Read Gangte MARK 1 Bible Online

MARK 1 - Gangte bible

MARK 1

¹Pathien Chapa, Isu Krista Chanchin Pha tun kipatna chuh;

²Thiemgau Isai lehkhabu a, “Ngaitie, ka sawlchak na ma ah ka sawl a, Amah chun na lampi bawl ina.

³Gamthip a mi kiko aw chun, LALPA lamlien lai un la, a lampite hihzang un, a tii,” ti a a zik guol khan.

⁴Gamthip ah Johan in a baptist a, chun, thil hihkhelh ngaihdamna dingin lungheina baptistma thu a gen a.

⁵Tichun, Judia gama mi chengcheng leh Jerusalem khuo a mi chengcheng a kawmah a chieh uh a, a gitloh hawu thupha chawiin, Jordan lui ah ama’n a bawn un a na baptist a.

⁶Chun, Johan chuh sangawngsau mul puon in a kivan a, a kâwng chuh savun kâwnggak in a gâk a; a an chu khaupe leh gam khuoizu ahi.

⁷Chun, ka nung ah kei sanga thilhih thei zaw hung ding ahi, khuna a kengtawbek khau phel hâwi le ka hi puoi.

⁸Ken chuh tui in ka hun baptist a; amah chun vang thagau thiengtho in hun baptist ina, ti’n a gen a.

⁹Zie nung sawtlo cha chun, Isu chuh Galili gama Nazareth khuo apat in a hung a, Jordan lui ah Johan in baptist a chan sak a.

¹⁰Tui apat a a pawtdawk zawh zawhin, van kihawng ah, Thagau chuh vakhu banga a chunga hung kum a mu a.

¹¹Tichun, van apat in aw a hung pawt a, “Nang, ka Chapa deihtak, ka lungkimna mah mah chuh na hi,” ti’n.

¹²Chun, thagau in amah chuh gamthip ah a sawldawk pai zieng a.

¹³Tichun, Setan thep in gamthip achun ni sawmli a um a, gamsa haw lak ah a um a, chun, vânsâwlchâkte’n a zenviel tau a.

¹⁴Chun, Johan suongkul a khuma hih nung in, Isu Galili gam ah Pathien Gam Chanchin pha gen in a hung a,

¹⁵“Hun chuh a hung tung ta a, Pathien gam le ahung nai tai; lunghei un la, Chanchin pha hi gingchau in,” ti’n.

¹⁶Isu chuh Galili dîl panga a chieh lai in, Simon leh a suohpihpa Andrew chuh dila lên sep a mu a; ngaman mi ahi him u a.

¹⁷Isu’n a kawm u ah, “Ei zui u, tichun Mihiem man in hun siem ing ka,” a ti a.

¹⁸Chun, amau chun a len hawu a nusieh uh a amah a zui pai zieng u a.

¹⁹Chun, chawmkhat a chieh kit u leh, Zebedai chapa Jakob leh a suohpihpa Johan a mu a, amau chule lên bawlpha a kuong a um ahiu a.

²⁰Isu’n amau chuh a muh muhin, a sam pai zieng a; tichun, a pau Zebedai chuh sum lawh a a mi gawihteu chu tawh nusieh in amah a zui tau a.

²¹Chun, Isu leh a sinsakte chuh Kapernaum khawpi chuh a lut uh a; Chawlhni’n kikhawpna In ah a lut a, thu a sinsak pai zieng a.

²²A thu sinsak chuh mak a sa mah mah u a; dân thuzikte bang lo a, thuneihna nei bang taka amau haw a hilh ziekin.

²³Zie lai chun, a kikhawpna In u achun thithabuok vawp mi khat a um a; amah chuh a hung kiko dawk a:

²⁴“Nazareth Isu, kei u leh nang, banga I kimatnau um? Kei uh ei sumangthai dinga hung na him? Kuo na hih ka hun hêi, Pathien Mi Thiengtho na hi!” ti’n.

²⁵Isu’n amah chuh a gai a, “Thip in la, a sung apat hung pawt ah,” a ti a.

²⁶Tichun, thithabuok chun amah sawisa a ngeih tak a kiko in, a sung apat a hung pawt ta a.

²⁷Mipi chengcheng chun mak a sa mah mah tau a, “Ziehi bangti thil a? Ziehi bang kihilhna thak ahi? Thithabuok nasan le thunei takin thu a pie a, a thu a nun zel u hih,” ti’n a kidawng tuoh u a.

²⁸Tichun, Galili gam tuom chengah, gamtin ah a chanchin a thang pai zieng ta a.

²⁹Chun, kikhawpna In apat chuh a pawt u a, Jakob leh Johan tawh, Simon leh Andrew In achun a lut pai zieng u a.

³⁰Himahleh, Simon zi nu chuh khawsik a na’n a na kuol a; a chanchin chuh Isu a hilh pai zieng u a.

³¹Amahnu kawm achun a chieh a, a khut a va tu a, a kaitho a, a khawsik chuh a hai pai zieng a, tichun, a nau a sep sak ta a.

³²Chun, nitâk lam a ni a tum nung in, damlo chengcheng leh, thitha mat haw a kawmah a hun pui u a.

³³a khawzang un kawtkhak bul ah a um khawm pheupho u a.

³⁴Isu chun mi tamtak, natna chichuom chuom a nate chuh a hihdam a, thitha tamtak le a delh dawk a; thithate chun amah a het ziekun, a pau dinguh a za nuom puoi.

³⁵Chun, a zingkal kit ma takin, khawvak ma pek in Isu chuh a tho a, a pawtdawk a, gamthip mun khat ah a va chieh a tak achun a paucham ta a.

³⁶Himahleh, Simon leh a guolte chuh amah hawl in a pawtdawk u a;

³⁷amah a va muh phet un a kawmah, “Mi chengcheng in nang hun hawl ei veu,” a tiu a.

³⁸Chun, Isu’n a kawm u ah, “Zie apat a khuo naituom haw achun chieh hitiu, zie tak haw a chule thu ka gen theihna dingin; zie chuh ka hung lawh pên ahi ngâl a,” a ti a.

³⁹Tichun, thu a gena, thitha haw delh dawk kawm zelin, Galili gamsung cheng a kikhawpnau Inhaw achun a lut zel a.

⁴⁰Chun, Isu kawmah phâk khat a hung a, “Na nawp chun, nei hih thiengtho thei hi,” ti’n a ângah khupdin in, hah nget in a ngên a.

⁴¹Isu’n a lungsiet ta mah mah a, a vak bân a, a khawih a, “Ka nuom hi, a na thiengtho ta’n,” a ti a.

⁴²Tia a gen zawh zawh chun, kintakin, a phâk chuh a hung bei ta a, a hung thiengtho ta a.

⁴³Chun, Isu’n a kawmah “Kuomah kawma bangmah gen lo dingin chingthei in, amahvang chuh thiempu kawmah va chieh inla,

⁴⁴na kithiensak na’n Mosi’n thil a guot haw kha pie’n, a hêtchet na dingun, a ti chak kêi a, a sawldawk pai zieng a.”

⁴⁵Himahlele, amah chuh a pawt a, zie thu chuh nasa taka tângsappih in, a phuongzak ta a. Ziephet chun, Isu chuh tângphuong takin khuo ah a lut thei ta puoh a. Tichun, pawlama gamgaw mun haw achun a um zaw ta a, muntin apat in mipite chuh a kawmah a hung sek uh a.