Read Gangte LUKE 18 Bible Online

LUKE 18 - Gangte bible

LUKE 18

¹Chun, Isu’n a sinsakte chuh, lungthuoi lo in a paucham zing dinguh ahi tih hilhna dingin a kawm u ah tehkal thu a gen a:

²“Khawpi khawitak ahim a hin, Thutanpa khat hi a um a, zie pa chun Pathien a kihcha puoh a, mihingte le a zahchâk diek puoi.

³Zie khawpi achun meithai khat mah hi a um a, amah chun, ‘Ka kilanpih chungah phuba ei lak sak in,’ ti’n a kawmah a chieh zing sek a.

⁴Himahleh, hun bang ahim chan chuh Thutanpa chun a na hihsak zieng puoh a, himahleh hun chawmkhat hal chun a lungthim in, ‘Pathien kihcha lo in, mihing zahchâk diek kimahleng,

⁵Zie meithainu hin ei hung sukbuoi ziek hin a phu lak sak mai di’ng ka, khutilochun hiti hin hung zing intin, ei hung suchawl zaw diek kha’na,’” a ti a.

⁶LALPA mah in, “Thutanpa diktatlo thugen chuh zau in, a ti a.

⁷Pathien in, a mah mite ngêi, a sun a zan a panpihna ngên a kiko sekte phuba chuh lâksak lo ding ahim? Amau haw panpih dingin a ngak nalai dinga ahim?

⁸Ka hilh na hiu hi, kin takin a thuu tan sak intin, amau haw deih lam in hih sak ina. Himahlele, Mihiem Chapa a hung phat leh, lei chunga hin ginna a hun mu na dem?”

⁹Chun, amah chun, mi diktat tak hih kigingcha, mi dang cheng musit sek, kuote ahim kawmah zie tehkal thu hile a gen a:

¹⁰“Mi nih Pathien Ho-In ah paucham dingin a va chieh u a; khat chuh Pharisai ahi a, khat zaw chuh siehdawl ahi.

¹¹Pharisai chuh a ding dawka, amah mai in hiti hin a paucham ta a: ‘Pathien, mi dangte guola lepgu, diktatlo ahim, zawlsai ahim ka na hih loh ziekin, na chungah ka kipâk hi. Zie taka siehdawlpa tawbang khuh ka hih loh ziekin le ka hun pakchai.

¹²Chawlhkal khatin an nih vei ka ngawl a, ka neih cheng apat sawma-khat ka pie sek hi,’ a ti a.

¹³Himahleh, siehdawlpa chuh gamla tak ah a ding a, van lam ale dâk ngam lo in, ‘Pathien, kei migilo hi ei lungsiet ah,’” ti’n a âwm a kichup a kichup zaw ta a.

¹⁴Ziephet chun Isu’n, “Ka hilh na hiu, Pharisai chuh hilo in, siehdawlpa zaw chuh in lam ah thiemchang in a kileh kit tai. Zieziekchun, kuole, kingailul ta tawm un tin, kingaitawm ta chu limbawl in um un au,” a ti a.

¹⁵Mipi khenkhat in, a chateu chu a chung u a a khut a na ngak dingin Isu kawmah a hun pui u a. Sinsakte’n zie chuh a na muh phet un a na gai u a.

¹⁶Himahlele, Isu’n naupang neu haw chuh a kawmah a sama, “Naupanghaw chuh ka kawmah hung sak un la, zadah kiu; Pathien gam chuh zie tawbang mite a ding hi ahii.

¹⁷Tihtakzet a ka hilh na hiu hi, kuole, Pathien gam chuh naupangin a lawp guola lawp lo ta chuh a sung ah lut hiel puo’n au,” a ti a.

¹⁸Chun Judate lawiupa kuo ahim khatin Isu kawmah, “Sinsakpa pha, kumkhuo a hinna ka chan na dingin banga ka hih ding?” ti’n a dâwng a.

¹⁹Isu’n a kawmah, “Bang zieka pha nei tih a? Mi khat ngâllo chuh kuomah a pha a um puoi, zie chuh Pathien ahi

²⁰Thupiek haw chuh na he a puo: ‘Zawlsai kih; tuolthat kih; gucha kih; diklo takin mi dangte heksie kih; na nu leh na pa limbawl ah,’ tih haw hi,” a ti a.

²¹Amah chun a dâwng a, “Zie thu haw chengcheng chuh, chapang neucha ka hih apat ka zawp ei tai,” a ti a.

²²Isu’n zie chuh a zak phetin, a kawmah, “Tuhin, thil khat na vat nalai hi; na neih chengcheng khawng inla, neilahte kawmah hawm ah, tichun, van ah go nei inla; chun, hung inla, ei zui ah,” a ti a.

²³Himahleh, zie thu chuh a zak phetin, a lungkham mah mah ta a, mi neizo tak a hih ziekin.

²⁴Chun, Isu’n amah chuh a lungkham hi tih a muh chun, “Sum haute chuh Pathien gama lut a haksa na ding e!

²⁵Mineizo Pathien gama lut sangin, sangawngsau pin bil a lut pai a baihlam zawi,” a ti a.

²⁶Mipi zie thu zate chun, “Khuti a hih leh, kuo a hukdam hi thei ding leh?” ti’n a dâwng u a.

²⁷Isu’n a dâwng a, “Mihiem a dinga hih theih loh chuh Pathien a ding in hih theih ahii,” a ti a.

²⁸Chun, Peter in, “Entie! kei un, ka inteu leh ka loteu taihsan in ka hun zui tau hi,” a ti a.

²⁹Isu’n a kawm u ah, “Tihtakzet a ka hun hilh na hiu hi, kuole Pathien gam zieka In ahim, zi ahim, suohpihte ahim, nu leh pa ahim, chate ahim taihsan taphawt chuh,

³⁰tu damsung zieng hin le, a sanga tamzaw mu lo ding kuomah a um puou hi, hun hungtung kit dinga kumkhuo a hinna tawh,” a ti a.

³¹Isu’n sawm le nih te chuh a chuom in a puidawk a, a kawm u ah, “Ngaitiem u! Jerusalem khuo a va chieh ding I hiu a, thiemgaute’n Mihiem Chapa chanchin a na zik chengcheng teu kha hung tung kim ding ahi.

³²Jentel te kawmah pieu intin, engho un tin, zahhuoi takin bawl un tin uh; chil sietkhum un au.

³³Chun, zêp untin, that un tin uh, ni thum ni leh tho kit ina,” a ti a.

³⁴Himahlele, sinsakte chun zie thu haw himhim chuh a ngaihna a he puou a; thu umzie chuh a laku ah selguk in a um a, Isu thugen chuh bang gen a hih a he puou ui.

³⁵Chun, tihi ahi a, Jerikoh khuo a tun ding kuon in, mitdûk khat lam pang ah khutdawh in a na chu a.

³⁶Zie pa chun mipi chieh thawm a zak phetin, “Zie chuh bang ahi ta?” ti’n a dawng a.

³⁷Amau haw chun, “Nazareth Isu chieh a hii,” ti’n a hilh u a.

³⁸Ziephet chun, amah chun, “Isu, David chapa, ei lungsiet ah,” ti’n a kiko ta a.

³⁹A masanga mipite chun thip dingin a gai u a. Himahleh, amah chuh, a kihah ko zaw diek a.

⁴⁰Khutichun, Isu chuh a ding a, mitdûkpa chuh a kawma hun puih ding thu a pie a. A hung naih phet chun Isu’n,

⁴¹“Na chunga bangtia ka hih a na nawp?” a ti a. Amah chun, “LALPA, khuo muh theih ka nuom hi,” a ti a.

⁴²Isu’n a kawmah, “Na mu thei ta’n, na taksanna hi na dampih a hina,” a ti a.

⁴³Tichun, thakhat in a hun mu thei pai zieng ta a, Pathien pakcha kawm zelin amah chuh a zui ta a, mi chengcheng chun zie chuh a muh phet un, Pathien a pakcha tau a.