Read Gangte MARK 4 Bible Online

MARK 4 - Gangte bible

MARK 4

¹Chun, Isu’n Galili dîl pang achun a sinsak kit a. Mipi nasatak a kawm achun a hung kikhawm tau a, tichun, kuong sung ah a lut a, a chu ta a. Kuong chuh tui lai lam ah a um a, mipite chuh dîl panga sehpho achun a ding u a.

²Tehkal thu mang in thu tamtak a sinsak a, a kawm u ah:

³“Ngaitiem u, buhchi thehpa chuh buhchi theh in a kuon a;

⁴Chun, lo a buhchi a theh lai chun a bang lampi pang ah a kie a, vachate’n a hun luok zo tau a.

⁵A bang chu suongpek, lei patna mun ah a kie a; chun, lei a sah loh ziek in a kek dawk pai zieng a;

⁶himahleh, ni a hung sân deuh phetin, kâk vuoi in ahung um a; zung a neih loh ziekin a gawp mai ta a.

⁷Chun, abang hamlingnei lak ah a kie a, tichun, hamlingnei chu a hung sang a, a dêp mang ta a, gah himhim a suoh puoi.

⁸Chun, a bang chu lei pha ah a kie a, a hung kek a, a hung khang lien a, a gah ta a; aleh sawmthum, aleh sawmgup, leh aleh zakhat bangin a hung pung tai,” a ti a.

⁹Chun, Isu’n a kawm u ah, “Kuole, zakna dinga bil nei chun za hen,” a ti a.

¹⁰Chun, Isu amah chauha a um lai in, sawmlenih te chuh a kawmah a hung u a, tehkal thu chuh hilhchien dingin a ngên u a.

¹¹Isu’n a kawm u ah, “Pathien gam thuguk chuh nang haw het vang phal ahi a, pawlama mite dingin vang chuh zie thil haw cheng hi tehkal thu a hih ahi;

¹²Khutichun, ‘En en un tin uh, mu diek puo’n au; Ngaitha, ngaithau intin, he thei diek puo’n au. Khutilochun, Pathien lam ah kihei untin, A na ngaidam kha’n a,’” a ti a.

¹³Isu’n a kawm u ah, “Zie tehkal thu hi na he thei puou maw? Khuti a hih chun, bangti’n a tehkal thu dang cheng chengte chuh na hettheih ding uh?

¹⁴Buhchi thehpa chun thu a theh ahi.

¹⁵Lampi panga kie haw chuh ziehaw hi ahiu: Thu a zâk zâk un, Setan in a lungthim u a thu kitheh haw chuh a lâksak pai zieng a.

¹⁶Khutibang mah chun suongteu, lei patna muna kie haw chuh ziehaw hi ahiu; Thu a zâk zâk u a kipâk taka pawm zieng te hih;

¹⁷Himahlele, amau achun zung a nei puou a, chawmkhat a pang zo u a; zie nung chu leh, thu zieka haksatna ahim, sukgimtheihna ahim a hung um tieng leh a puk pai zieng sek ui.

¹⁸Chun, hamlingnei laka kie haw chuh ziehaw hi ahiu: Thu chuh a za tau a,

¹⁹Himahlele, khawvel thu ngaihtuohna te, neihzawhna thepna te, leh thil dang utchaknate chuh a hung lut tieng, thu chuh a dêp a, gah lo in a um sek hi.

²⁰Chun, lei phatna muna kie haw chuh ziehaw hi ahi: Thu chuh za a, pawm a, aleh sawmthum, aleh sawmgup leh aleh za a gahte hi ahiu hi,” a ti a.

²¹Chun, Isu’n a kawm u ah, “Thaumei chuh a kawihna a kawih lo a, lawh nuoi ahim, zâlkhun nuoi ahim a kawih dingin a kide ngeia ahim?

²²Phuon loh dinga îm bangmah a um puoh ngâla; lang lo dinga selguk le bangmah a um diek puoi.

²³Kuo’n le, zakna dinga bil a neih chun zau hen,” a ti a.

²⁴Chun, amau haw kawm mah achun, “Na ngaihthak hawu hi ngaihtuoh phau in; na tehnau mah a teh sak hi ding na hiu hi; hun pie tam zaw bawn un au.

²⁵Kuole, a nei chuh piek beh hi’n tin; a neilo chuh, a neihsun le lâksak hi’n a,” ti’n.

²⁶Chun, amah mah in, “Pathien gam chuh zie tawbang hih ahi: Mi’n lo a thaichi a theh tawbang hi ahi.

²⁷Zan a ipmu’n, sun in tho sek leh, thaichi chuh bangti ahim tih he lo a, a hung keh dawk a, a hung khan tawbang hi ahi.

²⁸Lei ngêi chun gah a hun suoh sek a; a tûngin a kung, zie ban achun a vui, zie nung chun a vui achun a chang ting a hung um sek hi.

²⁹Himahlele, a gah chuh a hung min tieng leh, buh ât a hung hun tâk ziekin kawite a pan pai zieng sek ui,” a ti a.

³⁰Chun, Isu’n, “Pathien gam chuh bang tawbang in a I gen tâk ding uh? A hih loh leh, bang tehkalna a mang in I hilhchien ta ding u leh?

³¹Leia chi chengcheng laka neupen, ankam chi, leia kie tawbang chuh ahi:

³²A kitheh nung chun a hung khang dawk a, thai dang cheng sangin a hung lienzaw a, bâk lien taktak ahun nei a; chung lêng vachate le a bâk chun a giek thei sek ui,” a ti a.

³³Chun, zie tawbang tehkal thu tamtak chun, a hettheihna dingun thu a kawm u ah a gen sek a.

³⁴Himahlele, tehkal thu mang lo in vang, a kawm u ah thu a gen ngei puoi; amau haw chauha a um tieng u leh, a sinsakte chuh bang cheng a hilhchien sek hi.

³⁵Chun, zie ni mah chun, nitâk ahih phetin ama’n a kawm u ah, “Lehlam gal ah kai hitiu,” a ti a.

³⁶Khutichun, mipite chuh a taihsan u a, sinsakte chuh Isu kuong a a na umna mah achun a lut u a, a chiehpih tau a.Chun, kuong dang le a kawm achun a um a;

³⁷Tichun, huihpi nasatak a hung nung a, tui kinawk chuh kuong achun a lut zut zut zieng ta a, tichun, hung dim ding ahi ta a.

³⁸Isu chu la kuong mei lam achun, khapchâk khap in a ipmu a. Tichun, sinsakte chun a va phawng u a, a kawmah, “Sinsakpa, ka manthai dinguh khawksa lo na him?” a tiu a.

³⁹Tichun, Isu chuh a hung tho a, huihpi chuh thu a pie a, “Thip inla, um hiet hiet ah” a ti a. Tichun, huih chuh a hai ta a, a hung thip kêi zieng ta a.

⁴⁰Ziephet chun, Isu’n a sinsakte kawmah, “Bang zieka khuti lauh na hiu u? Bang zieka taksanna neilo a um na hiu u?” a ti a.

⁴¹Himahleh, a lau mah mah zieng uh a, “Zie pa hi bangti bang mi phet a hi die aw! huih leh dîl nasan in le a thu a ngaih mai u hi?” ti’n a kiho u a.