Read Gangte LUKE 21 Bible Online

LUKE 21 - Gangte bible

LUKE 21

¹Chun, Isu a dâk viel a, mi neizote’n Pathien Ho-In tuoklawm bawma tuoklawm a khiek lai u chuh a mu a.

²Chuleh, meithai, neilah tak, khatin paisa matiek nih a hun khiek chule a mu a.

³Tichun, a kawm u ah, “Tihtakzet a ka hilh na hiu hi, ziehaw chengcheng sang hin, zie meithai neilah cha hin a khie tam pên hi.

⁴A dang cheng hin, a neih val u apat tuoklawm a khiek uh ahi a; himahlele, amah hin chuh, a hinpih ding, a neih sun chuh a khiek zawh vek a hii,” a ti a.

⁵Chun, kuote ahim in, Pathien Ho-In chungchâng leh, a hawih dân leh, a suong hawihdante leh, Pathien kawma thilpiek hawihtak taka kizêm a hih thu a gen lai tak un.

⁶“Zie na thil muh teu hi, sukchip loh a suong kitieng himhim taka hin um puo’n a, khutibang ni chuh hung tung ina,” a ti a.

⁷Chun, amau chun a kawmah, “Sinsakpa, ziehaw chuh bangtik leh a hung um die leh? Ziehaw chuh a hung tun ding kuo’n leh melchikna banga um ding?” ti’n a dawng u a.

⁸Isu chun, “Chingthei unla, thep in um kiu un. Mi tamtakin, ‘Krista chuh ka hi, a hun tung ding ei tai,’ ti’n ka min in hung un au! Himahlele, amau haw chuh zui kiu in.

⁹Kido thu leh buoina thu na zak tieng u leh, lau kiu; ziehaw chuh a tung masa ding him ahi, tawpna vang chuh tung zieng tadih puo’n a,” a ti a.

¹⁰Chun, a kawmah, “Nam chuom leh nam chuom kido untin, gam chuom leh gam chuom kido un au.

¹¹Leiling nasatak in kilîng intin, mun chuom chuom ah kiel um intin, hipi le leng ina; van apat in thil danglam taktak leh tizat-um tak tak hung um ina.

¹²Himahlele, zie thil haw a hungtun masang chun, hun man untin, hun sugimthei untin uh; kikhawpna In ah na chung thuu tan dingin hun pie dawk untin, suongkul ah hun khum un au; ka min ziekin lengte leh vaihawmte masangah hun pui un au.

¹³Chun, zie chuh nang haw dingin, tiemtehna hi’n a.

¹⁴Khutichun, na dawnna dingun ngaihtuoh khawl masa lo dingin ching thei un,

¹⁵na melmateu chengcheng in, a hun do dîl u a, a hun niel theih lohna ding, kam leh chitna hun pie ding ka hi ngâl a.

¹⁶Chuleh, na nu leh na pateu, na suohpih teu, na In sak na inthangteu, leh na guol teu inle hun matsak un tin uh; abang hun that un au.

¹⁷Chun, kei ziekin mi chengcheng muhdah in um un lau.

¹⁸Himahlele, na luchang u a na samzang khat u le mangthai puo’n a.

¹⁹Det takin dingun, tichun, na thuokhat nau in na hinnau hukbit un lau.

²⁰“Amahvang chuh, sepaihte’n Jerusalem a hun ûmkimvel tieng u leh, mangthai ei tai, tih heu in.

²¹Zie tieng chuleh, Judia gama umte chuh tânghaw achun tai mang u he’n; khawpi a umte chun taih dawk san u he’n kuole gama umte chule khawpi ah tai lut diek kiu he’n.

²²Zie nihaw chuh ‘Phuba lak ni’ hi ding ahi, Pathien lehkhathu a kizik chengcheng a tunkimna dingin.

²³Zie nihaw achun gai leh chasen pawmte chung chuh gik ina! Khawvela hin gimtheihna nasatak a tun ding ziek leh, zie mite chunga hi Pathien gawtna a tun ding ziekin.

²⁴Khenkhatte chuh chemzâma thah in um un na tin uh, khenkhatte chuh, namtin kawma sala puih in um in tin uh; tichun, Jentel te ni a bukim masang sieh, Jerusalem chuh Jentel te tawh den in um ina.

²⁵“Chun, Nisa ale, tha ale, aksi te akhun, melchikna hung intin; Tuisuohgiet kinawk thawm ziek chun, lei chunga gam chengte chuh beidawng a lau leh kilîng in um un au.

²⁶Mipite chuh, lei chung pumpi a thil hungtung ding ziek chun lau in thidang untin, vanthamzawl a thilhih theihna umte chuh, suklîng in um ina.

²⁷Zie tieng chuleh, Mihiem Chapa hi thilhih theihna leh lopina nasatak tawh mei laka hung mu ding na hiu hi.

²⁸Zie thil haw chuh a hung tun kipat tieng chu leh, ding dawk unla, dâk to un, na hukdamna niu chu a naih tâk ziekin,” a ti a.

²⁹Chun, Isu’n a kawm u ah zie tehkal thu hi a gen a: “Theipi kung leh thing dang cheng chengte hi en un.

³⁰A nah hung sel dawk na muh tieng u leh, nipi hungtung ding ahi tai tih na heu hi.

³¹Zie tawbang mah chun, zie thil haw hungtung na muh tieng u leh, Pathien gam chuh a hung nai tai tih heu in.

³²“Tihtakzet a ka hilh na hiu hi, zie thil chengcheng hi a tunkim masang sieh, tulai khang thakte hi, mang puo’n a.

³³Lei leh van mang intin, himahleh, ka thu vang chuh mang puo’n a.

³⁴“Amahvang chuh, chingthei un! khutilochun, nek vah tâk luot tawh, zukham tawh, damsung khawsak ngaihtuohna tawh, na lungthim uh dim val taluo kha’n tin; zie Ni chu leh, thang âwk guolin thakhat in, na chungu ah hungtung phut ina.

³⁵Thâng pel bangin lei chung pumpi a mi cheng chungah tung ding ahi ngâla.

³⁶Zieziekchun, zie thil hungtung dingte chuh pel tâk leh Mihiem Chapa masanga ding tâka guot na hih theihna dingun, bangtik lai inle paucham kawmin khawningai un,” a ti a.

³⁷Chun, amah chun sun leh Pathien Ho-In ah a sinsak sek a, nitâk lam leh a pawt a, zan leh olive tâng achun a giek sek a.

³⁸Chun, zingkal leh, mipite chuh Pathien Ho-In ah, a thugen ngaitha dingin, a hung khawm sek u a.