Read Gangte LUKE 15 Bible Online

LUKE 15 - Gangte bible

LUKE 15

¹Chun, siehdawlte leh migilote khenkhat chuh, Isu thugen ngai dingin a hung u a.

²Tichun, Pharisaite leh Danthuzikte chun, “Zie pa hin mi gilote a lawp a, a kawm u ah an le a ne sek hi!” ti’n a phunchiek tau a.

³Khutichun Isu’n zie tehkal thu hi a kawm u ah a gen ta a:

⁴“Nanguh lak ah kuo’n le, belam za nei hen la, a laka khat mansak ta leh, sawmkuo leh kuote chuh gamthip a taihsan in, a mang chuh na muh kit masang sieh uh kuo a hawl lo a um ding?

⁵Chun, na muh tieng u leh, lawp takin na liengko u ah na pu sek u a,

⁶Tichun, In na tun tieng u leh na invengteu na samkhawm u a, ‘Ei lawppih un, ka belam mang kha ka mu kit tai!’ na ti sek ui.

⁷Ka hilh na hiu hi, mi diktat sawmkuo leh kuo, lungheina chuom na ding nei lote chung sang chun, migilo khat lungheina chung achun van a mipi kipâk zaw’nau.

⁸“Chun, numei kuo’nle makhai sawm nei in, khat mansak ta hen la hi leh, thaumei de a, In phiet in, a muh kit masang sieh kuo a guntaka hawl lo ding?

⁹Tichun, a muh kit tieng chu leh, a guolte leh a invengte sam khawm in tin, ‘Nei lawppih un, ka makhai mansak kha ka mu kit tai,’ ti’n a.

¹⁰Ka hilh na hiu hi, khutibang mah chun, Pathien vânsâwlchâkte chuh, mi gilo khat kisikna chungah a kipâk mah mah sek ui.” a ti a.

¹¹Chun, amah chun, “Kuo a him in chapa nih a nei a;

¹²a chapang zaw chun a pa kawmah, ‘Hepa, go ka chansik chuh ei pie’n,’ a ti a. Khutichun, a go chuh a kawm u achun a hawm ta a.

¹³Chun, ni sawtlo cha nung chun, a neu zaw pa chun, a chansik cheng chuh a lakhawm suok kêi a, khuol gamla tak ah a chieh ta a, tak achun nawp chin helo in a um a, a sum chuh a peimang maimai ta a.

¹⁴Chun, a neih chengcheng a mat zawh phet chun zie gamsung pumpi achun kiel nasatak mai a hung um ta a, nek ding a hung kitasam ta a.

¹⁵Tichun, zie gam achun mi khat chuh a va bel a; zie pa chun vawk an pie dingin a lo lam ah a sawl a.

¹⁶Khutichun, bang khat bul, vawk in a nêk hawu nasan a chuh kisukvah a ut hiel ta a, kuoma’n la bangmah a pie puoh ngâl u a.

¹⁷A tâwp chun, a hung kihe dawk a, ‘Ka pa kawma suok thalakte laka nek sen loh an nei a tam siet u tawh, kei hila, taka hin gilkiel in thi ding ka hita a!’

¹⁸Tho ing ka ting, ka pa kawmah chieh ing ka ting, a kawmah, ‘Hepa, van a mi chung leh, nangmah mitmuh in thil ka hihkhiel ie!

¹⁹Na chapa vawh hawi le ka hi ta puoi; na kawma suok te laka khat guol hin ei siem mai ah,’ va ti’ng ka” a ti a.

²⁰Khutichun, a kipan a, a pa kawmah a chieh ta a. “Tichun, gamla taka a um lai in a pa’n a na mu a, a lungsiet ta mah mah a, a tai a, a ngâwngkawih a, a châwp tuntun a.

²¹Chun, a chapa chun a kawmah, ‘Hepa, van mitmuh leh, nangmah mitmuh in thil ka hihkhiel ie! Na chapa a vawh hawi le ka hi ta puoi,’ a ti a.

²²Himahlele, a pa chun a suokte kawmah, ‘Puon phapen hun la vak unla, vak silh sak un; zungbuh le a khut ah buh sak un la, kengtawbek le a kêngpêk ah buh sak un.

²³Chuleh, bâwngno thau tak kha hun lau inla, that unla, ne khawm hiting un kipâk takin um hitiu!

²⁴Zie ka chapa hi a thi a, himahleh a hung hing kit ahi tai; a mang a, I muh kit uh ahi tai,’ a ti a. Tichun, kipâk takin a um pan tau hi.

²⁵“Zielai chun, a chapa upa zaw chuh lo a um a hi a. A hung kita, In a hung tun ding kuon chun, thil githei kitum gi leh lam thawm a za ta a.

²⁶Tichun, suokte khat a sama, ‘Bang thil um ahi ta?’ ti’n a dawng a.

²⁷Suokpa chun a kawmah, ‘Na nau a hungkit a, na pa’n dam leh bit taka a muh kit ziekin bâwngno thau tak kha a thah ahi,’ a ti a.

²⁸Ziephet chun, a lungna ta a, In sung achun a lut nuom ta puoh a, tichun, a pa a hung pawt a, lut dingin a thêm ta a.

²⁹Himahlele, amah chun a pa kawmah, ‘En in, kum zie chanpi hi ka hun vaka, na thu lah ka awilo kha puoh a, ka guolte tawh lawpna ka siemna dingin kelno chakhat le nei pie kha ngut puoh a.

³⁰Himahleh, zie na chapa, nawhchizuokte laka na sum chengcheng peimang zo pa hi a hung phetin, amah dingin bâwngno thau tak poh kha na thah sak vang vei a!’ a ti a, a dâwng a.

³¹Chun, a pa chun a kawmah, ‘Ka cha pa, nang ka kawma um zing na hi a, ka neih chengcheng hile nanga ahi.

³²Himahleh, zie na nau hi a thi sa, a hung hing kit ahi a, a mang sa, I muh kit uh ahi ta a, ziezieka chuh, kipâk tak leh lawp taka I um dinguh a puo!’” a ti a.