Read Gangte LUKE 19 Bible Online

LUKE 19 - Gangte bible

LUKE 19

¹Chun, Isu Jerikoh khuo ah a lut a, sun pal ding a hi a.

²Zie tak achun mi khat a min Zakai kiti, siehdawlte lawipa, mi neizo tak a um a.

³Isu chuh mi bang tawbang ahim tih muh a guo ta a, himahleh, mipi ziekin a mu thei puoh a, amah la mi niemcha ahi ngâla.

⁴Khutichun, a taihkhelh a, a en dingin theipi lêk ah a kal a, zie lampi chuh hun hawh ding ahi ngâla.

⁵Isu chuh zie mun chu a tun phetin, a vak dâk to a, a kawm achun, “Zakai, hung kum vak ah, tuni’n na In a tung ding ka hi,” a ti a.

⁶Tichun, Zakai chuh kinlebuong in a kum a, lawp takin amah chuh a tun sak ta a.

⁷Chun, zie chuh a muh phet un a bawn un “Migilo pa In a tung dingin a chieh ta khu!” ti’n a phun sausau tau a.

⁸Chun, Zakai chuh a ding a, LALPA kawmah, “LALPA, ngaiin, ka neih kimkhat neilahte kawmah pie’ng ka ting, chun, kuo kawm hitaleh diklo taka ka na lepguk chuh, a zah li’n din ing ka,” a ti a.

⁹Chun, Isu’n a kawmah, “Tuni hin zie In ahin hukdamna a tung tai, amah hile Abraham chapa ahi ngâl a.

¹⁰Mangthaite hawla hukdam dingin, Mihiem Chapa hi hung ahi him hi,” a ti a.

¹¹Chun, zie thu haw chuh a ngaihthak lai un, Jerusalem khuo a naih tâk ziek leh Pathien gam hunglang zieng dinga a ginchak ziekun tehkal thu a gen tel a.

¹²Khutichun, zie thu haw hi a gen a: “Khatvei hi mi khat, dinmun sangtak luoh, gam gamla taka chieh a, lenga va um a, chuleh hungkit ding ti a ngaihtuoh khat hi a um a.

¹³A chieh masang in, a suokte sawm chuh a sama, dangka sawm a pie chiet a, a kawm u ah, ‘Ka hung tun kit masang sieh, zie hin a na sumkawlvei un,’ a ti a.

¹⁴Himahleh, a gam mite chun a mah chu a mudah u a, ‘Zie pa hi ka chung u a leng dingin ka deih puou hi,’ ti’n a nung ah palai a delh zui sak u a.

¹⁵“Zie pa chuh, leng a va chan nung in, In lam ah a hungkit ta a, a suokte, dangka a piek haw chuh a veikan dân uh hetna dingin kin takin a sam khawm ta a.

¹⁶Tichun, a masapen chuh a hung a, a kawmah, ‘Hepu, na dangka kha sawm in ka veikan hi,’ a ti a.

¹⁷‘Na hih pha ie, suok pha leh ginum! Tawmcha chungah na taksanum ziekin, khawpi sawm chungah lawiupa’n hun um sak ing ka,’ a ti a.

¹⁸Chun, a nihna pa chuh a hung a, ‘Hepu, na dangka kha nga mah in ka veikan hi,’ a ti a.

¹⁹Zie pa kawm achun le, ‘Khawpi nga chungah lawiupa’n pang ah,’ a ti a.

²⁰Suok dang khat pa chuh a hung a, ‘Hepu, entie! ziehi na dangka kha ahi; khawsa-ul thiekna puon-In ka chûn a, ka kawih pha zing ahi.

²¹Mi khel tak na hih ziekin ka lau a, nanga lo pile na la sek a, na tuh loh poh le na ât sek ziekin,’ a ti a.

²²Chun, amah chun a kawmah, ‘Suok gilo! nangmah kamsuok ngêi apat in mawh hun chan sak ding ka hi! migilo tak ka hi tih na he a, keia lo pi le ka la sek a, ka tuh loh pile ka ât sek hi.

²³Khutichu a hih leh, bang zieka ka sum chuh sumkawlveina In a na kawih loh a? Tichun, ka hungkit tieng leh, a pung tawh ka muh ding hi a,’ a ti a.

²⁴Tichun, zie tak a dingte kawm achun, ‘dangka kha lâksak unla, sawm neipa kawma khan pieu in,’ a ti a.

²⁵Himahleh, amau haw chun a kawmah, ‘Ama’n sana dangka sawm a neihsa hi,’ a tiu a.

²⁶‘Ka hun hilh na hiu, a neita piek behlap untin, a nei lo chuh, a neih sun le lak sak un au.

²⁷Tuhin, zie ka melmate, a chung u a, vaihawm dinga ei deih lote hi hun pui unla, ka masang ngeia hin that un,’” a ti a.

²⁸Chun, khutibang thu haw chuh a gen zawhin, a masang lam u a Jerusalem lam chuh a zuon to tau a.

²⁹Chun, olive tânga Bethphage leh Bethani khuo kieng a hun naih phet chun, sinsakte laka mi nih a sawl a,

³⁰“Na ma zawn u a khuo a khun va chieh unla, na lut tieng u leh, sabiltung no kihên, kuomah chut khâk lohna va muu in na tin uh; zie chuh sut unla, taka hin hun kai un.

³¹Kuo’n le, ‘Bang dinga phel na hiu hi?’ ti a a hun dawt u chun, ‘LALPA’n a deih ahi,’ tiu in,” a ti a.

³²Khutichun, a chieh tau a, Isu’n a kawm u a a gen guol tak chun a va mu tau a.

³³Chun, sabiltung no a sut lai u chun, a neite’n a kawm u ah, “Sabiltung no kha bang dinga sut na hiu hi,?” a tiu a.

³⁴Amau chun, “LALPA’n a deih ahii,” a tiu a,

³⁵tichun, Isu kawmah a hun kai tau a. Khutichun, sabiltung no chung achun a puonhawu a phah u a, a chungah Isu a chut sak u a.

³⁶Tichun, a chiehna ding lampi achun, mipite chun a puonhawu a phah zel u a.

³⁷Chun, Jerusalem a tun ding naih a, olive tâng lêpthâk ding kuo’n chun, a nungzui mipi nasatakte chun, a thilmak hih chengcheng a muh ziek u chun, aw ngeih tak in Pathien a pakchau a,

³⁸“LALPA min a Leng hung chuh a navak hi, van ah chamna thu leng hen la, chungnung pên a Pathien kawm achun lopina um hen,” a tiu a.

³⁹Ziephet chun, mipi laka Pharisai khenkhatte chun Isu kawmah, “Sinsakpa, na sinsakte hi thip dingin thu pie’n,” a tiu a.

⁴⁰Isu’n a dâwng a, “Ka hilh na hiu hi, ziete haw hi a thip u chun, suong chang bêk kiko dawk un au,” a ti a.

⁴¹Chun, a tun ding kuon un khuo chuh a mu a, a kahcham a,

⁴²“Aw, nang tak hin, tuhun sung hin lungmuonna ding thu hi he ta ve leh chin! Himahleh tu’n vang na hetlohna dingin a ki-îm ahi ta ngâla!

⁴³Na gâlteu in na kim vel u a kulhte siem a, ning tina hun um kim vela, pawt thei lo a a hun chenkhum hun uh hung tung ding ahi.

⁴⁴Chun, nang leh na cha-na naute chuh tuol khetna’n hun nei un tin uh, na sunga suong kitieng himhim hi hâwi puo’n au, ahun vilthak viel lai uh na hetloh ziekun, khutibang ni haw chuh na chung u ah hungtung ina.” a ti a.

⁴⁵Chun, Pathien Ho-In achun a va lut a, sumkawlveite chuh a nawhdawk a,

⁴⁶a kawm u ah, “Lehkhabu thiengtho ah Pathien in, ‘Ka In chuh pauchamna In ti’n au, a tii,’ tih zik ahi. Himahleh, nang haw’n guchate kisêlna In in na siem zaw tau hi,” a ti a.

⁴⁷Chun, amah chun ni chengin, Pathien Ho-In achun a sinsak sek a. Thiempuliente leh Danthuzikte leh, vantâng lawiupate chun amah thah a nuom u a;

⁴⁸Himahleh, mipite chun phachuomngai taka a thu a ngaihthak zing ziekun, a lampi ding a mu thei puou hi.