Read Gangte MARK 7 Bible Online

MARK 7 - Gangte bible

MARK 7

¹Chun, Pharisaite leh Danthuzikte laka kuote ahim, Jerusalem apat a hungte chuh Isu kawmah a hung uh a.

²A sinsakte laka khenkhat, khut nên a chângthâk ne a na muu a, khutnên tih hi sawp loh tihna ahi.

³Pharisaite leh Juda chengcheng in, upate thuguichin chu a tukchak ziekun, khut sawp lo in an a ne kha puoh ngâl u a.

⁴Dawl mun apat a a hung kilehkit tieng u lele, a khut asawp loh u chun a ne puou hi. Chuleh, thu dang tamtak nit ding a a het sawn u le a um hi: khawnhaw, belhaw, sumbel haw leh dawhkan haw sawp thien dante hi.

⁵Tichun Pharisaite leh Danthuzikte chun, “Bang zieka na sinsakte’n upate thuguichin guola um lo a, khut nen a chângthâk a nek sek uh a?” ti’n a dawng u a.

⁶Isu’n a dâwng a, “Isai in nang haw mi gukhahte thu hi a na gen dik mah mah hi: ‘Ziete hin a mûk un ei limbawl u a, A lunggil un la ei gamlat ngâl u a;

⁷Bang hitalele a sinsaknau ah mihiem thupiek a sinsak ziekun Ei ho sek u hi mawk mai ahi,’

⁸“Pathien thupiek chuh kawihtha’n, mihiemte sinsakna na zuih zawk ziekun,” ti’n.

⁹Isu’n a kawm u ah a gen kit a, “Nangmau haw thuguichin haw chu na vawp phat theihna dingun, Pathien thupiekte na deih loh u hi, na lemhe ten mai ui!

¹⁰Mosi’n, ‘Na nu leh na pa limbawl in,’ ‘Kuole, a nu ahim, a pa ahim, samsie ta chuh thi heh,’ a ti ngâl a.

¹¹Nang haw’n la hiti hin na ti sek ui, Mi’n a nu ahim, a pa ahim kawmah, Nei thanekna ding chuh Korban ahi tai, a tih chun, zie chuh Pathien kawma piek tihna ahi a; zalen ding ahi, na tiu hi.

¹²Zieziekchun, a pa ding ahim, a nu ding ahim a bangmah a hih u na phal ta sek puou hi.

¹³Mite kawma na thuguichin uh na pieksawn u hin Pathien thu bangmahlo na suoh u a: zie tawbang thil chuh tamtak na hih sek uh ahi,” a ti a.

¹⁴Chun, mipi chengcheng chuh a kawmah a sam khawm kit a, a kawm u ah, “Na bawn un ka thu hi ngaithau in la hethiem un:

¹⁵Mihiem pawlam apat a a sunga lut amah subuok thei bangmah a um puoi; mihiem sung apat a hung pawt haw chun, ziehaw chuh ahi mihiem subuok sek zaw chuh.” a ti a.

¹⁶Kuole, zakna dinga bil nei chun za heh, a ti a.

¹⁷Khutichun, mipite chuh In a a lut san nung in a sinsakte’n tehkal thu chuh amah a dawng chien tau a.

¹⁸Chun, ama’n a kawm u ah, “Nang u le khuti hiel a chuh hetna nei lo na hiu maw? Bang hileh, pawlam apat a mihiem sunga lut chun amah a subuok thei puoi;

¹⁹A ziek chuh, a lunggil ah a lut puoh a, a gil sung ah a lut zaw a, pawsuokna a a pawt ziekin, amah chuh a subuok puoi tih na he puou maw? Zie chuh nek ding tin cheng a thieng ahi, tih na ahi,” a ti a.

²⁰“Zieziekchun, mihiem apat a hung pawt in, zie chun mihiem a subuok zaw ahi.

²¹Sunglam a mihiem lunggil apat in ngaihtuohna gilote a hung pawt sek hi, zawlsaihna te, thanhuoina, tuolthahna te;

²²gukchakna te, awhchâkna te, nunsiette, kidawhabawlna te, hûkna te, mitthîpna te, gensietna te, kiletsaknate, ngawlna te, a hung pawt ngâl a;

²³Zie thil gilohaw cheng hi sunglam apat in a hung pawt a mihiem a subuok sek hi,” a ti a.

²⁴Chun, a kipan a zie tak apan chun Tura leh Sidon biel ah a chieh ta a. chun In khat ah a lut a, kuomah a kihetsak nuom puoh a, himahleh a kisel thei diek puoi.

²⁵Khutichun, numei khat, a chanu chapang neu, thitha buok vawp chun a chanchin a na za ta a, tichun, a hung a, a keng bul ah a khupbawk a;

²⁶Zie numei chuh Grik mi ahi a, a pienna chuh Suria gama Phoinikia ahi, amah chun a chanu sunga thitha buok nawhdawk dingin Isu kawmah hah nget in a ngên a.

²⁷Himahlele, Isu’n a kawmah, “Chate chuh hung vah masa phawt u heh; chate chângthâk lâksak a, uite kawma paih chuh a kilawm puoh ngâl a,” a ti a.

²⁸Amahnu chun a kawmah, “Hih vang a hi nâi, LALPA, hilele, uichate’n le dawhkhâng nuoia chate chângthâk nên a ne sek u kha la,” a ti a.

²⁹Ziephet chun, Isu’n a kawmah, “Na thugen ziek chun chieh ta’n le; thitha chuh na chanu sung apat a pawt tai,” a ti a.

³⁰Tichun, a In ah a chieh ta a, thitha’n a na pawt san tâk, a chanu zalkhun a kuol chuh a va mu ta a.

³¹Chun, Isu’n Tura leh Sidon biel nusieh in Dekapoli hawhpai in, Galili dîl a hung tung kit ta a.

³²Tichun, mi khat bengngawng, pau le pau chien theilo a kawmah a hun pui u a; a chunga a khut nga dingin a mah chuh a ngên u a.

³³Khutichun, Isu’n amah chuh a puichuom a, a khutzung chun a bil hawm a khawih a; chun, a chil a siet a, a lei a khawih sak a;

³⁴Van lam en in a ha huoi a, a kawmah, “Eph-phatha,” a ti a, zie chuh, “Hung kihawng ah,” tihna ahi.

³⁵Tichun, a bil chuh a hung kihawng a, a lei kânna chuh a hung kiphel a, a hung pau chien thei pai zieng ta a.

³⁶Chun, Isu’n mipite chuh kuomah hilh lo dingin thu a pie a; himahleh, a hah khap phawt leh, a hah phuon zaw diek tau a.

³⁷A za taphawtte chun gen theih loh khawpa maksa’n, “Ama’n thil bang cheng phatak in a hih a; bengngawngte khuo a zak theih sak a, pautheilo te a pau theih sak hi,” a tiu a.