Read Gangte MARK 14 Bible Online

MARK 14 - Gangte bible

MARK 14

¹Chun, ni nih zawh chuh, Chiehkân Kut leh Chângthâk Chawl sawhloh Kut hi ding a hi a; thiempu liente leh dân sinsaktute chun, Isu lepbawl a, a thah theihna dinguh a gûkin a hawl tau a.

²“Kut sungin vang hih puoi tiu, khutilochun, vantâng lak ah buoina um kha’na,” a kitiu a.

³Chun, Isu chuh Bethani a Simon, mi phâk pa In ah a um a. Chun, ankuong a um lai in, numei khat, alabasta bawma spiknard thau gimlim, man tamtak chawiin a hung a. A bawm chuh a khên kêk a, Isu lu chung achun a sung a.

⁴Himahleh, taka um mi khenkhat haw chu a lungnau a, “Bang dinga zie thau gimlim hi a mawk sukmang ahi?

⁵Makhai zathum sanga tam zaw a khawt a, neilahte kawma piek theih ahi ngâl a,” a tiu a. Zie nu chung achun nasatak in a phunchiek tau a.

⁶Isu chun lah, “Bangmah lawh kiu; bang zieka amah hi subuoi na hiu hi? ka chungah na pha a sem ahi.

⁷Mi neilahte chuh na kawm u a um zing ahiu a, na nawp phat phat u leh amau chuh na pha nasep sak thei ui; kei vang chuh na kawm u a um zing lo ding ka hi ngâl a.

⁸A hih theih sun a hih ahi a, ka sapum hi vuih dinga thau ana nuh lawk ahi.

⁹Tihtakzet a ka hun hilh hi, Khawvel pumpi ah, khawiale Chanchin Pha hi a kigenna tâkah, zie numei thilhih hile amah hetzingna dingin gen zel hi’n a,” a ti a.

¹⁰Chun, Juda Iskariot, sawm le nih te laka khat chun, Isu a kawm u a a matsak theihna dingin thiempu liente kawmah a va chieh a.

¹¹Amau haw chun a het phet un, a kipâk mah mah u a, a kawmah dangka piek a tiem tau a. Tichun, a matsakna ding lemchâng a hawl ta a.

¹²Chun, chângthâk chawl sawhloh ni, ni masapen, Chiehkân Kut na ding a thah seknau ni chun, a sinsakte’n a kawmah, “Chiehkân Kut An na nek theihna dingin khawi ah va guong leu ung na nuom hi?” a tiu a.

¹³Isu’n a sinsakte laka nih a sawl a, a kawm u ah, “Khawpi ah va lut un la, pasal khat bela tui pu’n hun na kituokpih intin; amah chuh zui u.

¹⁴Tichun, a lutna In ah, zie In neipa kawm achun, ‘Sinsakpa’n, Ka sinsakte tawh Chiehkân an ka nekna dinguh malzin indan chuh khawitaka?’ a tii, va tiu.

¹⁵Tichun, ama’n indan chungnung lien tak, thuomphuo umsa, guonggalh zawh sa hun na etsak ina; zie tak achun ei u a dingin ana guonggalh un,” a ti a.

¹⁶Chun, sinsakte chuh a pawtdawk u a, khawpi achun a lut u a, a kawm u a Isu’n a gen bang chun a va muu a; zie chun Chiehkân Kut an chuh a guonggalh tau hi.

¹⁷Tichun, nitâk a hung hih phetin, Isu chuh sinsak sawm le nih te chu tawh a hung tau a.

¹⁸Tichun, dawhkan a an a nek lai un Isu’n a kawm u ah, “Tihtakzet a ka hun hilh na hiu hi, na lak u a mi khat, ei nekpih hin ei matsak ding ahi,” a ti a.

¹⁹Sinsakte chu a lungkham tau a, khat khatin a kawmah, “Kei ka him?” A ti chiet u a, chun, a dangte’n le, “Kei ka him?” a tiu a.

²⁰Isu’n a kawm u ah, “Sawm leh nih te laka khat, kuong a chângthâk ei diehpih pa hi ahi.

²¹Mihiem Chapa hi a chanchin a na kizik guol takin chieh ding ahi; himahlele, Mihiem Chapa matsak ding pa chung chuh a gik hi! Zie mihiem chuh a na pieng lo hileh amah dingin phazaw ding ahi,” a ti a.

²²Chun, a nek lai un Isu’n chângthâk a laa, vang a pie a, a phelsuoh a, a kawm u ah a pie a, “Lau inla, neu, ziehi ka sapum ahi,” a ti a.

²³Chun, khawn a la a, kipah thu a gen zawhin, a kawm u ah a pie a; tichun, a bawn un a dâwn chiet u a.

²⁴Chun, a kawm u ah, “Ziehi ka thisana thugawlh thak, mi tamtak a ding a pawt ding, etsakna chuh ahi.

²⁵Tihtakzet a ka hun hilh na hiu hi, Pathien gama a thak ka dâwn ni atun masang sieh, grep guia gah apat dâwn kit ta puo’ng ka,” a ti a.

²⁶Tichun, la a sak zawh un a pawtdawk u a, olive tâng achun a chieh tau a.

²⁷Chun, Isu’n a kawm u ah, “Tuzan in ka chungthu ah na bawn un lungkim lo in hung um vek un lau, ‘Belam chingpa chuh zêp ing ka ting, belam haw chuh kithehzâk un au,’ tih zik ahi ngâla.

²⁸Himahleh, ka thawhkit nung in Galili gama na mau ah chieh ing ka,” a ti a.

²⁹Himahlele, Peter in a dâwng a, a kawmah, “A bawn un hun nusieh vek mah leule, ken vang hun taihsan puo’ng ka,” a ti a.

³⁰Isu’n a kawmah, “tihtakzet in ka hun hilh hi, tuni’n, tuzan mah mah in, âk nihvei a khuon ma’n, nangin thumvei ei kinungzuk san in la,” a ti a.

³¹Himahleh, Peter in, khauh zaw diek in a dâwng a, “Na thihna a thi ding hi leng le, hun kinungzuksan puo’ng ka,” a ti a. Zie tawbang chun a bawn un a ti chiet tau a.

³²Chun, Gethsemani kiti mun chuh a tung u a; Isu’n a sinsakte kawmah, “Ka paucham sungin taka hin chuu in,” a ti a.

³³Tichun, Peter leh Jakob leh Johan a pui a, nasa taka thawmhau in ana lungzîng pan ta a;

³⁴Tichun, a kawm u ah, “Ka lungthim nasatak in a lungkham a, thihna khawp hiel ahi; zie tak a hin um unla, kivêng zingun,” a ti a.

³⁵Chun, masang lam zuonin neu khat a chieh a, tuol ah a bawkkhup a, a hihtheih chun, zie hun chun amah peltha dingin a paucham a,

³⁶“Abba, hepa, bang cheng nangin na hihthei a, zie khawn hi kei apat in lamang in; himahlele, kei thu hilo in, nangmah thu thu hi zaw hen,” a ti a.

³⁷Chun, a hung kit a, a sinsak thum te chuh ipmu’n a mu a. Peter kawmah, “Simon, a ip na hi maw? Dâkkâl khat le kiging zing a um theilo maw?” a ti a.

³⁸Tichun, a kawm u ah, “Thepna a na puk lohna dingun kiging zing unla, paucham un. Thagau in vang a ngâp a, taksa vang chuh a hatlo ahi,” a ti a.

³⁹Tichun, a va chiehdawk kit a, thugen ngêi gen in a paucham kit a.

⁴⁰Chun, a hungkit phetin, amau haw chuh ipmu’n a mu kit a, a ihmut uh a suok ten ngâla; tichun, a dawnna ding le a he ta puou hi.

⁴¹Chun, a hung thumveina achun, a kawm u ah, “Tuhin chuh ipmuu inla kichawl tau in. A hun tai! A hun chuh a hung tung tai! En tiem u, Mihiem Chapa hi migilote khuta matsak a um ding ahi.

⁴²Tho unla, chieh hitiu. Entiem u, ei matsak ding pa chuh a hung nai tai!” a ti a.

⁴³Chun, Isu’n a gen lai takin, Juda sawm le nih te laka khat chuh a hungtung pai zieng a, amah tawh hung kitawn in, thiempu liente leh dân thuzikte leh upate apat in mipi tamtak, chemzâm leh khetbuk chawiin, a hungtung u a.

⁴⁴Chun, a matsak ding pa chun: “Ka châwp pên pên chuh hi’n tin man un la, phataka veng in puimang zieng u,” ti a amau haw chuh tiemtehna a na pieksa diem ahi.

⁴⁵Khutichun, a tun tun u chun, amah chuh a zuon phei a, “Sinsakpa, sinsakpa!” ti’n a châwp a.

⁴⁶Khutichun, Isu chuh a man u a, a kân tau a.

⁴⁷Tichun, a kawm u a dingte laka khat chun a chemzâm a zuk dawka, thiempu lienpen suokpa a sat a, a bil a satthak sak a.

⁴⁸Ziephet chun, Isu’n amau haw chuh a hopih a, a kawm u ah, “Chemzâm leh khetbuk chawiin, gucha man ding guolin, ei man dinga hung pawt na hiu maw?

⁴⁹Pathien Ho-In ah ni chengin, nang haw hun sinsak in ka um sek a, himahleh, nei man puou a. Himahleh, Pathien lehkhathu a guitunna ding ahi,” a ti a.

⁵⁰Tichun, sinsakte cheng chun amah a taihsan u a, a tai mang tau a.

⁵¹Chun, tangval, kuo ahim khatin patngatpuon silh in Isu chuh a zui a. amah chule ana man u a,

⁵²himahleh, a patngatpuon chuh a taihsan a, sangawn in taimang ta a.

⁵³Tichun, Isu chuh thiempu lienpen In achun a pui u a, tak achun thiempu liente leh, dân thuzikte leh upahaw chuh a kikhawm u a.

⁵⁴Peter in amah chuh gamla tak apat in a zui a, thiempu lienpen In huong gei in; mi vengte lak achun a va chu a, mei a awi a.

⁵⁵Tichun, thiempu liente leh vaihawmte chengcheng chun Isu a suklup theihna dingun, a mah hêkna ding a hawl u a, himahleh, khat chale a mu thei puou ui.

⁵⁶Mi tamtakin zuou in a hêk u a, himahleh, a hêkna hawu chuh a kituok thei a um puoi.

⁵⁷Chun, kuote ahim a ding dawk u a, zuou thu’n a hêk u a:

⁵⁸“Zie Pathien Ho-In khuta sak hi phie’ng ka ting, ni thum sungin Ho-In dang, khuta sak loh tung dawk ing ka, a tih ka zau hi,” ti’n a gen u a.

⁵⁹Himahleh, a heknau thu chuh a kituok diek puoi.

⁶⁰Ziephet chun, thiempu lienpen chuh a lai ah a ding dawk a, “Bangma’n na dâwng paw maw? Ziete hun hêkna hi bangti dân a?” ti’n Isu a dawng a.

⁶¹Himahleh, amah chuh a thip kêi a, bangma’n a dâwng puoi. Thiempu lienpen chun Isu a dawng kit a, “Krista, Hampha Pathien Chapa chuh na hi?” ti’n.

⁶²Ziephet chun, Isu’n, “Ka hi, Mihiem Chapa hi, Bangakai hihtheipa khut changlama chuh a, van mei laka hung hun mu ding na hiu hi,” a ti a.

⁶³Ziephet chun, thiempu lienpen chun a silhlechente chuh a bawtthêk a, “Hetpih dang bang dinga ngaih beh ding I hiu a?

⁶⁴Pathien a gensiet zie chuh na za tau hi. Bangti’n na ngai u?” a ti a. Khutichun, a bawn un amah chuh thi tâk ahi, ti’n mawh a chansak chiet tau hi.

⁶⁵Chun, khenkhat in chil a sietkhum pai u a, a mai a tuom sak u a, a bêng u a, a kawmah, “Gen lawk ale,” a tiu a. Chun, suokte chun a bêng diek diek u a.

⁶⁶Chun, Peter chuh nuoilam a In huongsung a a um lai in, thiempu lienpen suok nungakte laka khat a hung a.

⁶⁷Peter mei lum awi chuh a muh phetin, a en a, “Nang le Nazareth Isu kawma um na hi,” a ti a.

⁶⁸Himahleh, amah chuh a kilep, “Ka he puoi, na thugen chule ka hekha hiel puoi,” ti’n, huongcha ah a va pawtdawk a; ziephetchun, âk a khuong ta a.

⁶⁹Chun, suok nungak khatin tak achun a mu kit a, a kawma dingte kawm achun, “Zie pa hi amau haw laka khat ahi,” a ti kita.

⁷⁰Himahleh, Peter chuh a kilep kit ta a. Zie zawh chawmkhat hal chun, a kawma dingte chun Peter kawmah, “Amau laka tel na hi mawngmawng hi; Galili mi na hi ngâla, na pau in a kihei,” a ti kit u a.

⁷¹Himahlele, Peter chun, “Zie mihiem na gen pau chuh ka he puoi,” ti’n amah kihansiet khum hielin a kihâksiel a.

⁷²Chun, âk khuon nih veina chuh a hung khuong ta a. Ziephet chun, Peter in, Isu’n a kawma, “Ak nihvei a khuon ma’n nangin, ka hun he kha puoi, ti’n thumvei ei kilepsan inla,” a tih kha a hedawk a. Zie chuh a ngaihtuoh leh a kap ta a.