Read Gangte MATTHAI 4 Bible Online

MATTHAI 4 - Gangte bible

MATTHAI 4

¹Zie zawh chun Isu chuh Diabol thepa um dingin gamthip ah thagau puih lut in a um ta a.

²Tichun, ni sawmli leh zan sawmli an a ngawlh nung chun a gil a hung kiel ta a.

³Chun, thempa chuh a hung a, a kawmah, “Pathien Chapa na hih leh zie suonghaw hi chângthâk suok dingin thu pie’n,” a ti a.

⁴Himahlele Isu’n a dâwng a, “Mihiem hi chângthâk mai in hing puou untin, Pathien kama thu pawt in hing zaw’n au, tih zik ahi,” ti’n a dâwng a.

⁵Zie zawh chun Diabol in khawpi thiengtho Jerusalem a chun a pui a, Pathien Ho-In sipzum ah a kawih a, a kawmah,

⁶“Pathien chapa na hih leh ketha’n, ‘Na chungthu ah a vânsâwlchâkte thu pie’n tin; A khut un hun dawm un tin, Khutilochun na keng in suong suih kha kha’n la’ tih zik ahi ngâl a” a ti a.

⁷Isu’n a kawmah, “LALPA na Pathien zedap kih, tih zik ahi,” a ti a.

⁸Chun, Diabol chun tâng sang tak ah a puikit a, khawvel gam chengcheng leh a lopina haw chuh a etsak a.

⁹A kawmah, “Khupbawk in ei chibai in la, ziehaw chengcheng hi hun pie vek ing ka,” a ti a.

¹⁰Ziephet chun Isu’n a kawmah, “Setan, chiehmang kêi ah! ‘LALPA na Pathien ho inla, amah na chauh sem in’ tih zik ahi ngâl a,” a ti a.

¹¹Zie nung chun Diabol in a taihsan ta a; tichun Vânsâwlchâkte a hung u a, a na a hung sep sak tau a.

¹²Chun, Johan suongkul a khum ahi tih Isu’n a zak phetin Galili lam ah a chieh ta a.

¹³Nazareth khuo nusieh in Kapernaum khuo a hung tunga, zie tak achun a um zing ta a; zie chuh Zebulun leh Naphtali huop sung dîl panga um ahi.

¹⁴Zie chuh thiemgau Isai in a gen,

¹⁵“Dîl lama Jordan gâl a, Zebulun gam leh Naphtali gam; Galili a Jentel te gam;

¹⁶Thim nuoia chute chun vak lopitak a muu a; Thihna mun leh a lîma chute chunga chun vak a hung pawt tai!” ti a a gen kha a hung tun theihna dingin ahi.

¹⁷Zie apat chun Isu’n, “Lunghei un, vangam a nai ta ngâl a,” tin a gen pan ta a.

¹⁸Chun, Isu chuh Galili dîl panga a chieh lai in, unau nih, Simon, (Peter kiti) chuh a suohpihpa Andrew tawh dila lên sep a mu a nga man mi a, hi him u a.

¹⁹Isu’n a kawm u ah, “Ei zui un, tichun mihiem man dingin hun siem ing ka,” a ti a.

²⁰Tichun a lên hawu nusieh in, amah a zui pai zieng tau a.

²¹Chun, zie apat chun a chieh zel a, unau dang nih, Zebedai chapa Jakob leh a suohpih Johan chuh, a pau Zebedai kawmah kuong a a lên hawu bawlpha’n a mu a, amau chuh a sam ta a.

²²Tichun, kuong leh a pau chuh taihsan in amah chuh a zui pai zieng tau a.

²³Chun, Isu’n a kikhawpna In hawu a sinsak in, Gam chanchin pha chuh gen in, mite laka natna tin chenga na leh hatlohna tin cheng hihdam in, Galili gam chengcheng ah a vak viel a.

²⁴Tichun, Suria gam chengcheng ah a chanchin a thang ta a; tichun mi damlo chengcheng, damlohna leh natna tin cheng thuokte, thitha mat haw, phungzawl vei haw, zeng haw a kawmah a hun pui u a, a na hihdam a.

²⁵Khutichun, Galili gam apatte, Dekapoli khuo apatte, Jerusalem khuo apatte, Judia gam apatte, Jordan gâl apatte chun mipi nasatak in amah a zui u a.