Read Gangte LUKE 17 Bible Online

LUKE 17 - Gangte bible

LUKE 17

¹Chun, Isu’n a sinsakte kawmah, “Pukna haw hi umlo thei ei puoi, himahlele, pukna tun sakpa chung chuh a gik hi!

²Zie mi neucha cha laka khat le sukpuk sang chun, a supuk pa ngâwng achun buh gawih gawpna suong awh sak in, tuisuohgiet ah kikhie leh, amah dingin phazaw ding ahi.

³Zieziekchun, na thilhih u a chun chingthei un. “Na suohpih in thil a hihkhelh chun, gai inla, a kisik chun, ngaidam in.

⁴Ni khatin na chungu ah sagih vei thil hihkhiel in, sagih vei, ‘Ka kisik hi,’ ti a nang lam a hung ngat kit chun, na ngaihdam ding ahi,” a ti a.

⁵Chun, sawlchakte chun LALPA kawmah, “Ka taksannau ei sukpun sak in,” a tiu a.

⁶Chun, LALPA’n a dâwng a, “Ankam mu chang khat tieh taksanna na neih u chun, zie thingtheimi kung kawma hin, ‘Hung kibawtdawk inla, tuisuohgiet ah hung kiphut ah,’ ti leu chin, na thuu a nung ding ahi.

⁷“Na lak u a khat hin, suok, lo kai in ahim belam chingin ahim nei un la hi leu chin, lo apat a In a a hung tun tieng chu leh, ‘An hun um zieng ah,’ kuo a na ti ding?

⁸‘Ka nek ding nei siem sak in la, na puon cheng in la, ka nek a, ka dâwn zawh masang cheng chuh, ka nek bawl ah; zie nung chu leh nangin ne na’n la,’ ti zaw ding na hiu hi.

⁹Na thuu a a nun ziek u chun na suokteu in, kipah thugen a lawh ngei um leh?

¹⁰Khutibang mah in, nang haw’n le, na kawm u a hih ding a thupiek chengcheng na hih nung un, ‘Suok phachuom lo ka hiu hi; ka sep ding mawng uh ka sep uh ahi,’ tiu in,” a ti a.

¹¹Chun, tihi a hung hi a, Jerusalem zuona a chieh lai in, Samari leh Galili gamgi zul a hawh malam a.

¹²Khuo bang ahim a a lut ding kuon in, phâk ngen cha mi sawm in a kituokpih u a. Ziete chuh gamla tak ah a ding u a,

¹³a kiko u a, “Isu, Sinsakpa, kei uh nei lungsiet ah!” a tiu a.

¹⁴Chun, Isu’n amau haw chuh a muh phetin, a kawm u ah, “Thiempute kawmah va ki-etsak tau u,” a ti a. Chun, tihi ahi a, a chieh lai u chun, a hung thieng vek tau a.

¹⁵A laku a khat chun, a dam tai tih a hung kimuhdawk phet chun, ngeih tak a Pathien pakcha kawmin a vaikit ta a.

¹⁶Isu keng bul ah a khupbawk a, kipahthu a gen ta a. Zie pa chu Samari mi a hi a.

¹⁷Isu’n a kawmah, “Mi sawmte kha na thieng uh hilo maw? Adang kuote kha khawi ah a um tau hi?

¹⁸Pathien pakcha dinga kîkkit, zie nam chuom mi tihloh hi, kuoma’n mi dang mu lo ahiu maw?” a ti a.

¹⁹Tichun, Isu’n a kawmah, “Kipan in la, chieh ah, na taksan na’n a hun dam sak a hi,” a ti a.

²⁰Chun, Pharisaite’n, Pathien gam hungtunna ding phat a dawt ziekun, Isu’n a kawm u ah, “Pathien gam chuh muh theih in a tung puoi.

²¹Kuoma’n, ‘En tiem u, zie tak a hin a um hi,’ ti’n ahim, ‘zie tak a khun a um hi,’ ti puo’n au; a ziek chuh, Pathien gam chuh nangmau haw a um a hih ziekin,” a ti a.

²²Chun, amah chun a sinsakte kawm achun, “Mihiem Chapa dam lai nite hi, ni khat bêk hi na muh nawp hun uh hung um ina, himahlele, na muh theih loh niu hungtung ding ahi.

²³Chuleh, na kawm u ah, ‘Entiem u, taka khuh!’ ‘Entiem u, taka hih!’ ti hung um un au. Himahleh, en dingin pawtdawk kiu in.

²⁴Kâwlmawng lehlam apat a kâwl a phet a, vannuoi kâwlmawng lehlam tienga a en sek guol hin, Mihiem Chapa a hung ni chu leh um ding ahi.

²⁵Himahleh, zie masang chun thil tamtak thuok intin, tulai khanga mite deih loh hin le um ding a hii.

²⁶Noah dam laia thil umzie guol khan, Mihiem Chapa a hungkit ni chu leh um ina.

²⁷Noah kuong a a lut a, tui a hung let a, a bawnchau a a thih suok kêi niu a tun masang sieh, a neu in, a chau a, zi leh pasal in a kichêng tuoh sek ui.

²⁸Khutibang mah khan. Lot dam lai inle a hung um a, a ne’n, a chau a, a chawu a, a zuok u a, a chi’ng u a, a sa sek ui.

²⁹Himahlele, Sodom khuo apat Lot a pawt ni chun, van apat in mei leh kât in a zu a, a bawnchau in a thi suok kêi ta a.

³⁰Khutibang mah chun, Mihiem Chapa a hung kilak ni chu leh um ina.

³¹“Zie ni chu leh, In chunga um chuh, In sunga a thuomphuo um la dingin kum kihe’n; zie tawbang mah chun, lo a umte chu le, In lam ah vaikit kihe’n,

³²Lot zi hezing un.

³³Kuole, a hinna humbit guo ta’n chan intin, kuole, a hinna chan ta’n humbit ina.

³⁴Ka hilh na hiu hi, zie zan chun, zâlkhun khat ah mi nih giekkhawm untin, khat chuh lak mang in um intin; khat chuh nutsieh in um ina.

³⁵Numei nih buh gawigawp in um untin, khat chuh lâk in um intin, khat chuh nutsieh in um ina.” a ti a.

³⁶Mi nih lo ah nasem in um untin, khat chuh lâk in um intin, khat chuh nutsieh in um ina, a ti a.

³⁷Chun, a sinsakte chun, “LALPA, khawitak ah e?” ti’n a dawng u a. Amah chun a kawm u ah, “Khawiale, saluong umna tâkah, mulukawlh te le um khawm un au.” a ti a.