Read Gangte MARK 6 Bible Online

MARK 6 - Gangte bible

MARK 6

¹Chun, Isu’n tak mun chuh nusieh in, amah gam lam achun a chieh kit ta a, a sinsakte’n a zui u a.

²Tichun, Chawlhni a hih phetin, kikhawpna In ah amau haw a sinsak ta a, mi tamtak a thugen zate chun mak a sau a, “Zie pa hin zie thu haw hi khawi apat a a het ahi, a khuta thilmak hiti bang a hih hi, a kawma chitna kipie hi bang chitna a hi die?

³Zie pa hi Mari chapa, Jakob te, Joseph te, Juda te leh Simon te suohpihpa, thingkuong siempa kha hilo ahim? A suohpih numeihaw le zie a hi I kawm u a um hilo maw?” a tiu a. Tichun, a chungah a lungkim ta puou a.

⁴Ziephet chun, Isu’n a kawm u ah, “Thiemgau chuh amah gam ah leh, amah behte lak ah leh, amah In ah tih loh ngâl achun limbawl loh in a um kha ngêi puoi,” a ti a.

⁵Chun, mi damlo tawmchah te chunga khut ngaa, a hihdam tih loh ngâl, tak achun thilmak a hih thei ta puoi.

⁶Mipite’n ginchakna a neih loh u chuh mak a sa mah mah a. Chun, Isu’n mipite chuh sinsak kawm zelin, khuo haw chuh a tawh viel a.

⁷Tichun, sawm le nih te chuh a sam khawm a, nih nih zelin a sawldawk ta a; thagau buokte chunga thuneihna a pie a,

⁸“Zinna a dingin tiengkhut ngâllo chuh, sakhau le, chângthâk le, dangka dip a dangka le bangmah keng kiu in,” ti’n thu a pie a.

⁹Himahleh, kengtawbek chu vang but unla, puonâk le nih âk lo dingin a hilh a.

¹⁰Chun, a kawm u ah, “Khawi mun ale, na lut nau In ah, zie mun apat chuh na pawt kit masieh uh tung zing un.

¹¹Khutichun, kuole a hun na lawp lo ahim, na thuu ngaitha lo ahim chuh, zie apat chuh na pawt tieng u leh, amau haw hetsak masakna dingin, na kengtawu a leivui chuh tat thau in,” a ti a.

¹²Khutichun, a chieh dawk uh a, mite lungheina ding thu a gen u a.

¹³Thitha tamtak a delhdawk u a, mi tamtak damlote chuh thau a nuh u a, a hihdam u a.

¹⁴Khutichun, amin a kithan tâk ziekin leng Herod chun a chanchin ana za ta a. “Baptist Johan kha mithi lak apat a hung tho kitin, zie thil hihtheihna chun amah ah a sem ahi chuh,” a tiu a.

¹⁵Mi khenkhatte chun, “Elija ahi,” a tiu a. A bangin, “Thiemgau ahi,” a tiu a, a hih loh leh, “Malai a thiemgau laka khat tawbang ahi,” a tiu a.

¹⁶Himahleh, Herod in zie chuh a na het phetin, “A lu ka tan Johan kha a hi chu; mithi lak pata hung tho kit ahi ta chu,” a ti a.

¹⁷Herod in a suohpihpa Philip zi, Herodias a kichênpih ziekin, mi a sawl a, Johan a man a, suongkul a kân sa’n a na khum ahi ta a.

¹⁸Johan chun Herod kawmah, “Na suohpihpa zi na neih hi a thienglo ahi,” a na tih sak zing ziekin.

¹⁹Zieziekchun, Herodias chun Johan chuh a mitdo mah mah a thah le a ut a, himahleh, Herod ziekin a that thei puoh a.

²⁰A ziek chu, Herod in, Johan chuh mi diktat leh thiengtho a hih a het ziekin amah chuh a lau a, a hum chakkêi a; a thu a ngaihthak tieng leh a lung a zing a; himahleh, kipâk takin a ngaitha zel sek hi.

²¹Tichun, a tawp in, Herod in a pienchamphaphak ni’n, a mi lopi haw, sepaih lawiupa lien haw, Galili gama milien haw dinga nitâk an nekna a bawl lai in hun lemchâng a hung um ta a.

²²Herodias chanu chuh a hung lut a, a lam a, tichun, Herod leh a kawma chute chuh a sukipak ta a, leng chun numei chapang kawm achun, “Na deih deih ei ngên ah, hun pie’ng ka.” a ti a.

²³“Nei nget tâk chuh hun pie’ng ka, ka leng gam kimkhat chanin,” ti’n amahnu kawm achun a kihâksiel ta a.

²⁴Tichun, amahnu chuh a pawt a, a nu kawmah, “Bang ka ngên die?” a ti a. Amah chun a kawmah, “Baptist Johan luchang la uo!” a ti a.

²⁵Chun, amahnu chuh kin takin leng kawm achun a va lut a, “Kuong in Baptist Johan luchang ei pie zieng leh chin ka nuom hi,” ti’n a ngên a.

²⁶Chun, leng chuh a lungkham mah mah ta a; himahleh, a kihâksielna leh, a kawma chute ziek chun a na niel nuom ta puoh a.

²⁷Tichun, leng chun amah vengte mi khat kin takin a sawl a, a lu hun lak ding thu a pie a; tichun, amah chuh a va chieh a, suongkul sung ah a lu chuh a va tan a,

²⁸A lu chuh kuong in a hun chawi a, numei chapang chuh a pie a; numei chapangnu chun a nu a pie ta a.

²⁹Johan sinsakte chun zie chuh a zak phet un, a hung u a, a luong chuh a lau a; thân ah a vui tau a.

³⁰Chun, Sawlchakte chuh a kilehkit phet un, Isu tawh a kituok u a, a thilhih teu leh a sinsaknateu cheng chuh amah a hilh tau a.

³¹Mi tamtak a hung leh a chieh a kipel zet zut ziekun, Isu leh a sinsakte’n le an nekna hun nasan le a nei thei ta puou a. Khutichun, ama’n a kawm u ah, “Khawitak mun ahim ah eihaw ngawn va chiehdawk hitiu; na kichawlh dam theihna dingun,” a ti a.

³²Tichun, gamgaw mun ah, kuong in amau mai in a va chieh chuom tau a.

³³Himahlele, mipi’n a chieh pet u chuh a muu a, mi tamtakin amau chuh a heu a, tichun, khuo tin apat in keng in tak achun a tai khawm u a, a na makhelh u a, a kawmah a hung khawm tau a.

³⁴Tichun, amah chuh kuong apat a hung pawt phetin, mipi tamtak a mu ta a, chingpa neilo, belam hawn bang a hih ziekun a lungsiet mah mah a: thil tamtak amau haw a sinsak ta a.

³⁵Tichun, ni a hung tâk phetin, a sinsakte a kawmah a hung u a, a kawmah, “Zie tak hi gamgaw mun ahi a, ni le a tâk ta ngâl a;

³⁶Amau haw hi I kawm vel gam leh khuo haw ahi chieh a, chângthâk a kichâwk theihna dingun sawl dawk ta,” a tiu a.

³⁷Himahleh, Isu’n a dâwng a, a kawm u ah, “Nangmau in nek ding pieu,” a ti a. Amau haw chun a kawmah, “Chângthâk, makhai zanih man va chaw a, a nek dinguh ka piek dinguh ahi die?” a tiu a.

³⁸Isu’n a kawm u ah. “Chângthâk pêk bang zah a na neih uh? vak en dîu” a ti a. Chun, a het phet un, “Chângthâk pêk nga leh, nga nih,” a tiu a.

³⁹Ziephet chun. Isu’n, amau haw chuh hampa hing chunga a hawn hawn a chut sak dingin thu a pie a.

⁴⁰Tichun, a tien in, za khat bang, sawmnga bangin a chuu a.

⁴¹Tichun, Isu’n chângthâk pêk nga leh nga nih chuh a la a, van lam en in vang a pie a chângthâk pekhaw chuh a hekphel a, a mau a luih dingin sinsakte kawm achun a pie a; nga nih chule a bawn u a lak ah a hawm zak a.

⁴²Chun, a bawn un a neu a, a vah chiet tau a.

⁴³Tichun, chângthâk nen leh nga nenhaw chuh bawm sawm le nih a luok dim u a.

⁴⁴Chângthâk pêk ne haw chuh pasal piting chiet le sangnga vai ahiu hi.

⁴⁵Chun, mipite a kikhensak viel sungin gâl langkhat a Bethsaida khuo a a na chieh masa dingin Isu’n a sinsakte chuh kuong in a sawl pai zieng a.

⁴⁶Tichun, amau haw chuh a kikhensak zawhin, paucham dingin tângah a chieh ta a.

⁴⁷Tichun, nitâk a hung hih phetin, kuong chuh dîl lai lam ah a um ta a, Isu chuh la amah chauh in tâng chung ah a um ta a.

⁴⁸Chun, huih in a hilo lama a hah mût ziekin, sinsakte’n a kuong zap u chuh a muh in lungzîng in a he a; tichun, thingzangvak vel dingin dîl chunga kenga chieh in amau haw umna lam a hun zuon a, amau haw chuh makhelh guo’n a heu a.

⁴⁹Himahlele, amau chun amah chuh dîl chunga kenga chieh a vak muh u chun thadam kha a sau a, a kiko zak tau a:

⁵⁰a muh phet u chun, a thavai mah mah tau a. Ziephet chun, Isu’n amau a hopih pai zieng a, a kawm u ah, “Lungmuong takin um un; kei ka hi, lau kiu,” a ti a.

⁵¹Chun, kuong ah, a kawm u ah a lut a, tichun, huih chuh a hai ta a; amau haw chun a mak a sagu ten u a, lamdang a sa mah mah tau hi.

⁵²Chângthâk sukpun thu kha a heta puou a, a lungthim uh ana ngawn tâk ziekin.

⁵³Chun, gal khat a kaih phet un, Genesaret gam a tung tau a, lui pang ah a kuong uh a hen u a.

⁵⁴Kuong apat a a hung pawt phet un, mipite chun Isu chuh a he pai zieng tau a.

⁵⁵Zie gamsung pumpi achun a tai viel sausau u a, a um hi tih a het phet un, damlo haw chuh a puonphah pum in a hun zawn u a.

⁵⁶Khutichun, khuo lien leh khuo neu leh lo haw ale, a lutna taphawt ah, damlo haw chuh khawlai dunghaw achun a kuol sak uh a, a puon mawng bêk tham theihna ding a ngên u a; tichun, amah tham taphawt chuh a dam zel tau hi.