Read Gangte LUKE 11 Bible Online

LUKE 11 - Gangte bible

LUKE 11

¹Chun, tihi ahi a, Isu chuh khawitak mun ahim ah a paucham a. A paucham zawh phet chun, a sinsakte laka khat chun, “LALPA, Johan in a sinsakte paucham dân a hilh guol khan, kei u le ei sinsak ta” a ti a.

²Chun, Isu’n a kawm u ah, “Na paucham tieng u leh zie tawbang hin paucham un: ‘Ka pau, Na min zahum henla; Na gam hungtung henla.

³Ni chenga ka nêk khawp uh an nei pie’n la.

⁴Ka gitlohnateu ei ngaidam inla, Kei un le ka chung u a thil hihkhielte ka ngaihdam bangun. Thepna ah ei puilut ki’n,’” tiu in a ti a.

⁵Chun, a mah chun sinsakte kawmah, “Na laku a kuo ahim in zawl nei henla, zankhang lai in a In ah va chieh hen la, a kawmah, ‘Zawlpa, chângthâk pêk thum ei palâk sak ah.

⁶Ka zawl khuolzin in ei hung tawh a, a ânga luih ding bangmah ka nei puoh ngâl a!’ ti henla,

⁷a zawlpa chun In sung lam apat in, ‘Nei subuoi ki’n, kawt a kikhak zo ta a; kei leh ka chate le zâlkhun a kuol kei tau hi. Hung tho a bangmah hun pie thei ding kei ta puoi,’ ti’n dâwng ta leh;

⁸Ka hilh na hiu hi, a zawlpa a hih ziekin tho in ava pie zieng puoh na a, a nget tuntun ziekin tho in a deih zat zat va pie’n a.

⁹Khutichun, ka hun tih na hiu hi; Ngên un, tichun piek in um unlau; hawl un, tichun mu’n lau; kiu un, tichun hawn sak in um unlau.

¹⁰Kuole, a hawl ta chun a mu sek u a, kuole a kiu ta chuh hawn sak ding a hiu.

¹¹Nang haw lawi laka pa khat hi, a chapa’n chângthâk ngên henla hileh, kuo a suong pie ding? A hih leh, nga hun ngên henla hileh, kuo a nga sanga gûl pie ding?

¹²A hih leh aktui ngên leh, kuo a aikawm pie ding?

¹³Zieziekchun, nang haw migilo bawnin, na chateu thilpha piekna chang na het u chun, na Pau van a um chun a ngente chuh Thagau Thiengtho a pie na lâwm lâwm ding e!” a ti a.

¹⁴Chun, Isu’n thitha pau theilo khat a nawhdawk a, thitha chuh a pawt dawk phetin, pau theilo pa chuh a hung pau ta a. Mipite chun mak a sau a;

¹⁵Himahleh, khenkhatte chun, “Thitha lengpa Beelzebul zieka thithate a nawhdawk sek ahi,” a tiu a.

¹⁶Mi dang in la, Isu chuh Pathien apat ahim tih zedapna’n, thilmak hih dingin a ngên u a.

¹⁷Himahleh, Isu chun a ngaihtuoh hawu chuh a he a, a kawm u ah, “Khawi gam hileh, amau kido ta a mangthai sek ui; inkuon khat le amau kido ta chuh a mangthai sek ui.

¹⁸Setan le, amah a kido chun bangti’n a a gam a tundawk ding? Beelzebul thilhih theihna ziekin thithate a nawhdawk hi nei ti ngâl u a.

¹⁹Khutia chuh ken Belzebul zieka thithate nawhdawk ka na hih chun, na chateu in kuo ziekin ana nawhdawk sek u leh? Zieziekchun, amau chuh nanguh hun vaihawm sak dingte ahiu hi.

²⁰Amah vang chuh ken Pathien khutzung vanga thithate nawhdawk sek ka hih chun, Pathien gam chuh na laku ah a hungtung tai tih a sulang ahi.

²¹“Mi hât chun, hiem bukim chawia a In a ven sung cheng, a thil neihte chuh bit takin a um sek hi.

²²Himahlele, a sanga hatzaw’n a hun do a, a zawh tieng leh, a In neipa kivenna gâlvan cheng chuh a chuhthâk saka; tichun, a sum a lâksak chuh a hawmzak sek hi.

²³“Kuole, kei lama pang lo chuh ei do ahi a, kuole ei lâkkhâwm pih lo chuh a thehzak ahi.

²⁴“Thitha buok chuh mi sung apat a a pawt in, chawlhna ding hawl in gamgaw munte achun a vak vielviel ta a, a muh theih loh phet chun, ‘Ka pawtna In mah a khan vaikit mai ing ka,’ ti’n a ngaihtuoh ta a.

²⁵Khutichun, a chieh kit ta a, In chuh thiengtho tak leh ngim takin a va mu ta a.

²⁶Tichun, a va pawtdawk a, amah sanga phalo zaw, thitha dang sagih a hun pui a, a hung u a, taka chun a cheng tau a. Khutichun, zie mihiempa dinmun chuh a tunga sang khan a tawp lam chun a hung phamawh zaw sem hi!” a ti a.

²⁷Chun, Isu’n zie thu a gen lai chun, mipi laka numei khat a hung kiko dawk a, a kawmah, “Nang hun vawpna gil chuh a hamphâi, chun, na nawichep le!” a ti a.

²⁸Himahleh, Isu’n a dâwng a, “Ahi, Pathien thu za a, zawpte hi mi hampha ahi zawu hi!” a ti a.

²⁹Chun, mipite chuh a kawma a hung khawm lai u chun, a kawm u ah, “Tulai khang thakte hi khang gilo ahiu hi; thilmak hih a ngek khelkhel u a, himahlele, Jona melchikna tihloh chuh a kawm u ah melchikna himhim piek hi puo’n a.

³⁰Jona chuh Ninevi khuo a mite dinga melchikna a hih guol khan, Mihiem Chapa hi tulai khangthakte ding hin melchikna hung hi’n a.

³¹Thutan ni chu leh, Sheba lengnu kha tulai khangthakte tawh hung tho untin, tulai khangthakte hi mawh hun chan sak in a; Solomon chitna thugen ngaitha dingin kâwlmawng apat in a hung ngâl a; ka hun hilh na hiu hi, Solomon sanga lopi zaw zie tak a hin a um a puo.

³²Thutanna ni leh Ninevi khuo mite chuh tulai khangthakte tawh hung tho un ding un tin, mawh hun chan sak unau; Jona thugen ziekin a lung uh a hêi ngâl u a; ka hun hilh na hiu hi, Jona sanga lopi zaw taka hin a um a puo!

³³“Kuoma’n thaumei de’n In nuoi ah a kawih ngei puou a, chun, lawh nuoi ale a kawih ngei diek puou hi, mi a lut tieng leh a muh theihna dingun, a tunna achun a tung zaw sek ui.

³⁴Na sapum a dingin na mit chuh thaumei ahi. Na mit a chîm chun, na sapumpi le a vak dawk sek; himahleh, na mit a phatloh le vang, na sapumpi athim zo kêi sek hi.

³⁵Khutichun, na sunga vak chuh thim a na hi khâi mawh, chingthei ah.

³⁶Khutichun, na sapumpi chuh, a thimna lai um lo hiela a vak chun, thaumei vak hawih takin a hun salh guolin vak suok kêi ina,” a ti a.

³⁷Isu’n a thugen a zawh phat chun, Pharisai khatin a kawma an ne dingin a chiel a; tichun a chieh a, an ne dingin a chu ta a.

³⁸Isu’n khut sawp masa lo a an a nek chuh a muh phetin, Pharisai pa chun mak a sa ten a.

³⁹LALPA chun a kawmah, “Nang haw, Pharisaite’n, khawn leh kuong pawlam chuh na sawp ngim ngut sek u a, na sunglam hawu chu la, lepgukna leh gitloh in a dim ngâl a.

⁴⁰Mingawlte! pawlam siem pa Pathien chun, sunglam le a siem hilo ahim?

⁴¹Khutichun, na khawn u leh na kuong sungteu a um chuh mi chagahte kawmah pieu in, tichun, thil bangkim chuh nang haw adi’n thiengtho ding ahi.

⁴²“Na chunguh a gik hi! Nanguh Pharisaite haw, Pudina bang, pathikhawm ngat bang leh, thai tin chengte Pathien kawmah sawma-khat na pie sek u a, himahleh, vaihawm dikna leh Pathien hehpih ding chuh na ngaihsak ngâl puou a. Ziehaw chuh apuo, na sin ding u chuh, a dangte hih chuh haihsan diek lo in,

⁴³“Na chunguh a gik hi! Nanguh Pharisaite haw, Kikhawpna ina chutna phapen hauh masak leh, dawl muna zahum taka kiho chuh na deihchuom sek ngâl u a.

⁴⁴Na chunguh a gik hi! Thân ahi tih he lo a, a chunga helo a mi a chiehna sek bang u hi na hiu hi,” a ti a.

⁴⁵Dan sinsaktu khatin a kawmah, “Sinsakpa, zie thu na gen haw hi, kei u le nei sumuolpho ahi,” a ti a.

⁴⁶Isu’n a dâwng a, Na chunguh a gik hi! “Nanguh, dân sinsakte, Thil puok haksa tak, mi chungah na ngau a, nang haw’n la, panpih dingin na khutmuk chau le na tawih sak nuom puou a.

⁴⁷Na chunguh a gik hi! Thiemgaute a dingin thân hawihtak tak bang na sa sek u a, a hun suonteu in a thah thiemgaute a ding ngêi chuh.

⁴⁸Nang haw hun suonte thilhih chuh, nang haw’n le na phasakpih ngêi u a, thiemgaute a that sek u a, nang haw’n a thân dinguh na siem sek uh ahi.

⁴⁹Zieziekchun, Pathien Thupil inle: ‘A kawm u ah thiemgaute leh thupuo te sawl ing ka ting, khenkhat chuh that untin, khenkhat chuh a na sugimthei un au,’

⁵⁰Tichun, tu huna mite hi, khawvel siem tunga kipat leh,

⁵¹Abel thisan kisuoh apat, Mun Thiengtho leh maichâm kikala Zakaria thisan suoh a a um ni tienga, thiemgau thah a umte chengcheng ziek chun gawt in um un au. Ahi, ka hun hilh na hiu hi, tulai khanga mite hi ziehaw ziek chun gawt in um tei un au!

⁵²“Na chunguh a gik hi! Nanguh, dân sinsakte haw, Hetna dinga kawt hawnna chabi chuh na kivawp u a; nang haw la lut guo diek lo in, mi dang lut guote la na kham ngâl u a!” a ti a.

⁵³Isu’n zie tak mun chuh a nutsieh phetin, dân sinsakte leh Pharisaite chun nasatak in a nielkalh tau a; thil tamtak chungchâng ah dawtna a siem khum u a,

⁵⁴thil bang ahim khat a gen khelh, a mat theihna dingun, a chang zing tau hi.