Read Gangte MARK 9 Bible Online

MARK 9 - Gangte bible

MARK 9

¹Tichun, amah mah in a kawm u ah, “Tihtakzet a ka hilh na hiu, taka ding haw khenkhat hi, Pathien gam thilhih-theihna tawh hungtung a muh masangsieh un, thihna tep lo hiel ding a um ui,” a ti a.

²Chun, ni gup zawhin Isu’n Peter leh Jakob leh Johan a pui a, a chuom in tâng sang tak ah amau haw maicha a chieh toh pih a. Chun, a et zing lai u chun, a mel put zie chuh a hung danglam ta a,

³A silhlechente chuh leia puon sawpte himhim in a sawp vam theih loh khawp uh a vam in a hung vam ta a.

⁴Chun, Elija leh Mosi a kawm u ah a hung kilak uh a; tichun, Isu tawh a kiho u a.

⁵Tichun, Peter in Isu a hopih a, “Rabbi, kei u dingin taka um hi a phâi; bâwkcha thum khawh ung kau; nanga dingin khat, Mosi a ding in khat, Elija a ding in khat,” a ti a.

⁶A lauh mah mah ziekun gen ding pên le a he puoh ngâl u a.

⁷Tichun, amau haw lieh in mei a hung zing ta a; chun, mei achun aw a hung pawt a, “Ziehi ka Chapa deihtak ahi, amah thu ngai un,” ti’n.

⁸Chun, thakhata a vak dâk viel u chun, a kawm u a Isu tih loh chuh kuomah a mu ta puou hi.

⁹Tichun, tâng apat a a hung suk lai un, Mihiem Chapa mithi lak apat a thawhkit masieh a thil muh u chuh kuomah hilh loh ding a ti chak kêi a.

¹⁰Tichun, zie thu chuh a ching zing u a, “Mithi lak apat a thawhkit chuh bang tihna ahi die?” ti’n a kidawng tuoh sek uh a.

¹¹Amau chun Isu kawmah, “Bangti dana danthuzikte’n ‘Elija hung masa ding ahi,’ ti ahiu a?” ti’n a dawng u a.

¹²Chun, amah chun a kawm u ah, “Elija chuh a hung masa ding him a hii, bangakai siempha ding ahi; thil tamtak thuok in, mi muhsit a um ding ahi tih, Mihiem Chapa chanchin bangti dana a na zikuh ahi?

¹³Himahlele, ka hun hilh na hiu, Elija chuh a hung ta him a, a chanchin zik a hih bangin, a chungah a nawp nawp un a na bawl ta him ui,” a ti a.

¹⁴Chun, sinsak dang le a kawm a hung tun phet un, a kawm u a mipi nasatak um leh, danthuzikte’n amau haw a na niel lai u chu a mu a.

¹⁵Chun, mipi chengcheng in Isu a muh tak un, mak a sa mah mah tau a, a kawm lam ah a tai u a, chibai a va bûk u a.

¹⁶Isu’n a sinsakte kawmah, “Bang thu a amau haw tawh kiniel na hiu a?” ti’n a dawng a.

¹⁷Chun, mipite laka khatin a dâwng a, “Sinsakpa, ka chapa thitha pautheilo vawp chuh na kawmah ka hun pui a.

¹⁸Khawi mun ale, a sawisakna tâkah, a hihpuk ek sek a; a chilphuon a pawt a, a ha a giel a, a gawng deuh deuh sek a; na sinsakte hi nawhdawk dingin ka tih le la a nawhdawk thei puou a,” a ti a.

¹⁹Ziephet chun, Isu’n a kawm u ah, “Aw khangthak taksanna nei lote haw, bang chana na kawm u a ka um a, bang chana ka hun hungaih theih ding? amah chuh ka kawmah hun pui un,” a ti a.

²⁰Tichun, amah chuh a kawmah a hun pui u a; chun, amah a muh phetin, thitha chun nasatak in a sawisa pai zieng a; tichun, tuol ah a puk a, chilphuon kai zeng zung in a kisek sulsul a.

²¹Isu’n a pa kawmah, “Zie banga a um patna hi bang chan ahi ta?” a ti a. Amah chun, “A chapan lai apat ahi tai,” a ti a.

²²“Tamtak vei, amah suklup guon mei lak leh tui lak ah a sawnpai tai; ahi’n nangin banga him khat bêk na hih theih chun, ei lungsiet inla, ei panpih in,” ti’n a ngên a.

²³Isu’n a kawmah, “Nangmah ngêi in na taksan theih chun, a taksangte ding chun thil chengcheng hithei ahi,” a ti a.

²⁴Ziephet chun, a pa chun, “LALPA, ka taksang hi, ka taksan lahna ah ei panpih in,” ti a kiko dawk in, mitthi luong kawmin a ngên a.

²⁵Isu’n mipi hung khawm haw chun a hun naih ui tih a mu a, thitha buok chuh a gai a, a kawmah, “Nang, thitha pautheilo leh bengngawng, a sung apat hung pawt a, lut kit talo hiel dingin thu ka hun piei,” a ti a.

²⁶Tichun, a kiko dawk a, nasa taka a sawisak zawhin a hung pawt ta a. Chapang chuh a thi guolin a um ta a, mi cheng chun, “A thi ahi,” tiu a.

²⁷Himahleh, Isu’n a khut a tu a, a kaitho a; tichun, a hung tho dawk ta a.

²⁸Chun, Isu In a a hung phetin, a sinsakte’n, “Bang zieka kei un ka nawhdawk theih loh uh ahi?” ti’n mun thip ah a dawng u a.

²⁹Isu’n a kawm u ah, “Zie tawbang hi pauchamna leh anngawlhna ngâl lo in, bangmah dangin a nawhdawk theih puoi,” a ti a.

³⁰Chun, Isu leh a sinsakte chun zie mun chuh a nusieh uh a, Galili gam a hawhpai tau a. Isu’n a umnau chuh kuomah het ding a nuom puoi.

³¹A sinsakte chuh thu a hilh a: “Mihiem Chapa hi mite khuta matsak in um intin; sulum un tin, tichun, a suklup nung uh ni thum ni leh thokit ina,” a ti a.

³²Himahlele, a thugen chuh a ngaihna a he puou a, amah la a dawng ngam ngâl puou a.

³³Chun, Kapernaum khuo a hung tung u a, In sunga a lut phet un Isu’n a kawm u ah, “Lampi a kha bang thu a kiniel na hiu hi?” ti’n a dawng a.

³⁴Himahlele, Kuo a lopipen die! ti a lampi a chuh kiniel a hih ziekun, a thipkêi tau a.

³⁵Chun, Isu chuh a chuh a, sinsak sawmlenih te chuh a kawmah a sama, a kawm u ah, “Kuole, masapen hih nuom chuh, a nunung pên a hih ding ahi; mi chengcheng zenviela a pan ding ahi,” a ti a.

³⁶Khutichun, chapang khat a kai a, a laku ah a din sak a; chun, a pawm a, a kawm u ah,

³⁷“Kuole, ka min a zie bang chapangte laka khat lawp ta chuh, kei ei lawp ahi; chun, kuole, ei lawp ta chuh, kei ei lawp ahi puoh a, ei sawlpa lawp ahi zawi,” a ti a.

³⁸Johan in a kawmah, “Sinsakpa, mi khat na min a thitha nawhdawk ka muu a, keihaw laka tel a hih loh ziekin ka khap tau hi,” a ti a.

³⁹Himahlele, Isu’n, “Amah chuh khap kiu; mi ka min a thilmak hih ngâl a zie nunga chuh ei gensie kit zieng a um puou hi.

⁴⁰Kuole, ei dodal lo chuh ei uh lama pang ahi.

⁴¹Kuole, ka mi na hih ziek u a, ka min a dâwn ding tuisik khawn khat hun pie ta chuh, tihtakzet a ka hun hilh na hiu, a kipahman chuh chân hiel puo’n au.

⁴²“Chun, kuole, zie ei gingchate, mi neucha haw laka khat le supuk ta chuh, a ngâwng a buh hêkna suong lienpi awhsak a, tuisuohgiet a paih lut chuh amah dingin pha zaw’n a.

⁴³Tichun, na khut in a hun sukpuk chun, tan tha’n: khut nih nei a Gehen a mei mit ngeilo muna chieh sang chun, piensuol a hinna a lut nang dingin a phazawi.

⁴⁴Zie chun a than uh a thi ngei puoh a, a mei chule a mit ngei puoi.

⁴⁵Chuleh, na keng in a hun sukpuk leh, tan mai ah, keng nih nei a Gehen a mei mit ngei lo a chieh sang chun, keng beia hinna a lut nang dingin a pha zaw ngâl a.

⁴⁶Zie chun a than uh a thi ngei puoh a, a mei chule a mit ngei puoi.

⁴⁷Chun, na mitin a hun sukpuk leh, kheuhdawk mai ah; mit nih nei a Gehen meia paih a um sang chun; mit khat nei a Pathien gama lut nanga dingin a pha zawi.

⁴⁸Zie chun, a than uh a thi ngei puoh a, a mei chule amit ngei puoi.

⁴⁹“Kithawihna chi a sukthiena a um bangin, mitin meia sukthientho a um ding ahi

⁵⁰Chi hi a pha ie, himahleh, chi hi tam ta leh, bang na ti suk-al kit ta dingu? Nangmau ngei ah chi nei unla, khat leh khat kicham un,” a ti a.