Read Gangte MATTHAI 3 Bible Online

MATTHAI 3 - Gangte bible

MATTHAI 3

¹Zielai chun Baptist Johan chuh Judia gamthip ah thugen in a hung a,

²“Lunghei un, vangam chuh a nai tai,” tin.

³Amah chuh ahi, thiemgau Isai-in, “Gamthip a mi kiko khat chun, ‘LALPA lamlien lai unla, A lampi hêi zang un,’ a tii,” ti a a gen kha.

⁴Zie Johan chun sangawngsau mul puon a silh a, a kâwng savun kâwnggak in a gâk a, a an chuh khaupepi leh gam khuoizu ahi.

⁵Zielai chun Jerusalem khuo a mihaw, Juda gama mi chengcheng leh Jordan luidung vela mi chengcheng chuh a kawmah a hung u a.

⁶A gitlohnateu kiphuong in Jordan luia chun a khut ah baptistma a chang tau a.

⁷Himahlele, Pharisaite leh Sadukaite tamtak baptistma chang dinga hung a muh phetin a kawm u ah, “Gûl suonte haw! lungnat hung tung ding hi taihsan dingin kuo hun hilh na hiu hi

⁸Na gitlohnateu na haihsan ui tih het theihna ding thilte chuh hih un.

⁹Abraham ei suonpau ahi tin kisuong kiu in; Pathien in zie suonghaw hile Abraham suon a suoh sak thei hi tih ka hun hilh na hiu hi.

¹⁰Tu zieng hin le heicha thing bul tin ah a kawih tau hi; khutichun thing tin, gah pha suoh lo cheng chuh phuk in, mei ah a paih sek ui.

¹¹Ken chuh na lunghei ui tih suklatna’n tui in ka hun baptist sek a, ka nunga hung ding pa hin chuh Thagau thiengtho leh mei in hun baptist ding ahi. Kei sangin a lopi zaw a, a kengtawbek khau phel hâwi le ka hi puoi.

¹²A khut in a leipuk a chawi a, a phuol zap thieng kei intin, buhpanga chun a buh khum in tin, a si vang chuh mei mittheilo in hâl tum ina,” a ti a.

¹³Zielai chun Isu chuh Johan kawmah baptistma chang dingin Galili gam apat in Jordan lui ah a hung a.

¹⁴Johan chun lah, “Nangin nei baptist ka kûl zaw ngâl a, kei kawma hung zaw na hi maw?” tin dal a guo a.

¹⁵Himahleh Isu’n a kawmah, “Tu’n lemsa hâm ah, zie tawbang diktatna chengcheng hih muolsuoh hi ei u dingin thil kilawm ahi ngâl a,” ti’n a dâwng a. Khutichun lem a sa ta a.

¹⁶Tichun, Isu chuh baptistma a chan zawh zawh chun tui apat in a pawtdawk zieng a, chun, ngaitie, amah dingin van a hung kihawng a, Pathien Thagau chuh vakhu banga hung kum in a chunga hung chuh a mu a.

¹⁷Chun, ngaitie, van apat a aw khatin, “Ziehi ka chapa deihtak, ka lungkimna mah mah chuh ahi,” a ti a.