Read Gangte MARK 10 Bible Online

MARK 10 - Gangte bible

MARK 10

¹Chun, zie apat chun a kipan dawk a, Judia gam leh Jordan gâl lam ah a chieh ta a. Tichun, mipi a kawmah a hung kikhawm kit u a; chun, a hih dân ngeina bangin amau haw chuh a sinsak kit ta a.

²Chun, Pharisai khenkhat chuh a kawmah a hung u a, amah zedapna’n, “Mi’n a zi a mâk hi a thieng em?” a hung tiu a.

³Amah chun a kawm u ah, “Mosi’n bang thu a hun pie?” ti’n amau haw chuh a dawng a.

⁴Chun, amau chun, “Mosi’n chuh kimâkna lehkha zikin kimâk a phalsak hi,” a tiu a.

⁵Himahleh, Isu’n a kawm u ah, “Na lunggil uh khauh ziek apuo zie thupiek ahun zik sak khah.

⁶Himahlele, lei kisiem tûng apat in Pathien in, ‘Amau chuh pasal leh numei in a siem a.’

⁷‘Zieziek hin pasal in a nu leh a pa nusieh in tin, a zi tuchak in tin;

⁸Tichun, amau nih chuh sa khat hung hi ta’n au. Khutichun, amau chuh nih hi ta puou un tin, sa khat hung hi zaw ta’n au,’ ti’n.

⁹Zieziekchun, Pathien in a gawp sa chuh mihiem in khen kihen,” a ti a.

¹⁰Chun, insung achun a sinsakte’n zie thu chuh amah a dawng kit u a.

¹¹Chun, amah chun a kawm u ah, “Mi kuole, a zi maa, midang kichênpih chun a zi chuh zawl a saih san ahi.

¹²Chuleh, numei inle a pasal a mâk a, midang tawh a kichên chun, zawlsai ahi,” a ti a.

¹³Chun, mi khenkhat in a chunguh a a khut a ngak dingin chapang neu haw a kawmah a hun pui u a; chun, sinsakte’n a hun puite chuh a na gai u a.

¹⁴Himahleh, Isu’n a muh phetin, a ki-awi hiel puoh a, a kawm u ah, “Chapang neucha cha ka kawmah hun sawl un la, haw kiu un, Pathien gam chuh zie tawbang mite a ding hi ahi ngâla.

¹⁵Tihtakzet a ka hun hilh na hiu hi, kuole, chapang neute banga Pathien gam lawp lo chuh, a sung ah lut puo’n a,” a ti a.

¹⁶Tichun, amau haw chuh a pawm a, a chungu ah a khut a ngaa, amau chuh a vangsak ta a.

¹⁷Chun, amah chuh chieh dinga a kipat kit lai tak chun, mi khat amah lam zuonin a hung tai a, a masangah a khupdin a, “Sinsakpa pha, kumsawt a hinna ka chan theihna dingin bang ka bawl die?” ti’n a dawng a.

¹⁸Isu’n a kawmah, “Bang zieka pha ei ti na hi? mi khat ngâllo chuh kuomah a pha a um puoi, zie chuh Pathien ahi.

¹⁹Thupiek haw chuh na hêi: ‘Zawlsai kih, tuolthat kih, gucha kih, heksie kih, hetpihtu diklo in pang kih; na nu leh na pa limbawl ah,’ tih haw hi,” a ti a.

²⁰Ziephet chun, ama’n a kawmah, “Sinsakpa, zie thu haw chengcheng chuh ka naupan lai apat a ka zawp ahi tai,” ti’n a dâwng a.

²¹Isu’n amah chuh a en a, a hehpih ta a, a kawmah, “Thil khat na vat nalai hi; chieh inla, na neih chengcheng zuok inla, mi neilahte kawmah pie’n, tichun, van ah go nei in la; chuleh, hung inla, ei zui ah.” a ti a.

²²Himahlele, zie thu kigen chuh a zak phetin, a mel a duptha zieng ta a, lungkham takin a chieh mang ta a, sum tamtak nei a hih ziekin.

²³Ziephet chun, Isu’n a en viel a, a sinsakte kawmah, “Mineizote chuh Pathien gama lut a haksa na ding e!” a ti a.

²⁴Chun, sinsakte chun a thugen chuh mak a sa ten u a, himahleh Isu’n a gen zawm kit a, “Naute haw, hauhsakna muongte dingin Pathien gam lut a haksa na ding e!

²⁵Mi neizo Pathien gama lut sangin, sangawngsau pin bil a lut pai a baihlam zawi,” a ti a.

²⁶Zie thu achun a sinsakte chuh mak sakna’n a dim tau a, “Khuti a hih leh, kuo a hukdam hi thei ding?” ti’n a kidawngtuoh tau a.

²⁷Isu’n amau haw chuh a en a, “Zie chuh mihiem a dingin hih guol ahi puoh a; Pathien a dingin vang hih theih loh a um puoh a, Pathien a dingin thil chengcheng hih theih ahi ngâl a,” a ti a.

²⁸Ziephet chun, Peter in a kawmah, “Ngaitie, kei un bangakai taihsan in ka hun zui tau a” ti’n a gen pan ta a.

²⁹Isu’n a dâwng a, “tihtakzet in ka hun hilh na hiu hi, Keimah ziek leh Chanchin pha zieka In ahim, gam ahim, suohpihpa te, suohpihnute, pa ahim, nu ahim, zi ahim; chate ahim nusieh ta chuh,

³⁰Tu damsung ngêi hin, Inte, suohpihpa te, suohpihnute, nute leh chate, gamte, aleh za a sukgimtheihna te tawh mu lo ding kuomah a um puoi; hun hung tung dinga kumkhuo hinna tawh.

³¹Himahlele, mi tamtak, amasapente chuh anunung pên hung hiu intin; anunung pên te le amasapen hung hi’nau,” a ti a.

³²Chun, Isu leh a sinsakte chuh Jerusalem a chieh to dingin lampi ah a um u a. Isu chuh a masang u ah a chieh a, amau chun mak a sa mah mah u a; tichun, lau kawm kawmin a amah chuh a zui u a. Chun, sawm le nih te chuh a puichuom kit a.

³³“Ngaitiem u! Jerusalem a chieh to ding I hiu a; Mihiem Chapa hi Thiempuliente leh Danthuzikte khuta matsak a um ding ahi. Amau chun thi dingin mawh chan sak un tin, Jentel te kawmah pie dawk un au.

³⁴Chun, amau chun chiemnuih bawlna’n mang untin, zêp un tin, chil sietkhum un tin, that un tin; ni thum ni leh thokit ina,” ti’n a chunga thil tung ding haw chuh a hilh ta a.

³⁵Chun, Jebedai chapate, Jakob leh Johan chuh a kawmah a hung u a, “Sinsakpa, ka deih taphawt uh ei hih sak leh chin ka nuom ui,” a tiu a.

³⁶Chun, Isu’n a kawm u ah, “Nanguh bang hun hih sak leng na nuom u a e?” a ti a.

³⁷Amau chun a kawmah, “Na lopina lalgam a na lalchutphah a na chut tieng leh na changlam ah khat, na veilam ah khat ka chut theihna dinguh ei phalsak ah,” a tiu a.

³⁸Himahlele, Isu’n a kawm u ah, “Na nget u hi na he puou hi; ka khawn dâwn ding na dâwn thei ding u a mawh? chuleh, ka baptistma chan ding le na chang thei ding u ahim?” a ti a.

³⁹Amau chun a kawmah, “Thei e a,” a tiu a. Isu’n a kawm u ah, “Ka khawn dâwn ding chuh dâwn thei un na tin uh; ka baptistma chan ding le chang thei un lau.

⁴⁰Himahlele, ka changlam leh ka veilam a chut ding chuh kei piek ding ahi puoi; a guonggalh sak teu a ding ahi zawi,” a ti a.

⁴¹Chun, sawmte chun zie chuh a zak phet un, Jakob leh Johan chunga chun a lungkim ta puou a.

⁴²Himahleh, Isu’n amau haw chuh a kawmah a sam khawm vek a, a kawm u ah, “Jentel te chunga vaihawm dinga guota um haw chuh a chungu ah a lal mah mah sek u a; a milienteu chun a chungu ah thu a nei mah mah ui tih na heu hi.

⁴³Nang haw laka vang khutichu hi puo’n a; kuole, na lak u a milien hih nuom ta chuh, nanguh hun zenviela a pan ding ahi.

⁴⁴Chuleh, kuole, na lak u a a lienpen hih nuom ta chuh, mi chengcheng suok a hih ding ahi.

⁴⁵Mihiem Chapa hiel le zenviela um dinga hung a hi puoh a, mi zen ding leh mi tamtak tatna dinga a hinna pie dinga hung ahi zawi,” a ti a.

⁴⁶Chun, Jerikoh ahung tung u a; chun, Isu a sinsakte tawh mipi nasatak tawh Jerikoh apat a a pawtdawk lai un, Timai chapa Bartimai chuh lampang ah khutdawh in a na chu a.

⁴⁷Amah chun, Nazareth Isu ahi tih a zak phetin, “Isu, David chapa, ei lungsiet ah,” ti’n a kiko ta a.

⁴⁸Chun, mipite chun thip dingin a gai u a; himahleh, amah chuh, “Nang, David chapa, ei lungsiet ah,” ti’n a hah kiko zaw diek a.

⁴⁹Tichun, Isu a ding a, “Amah chuh va sam tiem u,” a ti a. Khutichun, mitdûkpa chuh a sam u a, a kawm achun, “Thamuong takin um inla, kipan ah; a hun sam hi,” a tiu a.

⁵⁰Chun, a puon a paih a, a ding dawka, Isu kawmah a hung ta a.

⁵¹Tichun, Isu’n amah chuh a na hopih a, “Na chungah bang hih leng na nuom hi?” a ti a. Mitdûkpa chun, “Rabboni, muh theih ka nuom hi,” a ti a.

⁵²Ziephet chun, Isu’n a kawmah, “Chieh ta’n, na taksanna hi na dampih ahi,” a ti a. Tichun, thakhat in a mit a hung vak ta a, lampi achun Isu a zui ta a.