Read Gangte LUKE 10 Bible Online

LUKE 10 - Gangte bible

LUKE 10

¹Chun, zie zawh nung chun, LALPA’n mi sawmsagih leh nih a teldawk kit a, amah ngêi chiehna ding khawpi tin leh muntina chun a masanga a na chieh masa dingin, nih zelin a sawl a.

²A kawm u achun, “Buh lak ding a tam ten a, himahlele, a sem ding atawm ui. Khutichun, a buh ât dinga sem dingte sawl dingin, buh nei pa kawm achun ngên un.

³Chieh un, ngaitiem u, ngei hawn laka belam no um guolin ka sawl na hiu hi.

⁴Dangka dip haw, sakhau haw, kengtawbek haw keng kiu inla, lampi a le kuomah chibai kiu.

⁵Chun, In na lutna tak u ah, amasapen in, ‘zie In a hin lungmuonna um hen,’ tiu in.

⁶Chun, zie taka chuh lungmuonna deih mi a na chen chun, na lungmuonna thuu chuh a chungah um zing he’n; a um loh le vang, lungmuonna thu na gen u chuh zukkit un.

⁷Zie In ngencha achun um zing unla, a hun piek tâk u chuh neu inla dâwn un; nasem mi chuh lawh piek ding him a hi ngâl a. In tin ah vak lawn viel kiu in.

⁸Khawpi a na chiehna tak u achun, a hun luih sak tâk u chuh neu inla,

⁹a khuou a damlo umte le hih dam unla, a kawm u ah, ‘Pathien Gam na kieng u ah a tung tai,’ tiu in.

¹⁰Amahvang chuh, khuo na lutna tak u a, a hun na lawp loh u le vang chuh, a khawpi apat chun chiehdawk unla,

¹¹‘Na khawpiu leivui, ka kengtawu a bek hile na chungu ah ka tatngim ui. Himahlele, Pathien Gam chuh na kieng u ah a hungtung tai tih heu in!’

¹²Ka hun hilh na hiu, thutan ni chuleh, zie khawpi thuok ding sang chun Sodom khuo thuok ding chuh a dân um zawna! tiu in.

¹³“Korazin, na chung a gik hi! Bethsaida, na chung a gik hi! Nangmau haw kawma thilmak kihih haw kha Tura leh Sidon khuo a hih hi hen la hi leh, saidippuon silh a vut laka chu’n a lung uh hêi ta khawp puo’n au.

¹⁴Thutan ni chuleh, nang haw thuok ding sang chun Tura leh Sidon thuok ding chuh a dân um zawna.

¹⁵Chun, nang Kapernaum! van chana limbawla um dinga kingaihtuoh, gawtmun a sawtthâk a um ding na hi a puo!”

¹⁶Chun, Isu’n a sinsakte kawmah, “Kuole, nang haw thu ngai chuh, kei thu ngai ahi a, kuole, a hun deihlo chuh, kei ei deihlo ahiu hi; chun, kuole, kei ei deihlo chuh ei sawlpa deihlo ahi,” a ti a.

¹⁷Chun, sawmsagih leh nihte chuh kipâk takin a hungkit tau a, “LALPA, thithate le na min a thu ka piek u leh ka thuu in a nung ui,” a tiu a.

¹⁸Chun, amah chun a kawm u ah, “Kawlphe guola Setan van apat a hung kie kha ka mu apuo!

¹⁹Ngaitiem u! gulte, aikawmte tawhden theihna thu ka hun piek na hiu hi; tichun, bangma’n hun suna puo’n a.

²⁰Himahleh, thithate na thuu a a um ziekun kipâk kiu inla, van a na min uh zik ahih ziekin kipâk zawu in,” a ti a.

²¹Zielai tak chun, Isu chuh Thagau a kipahna’n a hih dim a, “Aw hepa, lei leh van LALPA, nangin mi ching leh bilpilte kawmah zie thu hi na îm a, mingawngte kawma na phuon ziekin ka hun pakchâi. Ahi, hepa, nangin zie chuh na kipahna lam ahi ngâla.

²²“Ka pa’n bangakai ei vawp sak tai, Chapa chuh kuo ahi tih Pa ngâllo chun kuoma’n a he puoi; Pa chule kuo a hih, Chapa leh a kawm u a Chapa’n a phuon nawp nate ngâllo chun kuoma’n a he diek puou,” a ti a.

²³Chun, sinsakte lam ah a kiheia, a gûkin, “Na thil muh teu hi na muh na mit uh a vangphâi,

²⁴Ka hilh na hiu hi, thiemgau tamtak te leh leng tamtakin na thil muh teu hi muh a nuom u a, himahleh, a mu thei puou a, na zak hawu hi zak a nuom u a, himahleh, a za thei puou hi,” a ti a.

²⁵Chun, ngaitie, dân sinsaktu khat a hung dawk a, Isu zedapna dingin, “Sinsakpa, kumsawt a hinna ka chan theihna dingin banga ka hih ding?” a ti a.

²⁶Isu’n a dâwng a, a kawmah, “Dan lehkhabu ah banga kizik? Zie tak achun banga na sim sek?” a ti a.

²⁷Amah chun, “LALPA na Pathien chuh na lunggil cheng chengin, na thagau chengcheng in, na hatna chengcheng in leh na ngaihtuoh na chengcheng in na hehpih ding ahi; chuleh, nangmah na kihehpih guolin na vengte le na hehpih ding ahi,” tih hi, a ti a.

²⁸Chun, Isu’n a dâwng a, “Na gen dik hi; tichun, hih inla, hing inla,” a ti a.

²⁹Himahlele, dân sinsakpa chun amah thiem kichan sak nuom in, Isu kawm achun, “Ka vengte chuh kuo ahi?” a ti a.

³⁰Isu’n a dâwng a, “Kuo ahim, Jerusalem khuo apat in Jerikoh khuo a zu chieh ding ahi a, suommangte a tuok khel a, ziete chun a silhlechen a hâwk sak u a, a zêp diek u a, thi vangin a nusieh tau a.

³¹Chun, thiempu khat zie lampi a chun a va chieh kha khelkhel a, a muh phetin lampang langkhat ah a pel mai ta a.

³²Khutibangmah chun Levi chi mi khat le zie mun chu a va tung a, a muh phetin lampang langkhat ah a pel zel mai ta a.

³³Amahvang chuh, Samari gam apat kuo ahim, a khuol chiehna lam ah zie mun chu a hungtung a, a muh phetin a lungsiet mah mah ta a,

³⁴a kawmah a va chieh a, a pawpna haw achun thau leh uain a sung a, a tuom a; amah gan chung achun a chut sak a, khuolbuk ah a pui, a enkawl ta a.

³⁵Chun, a zing chun, makhai nih a suohdawk a, khuolbuk ngakpa kawm achun a pie a, ‘A na enkawl inla, zie khela na senna cheng chuh ka hungkit lam leh hun din kit nang ka,’” a ti a.

³⁶Chun, Isu’n a kawmah, “Zie mi thum te laka chun kuo pên hi suommang haw tuok, invengte chunga hih dân ding bangtak hihin na he?” a ti a.

³⁷Chun, dân sinsak pa chun, “Amah lungsiet pên pa chun,” a ti a. Isu’n a dâwng a, “Nang le chieh inla, zie guol tak chun va hih ah,” a ti a.

³⁸Chun, tihi a hung hi a, a zin lai u chun, khuo khat a tung u a, zie tak achun numei khat Martha kiti a um a, zie nu In achun a tung tau a.

³⁹amah chun suohpih numei khat a nei a, a min chuh Mari ahi, zie nu chuh LALPA keng bul ah a chu a, a thugen chuh a ngaitha a.

⁴⁰Himahleh, Martha chula nasep ding chun a subuoi mah mah a, tichun, a hung a, “LALPA, ka suohpihnu’n kei mai nasem dinga ei thahthak hi khawk nasa puo? Ei huh dingin gen ah,” a ti a.

⁴¹Chun, LALPA chun a dâwng a, “Martha, Martha, thil tamtak na ngaihtuoh a buoi na hi hi;

⁴²thil khat chauh a khawk ie; Mari’n chan pha a tel a, zie chuh lâksak ding ei puoh ie,” a ti a.