Read Gangte MATTHAI 6 Bible Online

MATTHAI 6 - Gangte bible

MATTHAI 6

¹“Na thilpha hihteu mihiemte muh a hih lo dingin chingthei un; khutilochun na Pau van a um kawm apat kipahman nei puo’n lau.

²“Khutichun, thilpiek mi kawma na piek tieng leh, mi, mi gukhah te’n pahchak ding deihna a, kikhawpna Inhaw leh khawlai dung le vaia a hih sek guol un, na mau ah pengkun mût kiu. Tihtakzet a ka hilh na hiu hi, a kipahman uh a mu zo tau hi.

³Nangun vang thilpiek mi na piek tieng u leh, na khut changlam un a hih chuh na khut veilam in he kiheh

⁴Na thilpiek u chuh a gûka hih a hihtheihna dingin, khutichun, na Pau, a gûka hun mu sek pa chun hun din ina.

⁵“Chun, na paucham tieng u leh, mi, migukhahte banga na um dinguh ei puoi; ziete chuh mi’n a muh theihna dingun kikhawpna Inhaw leh khawlai lamthuom haw a dinsa a paucham a nuom sek ui. Tihtakzet a ka hilh na hiu hi, a kipahman uh a mu zo tau hi.

⁶Himahlele, nang haw chuh na paucham tieng u leh, na indan sunggil u ah lut un la, na kawtkhak inla, na pau a gûka um pa kawm achun paucham un, tichun, na pau a gûka hun mu sek pa chun hun din ina.

⁷“Chun, na paucham tieng u leh Jentel te guolin vêl gen maimai kiu; a gen tam ziek u a ngaihthaka um dingin a kigingchau hi.

⁸Zieziekchun, amau haw guolin um kiu; amah kawma na nget mau in na Pau in na sinmawh thil teu chuh a he ngâla.

⁹Khutichun, nang haw chuh hitibang hin paucham un: ‘Ka pau van a um, Na min zah in um henla,

¹⁰Na gam hung tung henla. Na deih bang van a hih a hih bangin lei ah hih hi hen.

¹¹Tuni a ka nek khawp uh an ei pie’n.

¹²Ka bat uh ei ngaidam in; Kei un le ka thil bateu ka ngaihdam tâk bang un.

¹³Thepna ah ei puilut ki’n la, Gitloh apat in ei hukdam zaw’n; Gam leh, thilhih theihna leh, lopina chuh, Kumsawt in nanga ahi ngâl a. Amen.’

¹⁴“Mi a sukkhelhnau na ngaihdam u chun, na Pau van a um inle hun ngaidam ina.

¹⁵Himahlele, mihaw a sukkhelhnateu na ngaihdam loh u chun na pau van a um inle na sukkhelhnau hun ngaidam diek puo’n a.

¹⁶“An na ngawlh tiengu lele mi, migukhahte guolin nguoi mel pu kiu; amau haw chun mite muh a anngawl a hih uh a kilat theihna ding in a mel uh a hih zatchuom sek ui. Tihtakzet a ka hilh na hiu hi, a kipahman u chuh a mu zo tau hi.

¹⁷Himahleh, nang un vang an na ngawlh tieng u leh, na luchang uh thau nuh un la, na mai u phiet un.

¹⁸Khutichun, mihiemte maa an ngawl a lang lo a, na Pau a gûka hun mu pa mit muh chauh a chuh na lat theihna dingun; tichun, na Pau a gûka hun mu sek pa chun hun din ina.

¹⁹“Leia leikha leh tui-êk in a nêk siet na leh, guchate’n a vihvan u a a gûk theihnau ah nang u dingin go khawlkhawm kiu.

²⁰Vana leikha leh tui-êk in a nêk siet lohna leh guchate’n a vihvan u a a gûk lohnau ah nang u dingin go khawlkhawm zawu in.

²¹Na go uh umna chengah na lungthim u le um ina.

²²“Sapum thaumei chuh mit ahi a, zieziekchun na mit uh a chîm chun na sapumpiu le vak suok ina.

²³Amahvang chuh, na mit uh a siet le vang, na sapumpiu chuh thim suok ina. Khutichun, nangmau a vak chuh thim hi taleh thim chuh a nasa na ding e!

²⁴“Kuoma’n to nih na a sem kawp thei puoi; khat chuh mudah in, khat chuh deihchuom in ahim, a hihloh leh khat chuh limbawl in khat chuh simmawh ding ahi ngâl a. Pathien leh sum na na sem kawp thei puou hi.

²⁵“Zieziekchun ka hilh na hiu hi, bang ne a bang dâwn ding ka hi ta die aw? ti’n na hinna thuu leh bang silh a cheng ding ka hi ta die aw? ti’n na sapum thuu lungkham pih kiu. Nek ding sangin hinna a lul zaw hilo maw? Silhlechen sang inle sapum a lul zaw hilo maw?

²⁶Chung leng vachate hi en tiem u! buh a tuh puou a, ât le a ât puou a, buh In ale a thak khawm puou hi; himahlele na Pau van a um chun a vâk ahi. Amau haw sangin nanguh nasatak in na lul zawu hilo maw?

²⁷Na lak u a lungkham zieka kuo a a dung tawng khata sân beh sak thei?

²⁸“Chun, silhlechen thu a bang dinga lungkham na hiu hi? Gam lili pak khuh phatak in ngaihtuoh tiem u; na a sem puou a, pat le a khêk puou hi;

²⁹himahlele ka hilh na hiu hi, Solomon nasan le a lopina chengchenga a kivan inle zie lili pak khat pha hinle zêpin a um puoi.

³⁰Khutichun, gam hampa, tunia hing a, a zinga thuk a tih kit zieng ding bawn Pathien in zie bang lawm a a zem chun, nanguh taksan tawmte haw silhlechen hun pie zaw khawp lo ding maw?

³¹“ ‘Khutichun, bang ne a, bang dâwn ding ka hiu hi? tih leh, bang silh a cheng ding ka hiu hi?’ tin lungkham pih kiu.

³²(Ziehaw chuh Jentel ten a hawl sek uh ahi.) Ziehaw chengcheng chuh na sinmawh uh ahi tih na Pau van a um in a he ngâla.

³³A gam leh a diktatna hawl masa zawu un; tichun, ziehaw chengcheng chuh piek behlap a um ding na hiu hi.

³⁴Khutichun, a zinga ding lungkhampih kiu; a zing chun amah ding kingaihtuoh ding ahi ngâla. Zie ni a ding a thil phalo ana umsa chuh a ni a ding chun ahun set hi.