Read Gangte LUKE 1 Bible Online

LUKE 1 - Gangte bible

LUKE 1

¹Mi tamtakin, I lak uh a thil hungtung kigen khah, a theihtawp un zik a na guo tau a.

²Zie thil haw a tûng apat phuongte leh mute chun, ei hilh tâk guol u khan a zikuh a.

³Khutichun, nang zahum, Theopilas, zie thil haw chuh abul apat chingthei takin ka sut a. Zieziekchun, zie thil haw chuh kizawm zelin, nanga dinga hun zik pha dingin ka ngaihtuoh hi.

⁴A thu hun sinsak hawu kha a dikna bukim na het theihna dingin ka tih ahi.

⁵Judia gam leng Herod lal lai in, thiempu Abija lawi laka mi, a min Zakaria kiti, thiempu khat a um a. Amah chun thiempu Aron chi inkuon laka mi zi’n a nei a, a min chuh Elizabet ahi.

⁶A nih uh chun Pathien mitmuh in diktat takin a um sek uh a, bukim takin LALPA thupiek leh a dante chuh a zawp sek ui.

⁷Himahlele, Elizabet chuh a chîng a hih ziekin cha a nei puou, a nih uh chun upa tak gel ahi ta ngâl u a.

⁸Chun, tihi ahi a, ni khat chuh Zakaria chuh, ni chenga a nasep hun in, Pathien Ho-In achun thiempu nasemin a um a.

⁹Thiempute hih dân ngeina guolin amah chuh, maichâm a lut leh gimlim hâl chuh a chanvo ahi. Khutichun, LALPA Ho-In achun a lut a,

¹⁰gimlim a hâl lai chun, mipite chuh pawlam ah a guolin a paucham u a.

¹¹Chun, LALPA vânsâwlchâk khat, gimlim hâlna maichâm sik changlam panga dingin, a kawmah a kilak a.

¹²Amah chuh Zakaria’n a muh phetin, a lungzîng a, a lau mah mah ta a.

¹³Himahlele, vânsâwlchâk chun a kawmah, “Zakaria, lau ki’n, Pathien in na pauchamna khah a he a puo, na zi Elizabet chun chapa hun hinsak intin, a min dingin Johan na sak ding ahi.

¹⁴Tichun, nang lâwpin kipâk in na tin; amah a pien tieng mi tamtak le kipâk un au.

¹⁵LALPA mitmuh in milien hi’n tin, uain leh zu himhim dâwn puo’n a. A nu sunga kipatin Thagau thiengtho in dim ina,

¹⁶Tichun, Israel mipi tamtak, LALPA a Pathien uh lam ah puikit ina.

¹⁷Thiemgau Elija guola hât leh thilhih thei takin LALPA masang achun chieh intin. Pate leh chate chuh puikhawm kit intin; mi, thu-awilo te chuh thil dik lam ah kai hêi kit intin; LALPA mite chuh amah a dinga kisazo dingin hilh ina,” ti’n.

¹⁸Chun, Zakaria’n vânsâwlchâk kawm achun, “Zie chuh bangti’na ka het ding? Kei ka têk ta a, ka zi le a têk ta ngâl a,” a ti a.

¹⁹Chun, Vânsâwlchâk chun a dâwng a, a kawmah, “Gabriel, Pathien ânga ding sek ka hi a; hun hopih ding leh, zie chanchin pha chuh hun hilh dinga ei sawl ka hi.

²⁰Himahleh, ka thugen haw, a hun taka hungtung ding chuh na ginchak loh ziekin, zie thil haw chuh a hungtun masang sieh thipkêi in na tin, pau le pau thei puon la,” a ti a.

²¹Zielai a mipi, Zakaria ngaka umte chun, bangti dana Pathien Ho-In sunga zie chanpi hi hung um ahi ta die! ti’n mak a sa ten tau a.

²²Chun, a hung pawt phet chun, amau haw a hopih thei ta puoh a, ziephet chun, Ho-In sung achun kilâkna a mui tih, a he tau a. Thumal khat le a gen thei ta puoh a, a khuta thawh in, a kawm u ah a gen ta a.

²³Chun, Pathien Ho-In a amah panna ding hun tiem chuh a beih phetin, Zakaria chuh In lam ah a chieh kit ta a.

²⁴Zie nung chawmkhat hal chun, a zi Elizabet chuh a hung gai ta a,

²⁵Mi laka ka minsie selna’n, LALPA’n ei panpih tai, ti’n, In nusieh lo in tha nga a um ta a.

²⁶Chun, a tha gupna achun Pathien in, vânsâwlchâk Gabriel chuh Galili gama khuo khat, Nazareth kiti achun nungak thiengtho khat kawmah a sawl a.

²⁷Amah chuh, leng David suona mi khat, Joseph kiti tawh kihuol lai ahi a, zie nungak min chuh Mari ahi.

²⁸Tichun, vânsâwlchâk chuh a kawmah a lut a, a kawmah, “Na chungah thamuonna um hen! LALPA chuh na kawmah a um a, nasa takin a hun vangsak hi!” a ti a.

²⁹Vânsâwlchâk thugen chun Mari chuh nasa takin a subuoi a, a thugen chuh bang tihna ahi die! ti’n a ngaihtuoh a.

³⁰Vânsâwlchâk chun a kawmah, “Mari, lau ki’n, Pathien deihchuom na hi.

³¹Ngai ah, gai in na tin, chapa hun nei inla, a min dingin ISU na sak ding ahi.

³²Amah chuh milien hung hi’n tin, Chungnung pên Pa Chapa ti’n au. LALPA Pathien in a kawmah a suonpau David chutphah chuh pie’n tin,

³³Jakob suonte chungah kumkhuotuong in lal intin, a gam in tâwp ni nei ta puo’n a,” a ti a.

³⁴Chun, Mari’n vânsâwlchâk kawm achun, “Ziehaw chuh bangti’n ahi thei die, nungak thiengtho ka hi ngâl a?” a ti a.

³⁵Vânsâwlchâk chun a dâwng a, a kawmah, “Thagau Thiengtho na chungah hungtung intin, Pathien thilhih theihna chuh na chungah um intin, zieziekchun, nau thiengtho hung pieng ding chule Pathien Chapa ti’n au.

³⁶Chun, ngaitie, na behnu Elizabet khan le a têk nung in chapa a vawp tai! Nau nei thei lo ahi a tih u khah, tu tha hi a tha gupna ahi tai.

³⁷Pathien kamsuok. himhim thilhih theilo in um puo’n a,” a ti a.

³⁸Chun, Mari’n, “Ngaitie! LALPA suoknu ka hi, na thugen guol zelin ka chungah hungtung hen,” a ti a. Chun vânsâwlchâk chun a taihsan ta a.

³⁹Zie zawh chawmkhat hal chun, Mari chuh a kipan a, Judia gama thingtâng khuo khat achun a chieh ta a.

⁴⁰Zakaria In ah a lut a, Elizabet chuh a va chibai ta a.

⁴¹Chun, tihi ahi a, Elizabet in Mari hopih chuh a het phetin, a gil sunga nausen chuh a hung tawi a. Tichun, Elizabet chuh Thagau Thieng tho in a dim a;

⁴²Aw ngeih tak in, “Nang chuh numei chengcheng laka hampha pên na hi ie! na gil a gah, nausen chule a hamphai!

⁴³Ka LALPA nu ka kawma na hung hi bangti dân ahi ta?

⁴⁴Ngaitie, nei chibai thawm ka bil a a lut lut in, ka gil sunga nausen chuh kipâkin a kichawm hi!

⁴⁵Chun, LALPA’n na kawma a thugen chuh guitung ahi tih, na ginchak chuh, mi hampha na hi na lâwm lâwm e!” a ti a.

⁴⁶Chun, Mari’n, “Ka hin in LALPA a limbawl a.

⁴⁷Ka thagau le ei hukdampa Pathien chungah a kipâk mah mah ta a.

⁴⁸A suoknu nam chawm zie a mu a, a lungsiet a; Ngai ah, tu a kipatin khangthak chengcheng in hampha ei sa ding ahi.

⁴⁹Pathien hât khan ka chungah thil lopi tak ei hih saka, A min le a thiengtho hi.

⁵⁰Amah kihchate chung achun a zahngaihna chuh akhang-akhangin a latsak zel sek a.

⁵¹A bân tha hattak chuh a sulang a. Mi kiletsakte thiltup chuh a hihzak sak ta a.

⁵²Leng lopi takte chuh a lalchutphah uh apat chun a luoi tha a, dinmun niemte chuh a chawisâng ta a.

⁵³Gilkielte chuh thil phatak chun a sutai a, Neizote chuh khut ngawnin a sawl mang ta a.

⁵⁴Ei suonte kawma a thutiem chuh a vawp zing a, A suok, Israel te panpih dingin a hung ta a.

⁵⁵Abraham leh a suonte kawma, kumlekhuo a zahngaihna latsak ding chuh a hezing ngâl a,” ti’n.

⁵⁶Chun, Mari chuh Elizabet kawmah tha thum val a um a, chun In lam ah a chieh kit ta a.

⁵⁷Tichun, Elizabet chuh a nau neih phat a hung hi ta a, tichun, chapa a hun nei ta a.

⁵⁸Chun, a invengte leh a ulenau te chun, LALPA’n a lungsiet mah mah hi tih a he tau a, a kipahpih chiet tau a.

⁵⁹Chun, tihi ahi a, a ni giet ni chun nausen zektan ding chun a hung uh a, a min dingin a pa Zakaria min mah sak a guou a.

⁶⁰Himahlele, a nu chun, “Hilo e! a min chuh Johan sak zawk ding ahi,” ti’n a dâwng a.

⁶¹Amau haw chun a kawmah, “Na behte lak ah zie tawbang min pu chuh kuomah a um kha puou hi,” ti’n a dâwng u a.

⁶²Tichun, a pa kawm achun alim a thawh in, naupang min dingin bang sak a nuom em tih a dawng u a.

⁶³Chun, lehkha zikna pêk a ngên a, “A min chuh Johan a hi ie,” ti’n a zik a. A bawnu chun mak a sa mah mah uh a.

⁶⁴Chun, phulo-halo in a kam leh a lei chuh a hung kiphel a, Pathien pakcha’n a hung pau dawk pai zieng a.

⁶⁵Chun, a invengte chengcheng chuh lauhna’n a dim tau a. Zie thu haw chuh Judia gam, thingtâng gam cheng achun a kithang suok ta a.

⁶⁶Mi tin; a hepha chan chun, “Zie nausen hi bangti’n a hung um ta phet dem!” ti’n a lungthim un a ngaihtuoh chiet tau hi. LALPA thilhih theihna chuh a chungah a um hi tih a kichien ngâl a.

⁶⁷Chun, a pa Zakaria chuh Thagau Thiengtho in a hung dim ta a, tichun, Pathien thu a hun gen ta a:

⁶⁸“LALPA, Israel Pathien chuh pahchak in um hen! A mite a hung veh a; tatna a siem sak ta a.

⁶⁹A suokpa David suona kipat chun, Hukdamna ki ei siem sak ta ngâla.

⁷⁰Lei kisiem tûng apat thiemgau thiengthote kama a gen guol khan.

⁷¹Ei doteu lak leh ei mudahte chengcheng laka pat hukdam in I um u a.

⁷²Amah chun ei suonteu kawm akhan, lungsietna latsak ka ting, ka thugawlh thiengtho chuh hezing ing ka, a ti him a.

⁷³Khutichun, ei suonpau Abraham kawma kihâksiel in, I melmateu lak apat ei hukdam ding thu a tiem a;

⁷⁴Lau lo a na I sep theih na dingun,

⁷⁵Khutia chuh, I damsung chenguh a, a masanga thiengtho leh diktat taka I um theihna dingun.

⁷⁶“Ahi, bawipu, nang hi Chungnung pên pa Thiemgau tih hin la. A lampite guonggalh lawk dinga LALPA masanga chieh ding na hi ngâla.

⁷⁷I Pathien uh lunggil a lungsietna vangin, A gitloh nau ngaihdamna’n;

⁷⁸I Pathien u chuh zahngaihna hau leh nunnem tak ahi ngâl a; Zieziekchun, chunglam apan in hukdamna ni no suok in ei hun tawh ina;

⁷⁹Thimnuoi leh thihna lima chute salhvak ding leh, Lungmuonna lampi a kal ei suon sak dingin.” ti’n.

⁸⁰Tichun, nausen chuh a hung khang lien a, taksa leh lungthim lama le a hung khang lien deuh deuh ta a. Israel mipite laka a hung kilat dawk masang cheng chun, thalek gam ah a um zing a.