Read Gangte LUKE 12 Bible Online

LUKE 12 - Gangte bible

LUKE 12

¹Khutia mipi sang tamtak, kinawk lullul khawp hiela a hung kikhawp phat u chun, Isu’n a masapen in a sinsakte kawmah, “Pharisaite chawl lak apat chun kivêng phau in.

²Lang lo dinga selguk bangmah a um puoh a, het loh dinga îm le bangmah a um diek puoi.

³Zieziekchun, thim laka na gen taksateu kha khawvak ah hun he tau untin, indan sunggil a a gûka nakhanga na gensateu kha, In chungah hun tângsappih un au.

⁴“Ka guolte haw, ka hun hilh na hiu hi, sapum that a, zie nung a bangmah hih kit thei talo chuh lau kiu inla.

⁵Amahvang chuh, na lauh ding pên u chuh hun hilhkhawl ing ka: a thah nung ale, gawtmun a paih lut theihna ding thuneihna neipa chuh lau un, ka hilh na hiu hi, amah chuh na lauh dinguh ahi.

⁶“Vasie nga, paisa matiek nih in a khawng sek uh hilo maw? ahi, vasie khat chale Pathien in a hengilh puoi.

⁷Na luchang u a na sam zang khat nasan u hile sim suok kêi ahi a puo. Khutichun, lau kiu in; vasie tamtak sangin na lul zawu hi.

⁸“Ka hilh na hiu hi, mite ma a ei panpih ta chuh, Pathien vânsâwlchâkte masangah Mihiem Chapa’n amah le panpih ina.

⁹Himahlele, mite maa ei kizuksan ta chuh, Mihiem Chapa’n le Pathien vânsâwlchâkte masangah kizuksan ina.

¹⁰“Kuole, Mihiem Chapa gensieta chuh, ngaihdam theih hi’n tin; himahleh, kuole Thagau Thiengtho gensie vang chuh ngaihdam hi puo’n a.

¹¹“Kikhawpna In ahim, gam vaipawte masang ahim, vaihawmte masang ahim a, thutan sak dinga a hun puih tieng u leh, bang thu a dâwng ding ka him, tih leh, bang ka gen die aw! tih ahim in lungkham kiu in.

¹²Zie hun a na gen ding u chuh Thagau Thiengtho in hun hilh ding ahi ngâl a,” a ti a.

¹³Chun, mipi laka kuo ahim khatin Isu kawmah, “Sinsakpa, ka suohpihpa kawmah, ka pa’n go ei nutsiehte ei kihawppih dingin hilh tie,” a ti a.

¹⁴Himahlele, Isu’n a dâwng a, “Mihiem, nang u chungah kuo a vaihawm ding leh sum hawm dinga ei siem?” a ti a.

¹⁵Chun, a bawn u a kawm achun, “Chingthei unla, awhchâkna himhim laka chun kivengphau un; sum hauh hi mihiemte hin lawh pên ahi puoh ngâl a,” a ti a.

¹⁶Chun, a kawm u ah Isu’n zie tehkal thu hile a gen a: “Mi neizo kuo ahim hi a hung kan mah mah ta a;

¹⁷tichun, amah a hung kingaihtuoh pan ta a, ‘Bangti’n ka hih ta die aw! ka buh leh bâl kawih khawmna ding ka nei puoh ngâl a?’ ti’n.

¹⁸Hiti hin hih mai ding ka, ‘ka buh In haw phie’ng ka ting, a sanga lienzaw’n sa’ng ka ting; tak achun ka buh leh bâl chengcheng kawih khawm ing ka.

¹⁹Tichun, ka thagau kawmah, Thagau, kum tamtak sunga dingin sum tamtak na khawl hi; kichawl inla, ne’n la, dâwn in, lawp takin um ah ti’ng ka,’ a ti a.

²⁰Himahlele, Pathien in a kawmah, ‘Mingawl, tuzan hin na thagau hun lâksak ding ahiu hi; na thil lamdawk haw kha kuo a ding ahi ta die?’” a ti a.

²¹Chun, Isu’n, “Mah a dinga sum khawl a, Pathien lama hauh sam loh chuh, zie tawbang chuh a hi sek hi,” a ti a.

²²Zie chun, Isu’n a sinsakte kawmah, “Khutichun, ka hilh na hiu hi, ‘Bang ka ne die aw?’ ti’n na hinna thuu leh, ‘Bang ka silh in ka cheng die aw?’ ti’n na sapum thuu lungzînpih kiu.

²³Nek ding sangin hinna a lul zaw a, silhlechen sang in sapum a lul zaw ngâl a.

²⁴Va-âk te hi en tiem u: buh a tuh puou a, ât le a ât puou a, buhpang le a nei puou a, buh In le a nei puou; himahlele, Pathien in a vak ngâl a! Chung leng vachate sang chun na lul zaw mah mah uh ahi!

²⁵Chuleh, nang u lak ah lungzîn pih zieka kuo a dunglam tawng khata hihsan beh thei?

²⁶Zie cha chu bawn hih thei lo a, bangti dana thil dang lungkhampih sek na hiu hi?

²⁷Lili pak khan dân hi ngaihtuoh tiem u: na a sem puou a, pat le a khêk diek puou; himahleh ka hilh na hiu hi, Solomon nasan le a lopina chengcheng a a kivan khan, zie lili pak khat haw pha hin le zem in a um puoi.

²⁸Khutichun, gam hampa, tuni banga hing, a zinga thuk a tih kit zieng ding bawn, Pathien in khutibang lâwm lâwma chuh a zem chun, nanguh taksanna tawmte haw, ziehaw sang chun silhlechen a hun pie zaw na lawm lawm ding e!

²⁹“Na nek ding hawu leh dâwn ding hawu lungkhampih kiu.

³⁰(Zie khawvel a awilote hin ziehaw chuh a buoipihpen sek uh ahi.) Ziehaw chuh na sinmawh uh ahi tih na Pau van a um in a he ngâl a.

³¹Zie sang chun Pathien lalgam hawl masa zawu in, tichun, ziehaw chuh hun piek masa behlap ding ahi zaw ngâl a.

³²“Lawi tawmte haw, lau kiu in, nang haw kawma gam piek ding hi na Pau kipahlam tak a hi ngâl a.

³³Na neih chenguh zuok unla, gimtheite kawmah pieu in; van a gucha chieh lohna ah, hangin a nek siet lohna ah, dangkadip lui theilo leh gote chuh khawlkhawm zawu in.

³⁴Na go umna tâk u ah na lungthim u le um ding ahi ngâl a.

³⁵“Kiging zingin um unla, bang hungtung lele hi thei zieng dingin, na thaumei uh det kuongsa leh,

³⁶Suok, a pu kichênna guolvakna apat a hung kit ding ngakte bangin kithuom un. A hunga, kawt a hun kiuh tienga, amah dinga kawt hawn sak zieng thei dingin.

³⁷A pu a hung phata, suok amah a na ngak zinga a muh te chuh mi hampha hi’n a; tihtakzet a ka hilh na hiu hi, amah chun a puon cheng det intin, amah chuh ankuong ah chut sak intin, a nau sep sak ina.

³⁸Zan khang ahim, âk khuon ahim a, a hung a, kiging zinga a muh te chuh mi hampha hi’nau.

³⁹Amahvang chuh, ziehi heu in, gucha a hung ding phat In neipa’n he leh, veng intin, a In chuh vih van sak puo’n a.

⁴⁰Nang u le kiging zingin um un, na gin loh lai tak u leh Mihiem Chapa hung ding ahi ngâl a,” a ti a.

⁴¹Peter in a kawmah, “LALPA, zie tehkal thu hi keihaw chauha dinga na gen ahim, mi chengcheng a ding inle?” a ti a.

⁴²LALPA’n a dâwng a, “Suok ginum tak leh ching tak, a pu’n a in sung thilte chunga lawiupa leh, a an chan dinguh hawp sak dinga a siem chuh kuo pên ahi die leh?

⁴³A pu In a a hung phata, suok zie tawbang hih a a muh chuh mi hampha ahi.

⁴⁴Dik taka ka hilh na hiu hi, a neih chengcheng chungah lawiupa’n siem ina.

⁴⁵Amahvang chuh, zie suok chun a lungthim in, Ka pu hung vak zieng puo’n a, ti’n suoknu suokpate chuh na vel henla, ne a dâwn in ana kham taleh,

⁴⁶Zie suokpa pu chu, a ginchak loh ni’n, a hetloh kâl in hung intin, bawng nih hun suoh intin, mi taksanum lote chan tawbang chan sak ina.

⁴⁷“Suok, a pu deih guol hezing ngâla, a na kiginglo a, a pu deih bang le hih lo chuh nasa taka gawt in zêp un au.

⁴⁸Amahvang chuh, suok, a pu deih lam he lo a, a hih zieka zep a umna theih thil dang hihte chuh, vel tawmcha zêp un au. Kuole, tamtak a piek nateu kawm achun, tamtak ngek un tin, kuole, tamtak a vawp sakna teu kawma chun, tamtak ngek un au.

⁴⁹“Lei chung hi meia hâl dinga hung ka hi, tuhin le kâng pai zieng leh ka ti na e!

⁵⁰Himahlele, baptistma chan ding ka nei, zie kichaih masang cheng chuh, ka ningkitel hi!

⁵¹Lei chunga chamna lên sak dinga hung kha nei sau maw? Naisai lo e, kibungkhenna um sak dinga hung ka hi zawi.

⁵²Tu apat hin, inkuon khata nga chuh kikhen untin, thum chun nih do untin, nih chun thum do un au.

⁵³Pa chun a chate do intin, chapate’n le a pateu do un au; nu’n a chanu do intin, chanu’n a nu do ina, talpi’n a mo do intin, mo in a talpi do ina,” a ti a.

⁵⁴Isu’n mipite kawm achun le, “Thanglam a mei hung dawk na muh u chun, Guoh zu ding ahi, na ti pai zieng sek u a, a hung hi ngêi sek hi.

⁵⁵Sim huih nung na het tieng u leh, Khuo sa ding ahi, na ti sek u a, a hung hi ngêi sek hi.

⁵⁶Nang haw, mi gukhahte haw! lei leh van en in, khuo umdan na he chien thiem ngâl u a, bang zieka tulai thil hi hechien thiem lo?

⁵⁷“Bang zieka nangun thil dik chuh bang ahi tih ngaihtuoh lo?

⁵⁸Mi khat to in a hun hêk a, vaihawmna In a hun tut chun, vaihawmna ina na chieh mau in, theihtawp in, na thubuoi u chuh sukcham guo hâm ah. Na khutih loh a a hih chun, thutante masangah hun kai lut intin, amau chun mimante khut ah hun pieu intin, suongkul ah hun khum kha’n au.

⁵⁹Ka hun hilh na hii, na lieu ding chuh paisa matiek khat chana na chaih masang sieh chuh, tak apat chuh pawtdawk hiel puon la,” a ti a.