâwn nuom ta puoh a.

³⁵Chun, kross a a khetdên zawh un, phunsân in a silhlechen haw chuh a kihawm u a.

³⁶Chun, tak achun a chuu a, a veng u a,

³⁷Tichun, amah a heknau “Zie pa hi Isu Judate Leng ahii,” ti a kizik a lu chung ah a tâk u a.

³⁸Chun, Isu tawh, suommang nih, a changlam ah khat, a veilam ah khat a khêndên u a.

³⁹Tichun, mi chieh viel-vak vielte chun a luchang uh thing in, “Nang, Pathien Ho-In phel a, ni thum sunga sakit ding pa, nang leh nang kihihdam ah:

⁴⁰Pathien Chapa na hih chun kross apat khan hung kum ta,” ti’n a êngho uh a.

⁴¹Khutibangmah chun, thiempu liente chun, danthuzikte tawh êngho in.

⁴²“Mi dang bawn hihdam sek a, amah la a kihihdam thei ngâl puo’n. Israel leng hilo maw tuhin, kross apat chun hung kum ta he, tichun amah chuh gingchai tiu.

⁴³Pathien a taksang hilo maw, a nawp chun, tuhin hukdam hen; Pathien Chapa ka hi, a ti ngâl a,” a tiu a.

⁴⁴Chun, suommang. a khetdên u chun le khutibang mah chun a êngho a.

⁴⁵Chun, sun an nêk phat apat vaimim huonphat gei in gam pumpi chungah thim a hung zing ta a,

⁴⁶Vaimim huonphat vel chun Isu chuh, “Eli, Eli, lama sabakthani,” ti’n ngeih tak in a hung kiko a, zie chuh, “Ka Pathien, ka Pathien bang dinga ei taihsan na hi?” tihna ahi.

⁴⁷Tichun, a kawmuh a dingte abang chun, zie chuh a zak phet un, “Zie pa hin Elija a sap ahii,” a tiu a.

⁴⁸Chun, a lak uh a mi khat a tai vak a, sponj a la a, uain thuk in a dieh chek a; luong mawlh lêk ah a tâk a, a vak dâwn sak a.

⁴⁹Himahleh, midang chun, “Tichun um hen, amah latha dingin Elija a hung ei mawh, en hitiu,” a kitiu a.

⁵⁰Chun, Isu chuh ngeih tak in a hung kiko kit a, tichun, a thagau a thah ta a.

⁵¹Chun, ngaitie, Pathien Ho-In puonzak chuh a chung lam apat in a nuoi lam gei in a hung kithek ta a. Lei a hung kilîng a, suongpi haw chuh a hung khiphel a;

⁵²thân haw chuh a hung kihawng a, mi thiengtho tamtak thisa te chule kaihthawh in a um tau a.

⁵³Ziehaw chun thân chuh a taihsan u a, Isu thana a thawhkit nung chun, Khawpi Thiengtho a chun a lut u a, tichun, mi tamtak kawmah a kilak u a.

⁵⁴Chun, sepaih za lawiupa leh a kawma Isu venga umte chun leiling leh thil umzie haw chuh a muh un, a lau mah mah tau a, “Zie pa hi, Pathien Chapa ahi takzet nai,” a tiu a.

⁵⁵Zie tak a chun numei tamtak, Isu hun panpih kawm zela, Galili gam apat a hun zuite chuh a um u a, gamla tak apat in thil u a.

⁵⁶Ziehaw lak achun, Mari Magdalin, Mari Jakob leh Joses nute, Zebedai chapate nut a tel u a.

⁵⁷Chun, nitâk lam a hung hih phet chun, mi neizo khat, a min Joseph, Arimathai khuo a um a hung a, amah chule Isu nungzui a na hi a.

⁵⁸Zie pa chuh Pilate kawmah a va chieh a, Isu luong chuh a ngên a. Tichun, Pilate chun Isu luong chuh Joseph kawma pie dingin thu a pie a.

⁵⁹Tichun, Joseph chun Isu luong chuh a la a, patngat puon ngim takin a tuom a;

⁶⁰amah thân dinga suong a vih hawm zawh tûng cha achun a siel ta a. Chun, thân kawta chun suong lien tak khat a kawih a, a chieh mang ta a.

⁶¹Chun, zie tak achun Mari Magdalin leh Mari dang chuh thân lam nga’n a chuu a.

⁶²Chun, a zing chun, (zie chuh Kiginni zawh zing ahi) thiempu liente leh, Pharisaite chuh Pilate kawmah a kikhawm u a,

⁶³a kawmah, “Hepu, zie mi lepchiehpa chun a damlai khan, ‘Ni thum zawh leh thokit ing ka,’ a tih kha ka hezing ngâl u a.

⁶⁴Zieziekchun, thân chuh ni thum ni tienga vengpha dingin thupie tie; khutilochun, a sinsakte chun amah chuh va guu intin, vantâng kawmah, ‘Mithi lak apat thokit ahi tai,’ ti kha’n au. Tichun, zie dawha nunung zaw chuh a masa sang khan pha mawh zaw khâna,” a tiu a.

⁶⁵Ziephet chun, Pilate in a kawm u ah, “A veng ding sepaih na nei u khala, chieh unla, a bitthei tawpin va ngak phat sak un,” a ti a.

⁶⁶Khutichun, a chieh u a, suong chuh a melchik u a, thân chuh a ven sak tau hi.